नेकपायात चीनया प्रशिक्षण

येँ – चिनियाँ कम्युनिष्ट पार्टीया अन्तर्राष्ट्रिय विभाग प्रमुख सोङ पाओं जनताया सेवा बीगु हे कम्युनिष्ट पार्टीया मू आज्जु जुइमाःगु खँ धयादीगु दु । येँय् नेपाल कम्युनिष्ट पार्टीं ग्वसाः ग्वःगु प्रशिक्षण ज्याझ्वलय् न्ववासें वयकलं चिनियाँ राष्ट्रपति सी जिनपिङ विचारधारां जनतायात मू थासय् तइगु बिचाः नं तयादिल ।

चीन व नेपाः निगुलिं देशय् कम्युनिष्ट पार्टीया शासन दु धासें सोङं आः जनताया जीवनस्तर बांलाकेगु हे आज्जु जुइमाः धयादिल । वय्कलं कम्युनिष्ट पार्टीयात शुद्धकिरणय बः बीत नं इनाप यानादिल । वय्कलं धयादी, ‘झी आत्मक्रान्ति व शुद्धीकरण याये चाहे जू, कम्युनिष्ट पार्टीं जनताया हितय् जक मखु थःगु क्षमता अप्वयेकेगु व शुद्धीकरणय् नं बः बी ।’

चिनियाँ राष्ट्रपति सी जिनपिङ नेपाः वयेत्यंगु सन्दर्भय् वय्कःया बिचाः बारे नेपालय् नं विचार विमर्श शुरु याःगु खः । चीनं थगुने सीया बिचाःयात पिने देशय् नं प्रचार यायेगु धकाः निर्णय याःगु खः । चीनं थःगु देय्या राजनीतिक सिद्धान्तयात ‘चिनियाँ विशेषता सहितया कम्युनिष्ट सिद्धान्त’ धायेगु याना हःगु दु ।

मेखे विपक्षी नेपाली कांग्रेसं धाःसा सी जिनपिङया विचारधाराय् आधारित जुयाः चिनियाँ कम्युनिष्ट पार्टीया विदेश विभागया प्रमुखं प्रशिक्षण बिउगु ज्यायात आपत्ति प्वंकूगु दु । कांग्रेसं सी विचारधारा बारे प्रशिक्षण कायेगु ज्यायात राष्ट्रिय हित अःखः धकाः टिप्पणी याःगु दु ।

कांग्रेसया प्रमुख सचेतक बालकृष्ण खाँणं थ्व प्रशिक्षणया ज्यापाखें नेपाल कम्युनिष्ट पार्टी (नेकपा) यात चिनियाँ कम्युनिष्ट पार्टी (सीपीसी) या छगू भातृ संगठन दयेकेत्यंगु टिप्पणी नं यानादीगु
दु ।

सम्बन्धित बुखँ

LEAVE YOUR COMMENTS