आः ट्याक्सी चालकया लाइसेन्स निलम्बन

येँ – महानगरीय ट्राफिक प्रहरीं न्ह्याकूगु नियम माने मयाइपिंट्याक्सी चालकयात कारवाही यायेगु अभियानया तीव्र यानाहःगु दु । थ्व झ्वलय् ट्राफिक प्रहरी छवाःया दुने स्वसः स्वयां अप्वः ट्याक्सी चालकयात कारवाही याःगु दु । महाशाखां यातायात व्यवस्था विभागलिसे समन्वय यानाः नियमय् चले मजुइगु ट्याक्सी चालकया चालक अनुमतिपत्र (लाइसेन्स) निलम्बन यायेगु अभियान न्ह्याकूगु खः ।

वंगु मंसिर २० गतेनिसें न्ह्याकूगु नियमय् चले मजुइगु ट्याक्सीयात कारवाही यायेगु अभियान अन्तर्गत लगातार न्याक्वःतक कारवाहीलय् लाःम्ह चालकया अनुमतिपत्र खुलाया निंतिं निलम्बन याये फइगु कानुनी व्यवस्थाकथं थ्व महाशाखां थ्व अभियानयात तीब्रता बियाहःगु खः ।

महाशाखां विभागया समन्वयय् न्ह्याकूगु अभियान अन्तर्गत नियम अःखः ट्याक्सी चले याइपिं चालकयात अनुमतिपत्र निलम्बन यायेगु योजना कथं कारवाहीलय् लाःपिं चालकतय् अभिलेख नं तयेगु शुरु याःगु दु । महाशाखाया प्रवक्ता लिसें प्रहरी उपरीक्षक जयराज सापकोटां बियादीगु जानकारीकथं थ्व अभियानय् आतकया दुने ३०० स्वसः स्वयां अप्वः चालक कारवाहीलय् लायेधुंकूगु दु ।

वय्कलं बियादीगु जानकारीकथं आतकया दुने थ्व अभियानय् दकलय् अप्वः कारवाहीलय् लाःपिं ट्याक्सी चालक खाली जूसां यात्रुतय्सं धाःगु थासय् वनेत माने मजूपिं लाःगु दु । अथे हे वय्कलं धयादीकथं यात्रुतय्सं धाःगु थासय् वनेत माने मजूपिं १८९, अप्वः भाडा मोलमोलाइ याःपिं ९८, मिटर स्यंकूपिं व प्रयोजन अःखः प्रयोग याःपिं २० म्हेसित कारवाही यायेधुंकूगु दु ।

मंसिर २० गते लिपा कारवाहीलय् लाःपिं जक निलम्बनय् प्रक्रिया लाइगु जानकारी बियादिसें महाशाखाया प्रमुखलिसे वरिष्ठ प्रहरी उपरीक्षक वसन्तकुमार पन्तं न्याक्वः स्वयां अप्वः कारवाहीलय् लाःपिं ट्याक्सी चालकया अनुमतिपत्र हे निलम्बन जुइकथं विशेष अभियान न्ह्याकागु खः धयादिल । महाशाखां न्यय्म्ह स्वयां अप्वः सादा पोशाकय् प्रहरी परिचालन यानाः जरिवाना पुइकेगुया नापं अभिलेख नं तयेगु यानाहःगु खः ।