ठेकेदारयात कारवाही तयारी

येँ – पुलांगु बसपार्कय् दयेकाच्वंगु भ्यू टावर इलय् दयेके सिमधयेकल धाःसा ठेकेदारयात कारबाही यायेगु खँ येँ महानगरपालिकाया इजिपी प्रमुख महेश काफ्लें कनादीगु दु । नेपालभाषा टाइम्स लिसे खँ ल्हासें वय्कलं तत्कालया निंतिं अन जुयाच्वंगु ज्या दिकेगु बारे निन्हु न्ह्यः मनपायात जानकारी याकूगु खः अय्नं आः वइगु भदौ तक गुलि ज्या सिधइ व स्वयाः कारबाही न्ह्याकेगु जुइ धयादिल ।

वय्क् : या कथं आः वइगु निवाः लिपा हे भ्यू टावरया ज्या न्ह्याकेगु धकाः ठेकेदार कम्पनीं मनपायात जानकारी बिउगु दु ।
‘सम्झौता कथं भदौ महिनाया दुने गुलि ज्या क्वचायेकेमाःगु खः उलि मजुल धाःसा धाःसा कानुनी रुपं कारबाही यायेगु जुइ’ वय्कलं धयादिल ।

जलेश्वर स्वच्छन्द विकोई बिल्डर्सया प्रमुख मनोजकुमार भेटवाल धाःसा थौंकन्हय् बैंक घोटाला काण्डय् लानाः प्रहरी हिरासतय् लानाच्वंगु दु । थुकिं यानाः भ्यू टावर दयेकेगु ज्या ठप्प जुयाच्वंगु दु । एपेक्स बैंक घोटाला काण्डय् भेटवालयात ज्वंगु खः । ठेकेदार कम्पनीया प्रमुखयात ज्वनेधुंकाः निर्माण ज्या न्ह्याकेत आर्थिक अभाव जुयाच्वंगु खँ नं सूत्रं धाःगु दु ।