रञ्जन काेइरालाया मामिलाय् गल्ती जुल – जबरा

येँ (नेपालभाषा टाइम्स)÷ पुलांम्ह प्रधानन्यायाधीश चोलेन्द्र शम्शेर जबरां सशस्त्र प्रहरीया तत्कालीन डीआईजी रञ्जन कोइरालाया कैद सजाय म्हो यायेगु थःगु गल्ती जूगु स्वीकार यानादीगु दु ।

म्हिगः प्रतिनिधिसभाया महाअभियोग सिफारिस समितियात बयाना बीगु झ्वलय् वय्कलं थःगु गल्ती स्वीकार यानादीगु खः । समितिं जबरायाके स्वक्वःगुखुसी बयान काःगु खः । जबरायात संसदीय समितिं न्ह्यसः न्यनेगु झ्वलय् धाःगु खः, ‘सशस्त्र प्रहरीया तत्कालीन

डीआईजी रञ्जन कोइराला दुथ्याःगु ज्यान मुद्दाय्मातहत अदालतं जूगु फैसलायात भिंकाः गैरकानुनी ढंगं कैद म्हो यायेधुंकाः सर्वोच्च अदालतय् पुनरावलोकनया झ्वलय् विचाराधीन दुगुलिं अज्याःगु संगीन मुद्दाया याकनं सुनुवाइ यानाः न्यायिक मूल्य पुनस्र्थापित यायेमाःथाय् थम्हं हे तःक्वः पेशी स्थगित याःगु व उगु मुद्दायात प्रभावित यायेगु कथं सार्वजनिक फैसलाया प्रतिरक्षा याःगु खनेदुगु, प्रधानन्यायाधीशं इजलास पिने थःगु फैसलाया बारे न्ववायेगु व टिकाटिप्पणी यायेगु अदालतया गरिमा लिसें मर्यादा अनुकूलया आचरण मखु, थुकी थःगु लिसः तयादिसं ।’

लिसलय् जबरां धयादिल, ‘रञ्जन कोइराला कसुरदार ठहरे जूगु खः, वयात जन्म कैद जूगु खः, न्यायाधीशयात विवेकश छ्यलेगु अधिकार दु, तत्कालीन मुलुकी ऐनं उगु अधिकार बियातःगु दु, थ्व पारिवारिक मुद्दा खः, नाबालक काय्पिं नं इजलासय् दुगु खः, नाबालकया पालन पोषणया नितिं, पारिवारिक जीवन हनेगु नितिं कैद म्हो यानागु खः, उकी विवेक छ्यलाबलय् गल्ती जूगु दु ।’

उकथं हे जबरां थ्व हे फैसलाया आधारय् थःत महाअभियोग तःगु खःसा थम्हं उकियात स्वीकार यायेगु धासें थःगु गल्तीयात कयाः पश्चाताप जूगु गु खँ नं धयादीगु खः । लिसे वय्कलं थःगु गल्तीयात कयाः समितिया न्ह्यःने क्षमा नं फ्वनादीगु खः ।