यँयाः न्यायेकेत अक्षय कोष घोषणा
येँ – यँयाः पर्व सुथांलाक्क सञ्चालन यायेगु लागिं सरकारं ५ करोड तकाया अक्षय कोष पलिस्था याःगु दु। थाैं येँ महानगरपालिकाया ग्वसालय् जूगु छगू ज्याझ्वःया दथुइ संस्कृति, पर्यटन तथा नागरिक उड्डयन मन्त्री योगेश भट्टराईं उगु कोषया घोषणा यानादीगु खः ।
थ्व ५ करोड तका मध्ये २ करोड तका येँ मनपां तःगु खःसा संघीय सरकारया संस्कृति मन्त्रालयं १ करोड ५० लाख तका, प्रदेश सरकारं १ करोड तका व गुथि संस्थानं ५० लाख तःगु खः ।
घोषणा ज्याझ्वलय् न्ववासें मन्त्री भट्टराईं यँयाः पर्वलिसे सम्बन्धित व्यक्ति व खलः पुचः लिसें येँदेय् या सांसदतय्सं तःक्वःमछि धयाच्वंगु, जाति, भाषा, संस्कृतिया अभियन्तातय्संनं निरन्तर सः तयाच्वंगु व प्रधानमन्त्रीपाखें नं रुची क्यनादीगु कारणं सरकारं याकनं अक्षय कोष दयेकूगु जानकारी बियादिल ।
थ्व कोषया दां भविष्यय् आवश्यकता कथं थपे जुया नं वने फइ धासें वय्कलं थ्व कोष सञ्चालनया लागिं येँ महानगरपालिकाया मेयरया अध्यक्षताय् छगू समिति गठन जुइगु व छगू कार्यविधि नं दयेकीगु खँ कनादिल । मन्त्री भट्टराईं कनादी कथं थ्व अक्षय कोषया समितिइ संघीय सरकार, प्रदेश सरकारया प्रतिनिधि, इन्द्रजात्रा व्यवस्थापन समितिया अध्यक्ष, हनुमानढोका हेरचाह अड्डाया प्रतिनिधि, गुथि संस्थानया प्रतिनिधिपिं दुजः जुइगु व येँ मनपा सम्पदा तथा पर्यटन विभागया प्रमुख सदस्य सचिव जुइगु व्यवस्था दु ।
ज्याझ्वलय् न्ववासें येँ महानगरपालिकाया मेयर विद्यासुन्दर शाक्यं थ्व अक्षय कोष पलिस्था यायेत राष्ट्रपतिपाखें नं विशेष अभिरुची तयादीगु कारणं वय् कःयात नं सुभाय् बीमाः धयादिल ।
बिहिवाः थ्व कोष घोषणा याइगु जुइवं राष्ट्रपतिं थः लगायत इन्द्रजात्रा व्यवस्थापन समितिया नायः गौतम शाक्ययात शितल निवास सःताः थुकिया बारे उताः तयादीगु खँ नं वय्कलं कनादिल । राष्ट्रपतिलिसे वय्कःपिनि दथुइ करिब घौछि खँल्हाबल्हा जूगु खः ।
LEAVE YOUR COMMENTS