विप्लवया वार्ताया खँ छद्मभेषी

येँ – सरकारया प्रवक्ता व संचारमन्त्री गोकुलप्रसाद बाँस्कोटां नेपाल कम्युनिष्ट पार्टी विप्लवपाखें वार्ताया निंतिं हःगु सर्त ‘छद्मभेषी’ जूगु खँ धाःगु दु । मन्त्री बाँस्कोटा सरकार अज्याःगु छद्मभेषी खँया लिउने मवनीगु खँ नं धाःगु दु ।

विप्लवं सोमवाः पितबिउगु विज्ञप्तिइ सरकारं ज्वनातःपिं थःपिनि पार्टीया कार्यकर्तातय्त निःसर्त त्वःतल धाःसा वार्ताया निंतिं सकारात्मक रुपं बिचाः यायेफइ धयातःगु खः । विज्ञप्तिइ सरकारं फासीवादी दमनया ढाकाछोप यायेगु निंतिं वार्ताया हतियार छ्यलाच्वंगु धासें यदि इमान्दार जुया वल धाःसा बिचाः यायेफइगु खँ धयातःगु खः ।

सरकारया प्रवक्ता बाँस्कोटां धाःसा थुकियात छद्मभेषी धासें सरकारं अज्याःगु खँया लिउने वनीमखु धयादीगु खः । वय्कलं विप्लवं स्वेच्छि चन्दा अभियान धकाः चन्दा आतंक न्यंकाच्वंगु धासें दकलय् न्हापां थज्याःगु ज्या निं दिकेमाःगु खँ धयादीगु दु । सरकारं थ्वयां न्ह्यव विल्पवयात बिनासर्त वार्ताय् वयेत इनाप यानाच्वंगु खँ ।

मन्त्री बाँस्कोटां यदि विप्लद दलया सर्त दुसा सरकारया नं सर्त दुगु खँ धयादीगु खः । वय्कलं न्ह्यसः दु, ‘हिंसा यायेगु, बम दयेकेगु, आतंक न्यंकेगु, चन्दा आतंक न्यंकीगु, अले जिमि कार्यकर्ता त्वःती अले जक वार्ता याये धयां जिइ ला ?’मेखे विप्लव थः पार्टीया यक्व कार्यकर्ता ज्वनेधुंकाः वार्ता पाखे सकारात्मक जुया वयाच्वंगु खँ धाःगु दु ।

वार्ताया निंतिं हे विप्लवं निन्हु न्ह्यव जक ज्वंम्ह पार्टी कार्यकर्ता गुणराज लोहनीयात पार्टी निष्काशन यानागु घोषणा याःगु खः । लोहनीयात चितवनं ज्वंगु खः । लोहनीयात ज्वनेवं विप्लवं छगू विज्ञप्ति पिकासें लोहनी लोहनी थःगु पार्टीया केन्द्रीय सदस्य मखु व व बिरामी जुयाच्वंगु खँ धयातःगु खः ।

छुं न्हि न्ह्यव विप्लवया २१ म्ह नेता कार्यकर्तातय्त नं दाङय् ज्वंगु खः । उकी विप्लवया थः हे दाजु नं लाःगु खः ।गृहमन्त्री रामबहादुर थापां नं विप्लवया कार्यकर्तात यक्व ज्वने धुनागुलिं विप्लव वार्ताय् वइगु सम्भावना अप्वयाच्वंगु खँ धयादीगु खः ।मेखे राजनीतिक विश्लेषकतय्सं नं वार्तापाखें समस्या समाधान यायेत निगुलिं पक्ष तयार दुसा समाधानया थीथी सूत्रत दुगु खँ धयाच्वंगु दु ।

सम्बन्धित बुखँ

LEAVE YOUR COMMENTS