लैंगिक हिंसा विरुद्धया प्यंगू चीहाः संकिपा

येँ – जोन्टा क्लब अफ काठमाडौंपाखें लैंगिक हिंसा विरुद्धया प्यंगू चीहाः संकिपा निर्माण याःगु दु । लैंगिक हिंसा विरुद्धया १६ दिने अभियानया शुरुयालिसें क्लबं उगु संकिपा निर्माण याःगु खः ।

क्लबं निर्माण याःगु चीहाः संकिपाय् हिंसा, उत्पीडन, बाल विवाह लगायत गुगुं नं कथंया हिंसा सह याना च्वने मजिउगु व अज्याःगु हिंसा जुल धाःसा उकिया विरुद्ध सशक्त सः ल्ह्वनेमाःगु सन्देश बियातःगु दु ।

संयुुक्त राष्ट्र संघया लैंगिक हिंसा विरुद्धया १६ दिने अभियानलिसें क्लबं नं अभियान न्ह्याकूगु खः । बाल विवाह, घरेलु हिंसा, कार्यस्थल व सार्वजनिकस्थलय् जुइगु लगायतया हिंसा विरुद्ध सः ल्ह्वनेमाःगु खँय् बः बिसें क्लबं उगु अभियान न्ह्याकागु क्लबपाखें जारी याःगु विज्ञप्तीइ न्ह्यथनातःगु दु ।

‘गबलें गबलें जक मखु, गुबलें नं मजिउ’ धइगु नारा बियाः न्ह्याकूगु अभियानया झ्वलय् क्लबं नारालिसे ज्वःलाइकथंया प्यंगू चीहाः संकिपा नं निर्माण याःगु खः ।

क्लबं अभियानया हे छगू ब्वकथं येँया थीथी सार्वजनिक थासय् वइगु डिसेम्बर १ निसें लैंगिक हिंसा विरुद्धया सतक नाटक प्रदर्शन यायेत्यंगु दुसा क्लबं हिंसाय् लानाच्वंपिं मिसा व मस्तय्गु ग्याहालिया निंतिं यल महानगरीय प्रहरीया हेल्पलाइन व मेमेगु थीथी सामाजिक संघसंस्थालिसे जानाः थुकिया विरुद्ध सहकार्य नं याना वयाच्वंगु दु ।

सम्बन्धित बुखँ

LEAVE YOUR COMMENTS