झण्डै जुइत्यंगु पुनर्गठन : ओलीं पुनर्गठन यायेत हे बैठक सःतूगु खः, दाहालं पना बिल

येँ (नेपालभाषा टाइम्स) – प्रधानमन्त्री केपी शर्मा ओलीं आइतवाः आकाझाकां सःतादीगु मन्त्रिपरिषद्या आकस्मिक बैठक छुं खास निर्णय मयासे क्वचायेकूगु खँय् मनूत अजूचाःसां प्रम ओलीं वकुन्हु वास्तवय् मन्त्रिमण्डल पुनर्गठन यायेगु हे ग्वसाः कथं आकस्मिक बैठक सःतादीगु खँ सीदुगु दु ।

आइतवाःया बैठकयात वर्तमान मन्त्रिपरिषद्या अन्तिम बैठक धासें सकलें मन्त्रीतय्त ‘धन्यवाद’ बिया छ्वयेगु व अनं लिपा हे न्हूपिं मन्त्रीतय् नां घोषणा यायेगु ताः तयाः वय्कलं उगु बैठक सःतादीगु खँ सूत्रं धाःगु दु। शुरुइ वय्कलं बैठक सःतादीगु बारे पार्टी अध्यक्ष पुष्पकमल दाहालं नं मसिउ। दाहालयात छुं पूर्व माओवादी मन्त्रीतय्सं आकस्मिक बैठक सःतूगु बारे जानकारी बीवं तिनि वय्कलं सिउगु खः ।

प्रम ओलीं मन्त्रिपरिषद् पुनर्गठन यायेगु ताः तयाः आकस्मिक बैठक सःतूगु धइगु खँ सीवं दाहाल तुरुन्त हे वालुवाटार वनाः मन्त्रिमण्डल पुनर्गठनया ज्या पनादीगु खः । वामदेव गौतमयात मन्त्री मजुइकेत अदालतय् मुद्दा लानाच्वंगु इलय् मन्त्रिमण्डल पुनर्गठन यात धाःसा वामदेवयात छखे लाकेगु लागिं हे उगु मुद्दा तयेकूगु धइगु अर्थ लगे जुइ धासें दाहालं ओलीयात पनादीगु खः ।

सूत्रं धाः कथं वकुन्हु मन्त्रिमण्डल पुनर्गठन जुयाः न्हूपिं मन्त्रीत वइगु जूगुलिं न्हूगु गाडीत तयार याना ति धकाः गृह मन्त्रालयया सम्बन्धित विभागयात सतर्क समेत यानातःगु खँ सीदुगु दु। राष्ट्रपति भवनयात धाःसा औपचारिक जानकारी मबिसे सम्बन्धित मनूतय्त ‘छुं जुइफु न्हि’ धकाः ‘हल्ला’ जक न्यंकातःगु खँ नं सूत्रं धाःगु दु ।