नेमकिपाया सचिवाल व प्रदेश कमिटी गठन

ख्वप – नेपाल मजदुर किसान पार्टी (नेमकिपा)या केन्द्रीय समितिया न्हापांगु बैठकं पार्टी सचिवालय व प्रदेश कमिटी गठन याःगु दु । पार्टीया नकतिनि क्वचाःगु न्हय्क्वःगु महाधिवेशनं निर्वाचित न्हूगु केन्द्रीय समितिया मंगलवाः च्वंगु न्हापांगु बैठकं पार्टी सचिवालय व प्रदेश कमिटी गठन याःगु खः ।

पार्टी अध्यक्ष नारायणमान बिजुक्छेँ रोहितया अध्यक्षताय् च्वंगु बैठकं न्याम्ह दुजः दुथ्याःगु सचिवालय गठन याःगु खः । सचिवालयय् प्रेम सुवाल, मोहनप्रसाद प्रजापति, सुनिल प्रजापति व नन्दबहादुर शाही च्वनादीगु दु । केन्द्रीय समितिया उगु बैठकं केन्द्रीय दुजलय् रविन्द्र ज्याख्वः व वैकल्पिक दुजलय् राजेन्द्र चवाल व नारायणबहादुर दुवालयात ल्यःगु दु ।

थुकथं हे बैठकं पार्टीया प्रदेश कमिटी नं गठन याःगु दु । प्रदेश कमिटी गठन धाःसां नं आःयात प्रदेशया संयोजक जक ल्ययेगु ज्या जूगु नेकमिपां जानकारी बिउगु दु । प्रदेश १ य् उकेश कवां, प्रदेश २ लय् सुरेन्द्रराज गोसाइ, प्रदेश ३ य् प्रेम सुवाल, गण्डकी प्रदेशय् दिल्लीप्रसाद काफ्ले, प्रदेश ५ य् हरिसुन्दर बासी, कर्णाली प्रदेशय् सरोजराज गोसाइ व सुदुर पश्चिम प्रदेशय् नन्दबहादुर शाहीयात संयोजककथं ल्यःगु दु ।
पार्टी अध्यक्ष बिजुक्छेँया छेँय् पत्रकार सम्मेलन यासें सचिवालय व प्रदेश कमिटी गठनया जानकारी बिउगु खः ।