मोहनिया सुरक्षा – छु यायेगु छु मयायेगु
येँ (नेपालभाषा टाइम्स)÷उपत्यका प्रहरी कार्यालयं सर्वसाधारण जनतायात झिगू बुँदाया अपिल जारी यासें सचेत जुइत इनाप याःगु दु । नखःचखःया इलय् सुरक्षा सतर्कता नालाः थः, थःगु छेँजः, जःलाखःला, समाज व मुक्कं स्वनिगःयात सुरक्षित यायेगु अभियानय् ग्वाहालि यायेत नं प्रहरीं इनाप याःगु दु ।
कार्यालयया प्रवक्ता प्रहरी वरिष्ठ उपरीक्षक दिनेशराज मैनालीं सर्वसाधारणयात सचेतना व चनाखो जुइत अपिल यानागु खँ धयादीगु दु । वय्कलं लँय् जुइबलय् वा मेगु थासय् म्हमसिउपिं मनूतय्सं बीगु नसात्वँसा मनयेत नं इनाप यानादीगु दु ।
प्रहरीं दां, बहुमूल्य सामान, तिसा व थिकेगु मोबाइल फोन सहित हुलमुलय् फयांफछि मवनेत, छेँ व पसलं पिहां वनेमाःगु अवस्था छेँया झ्याः खापा बांलाक तिनागु दु मदु यकिन यायेत व फयांफछि साइरन दुगु ताःफ्वः जडान यायेत, ताः ई तक छेँ वा पसः त्वःताः पिने वनेमाःसा जःलाखःला व स्थानीय प्रहरीयात खबर यायेत इनाप नं याःगु दु ।
उकथं हे फयांफछि डिजिटल प्रविधिपाखें ध्यबाया कारोबार यायेत, मोबाइल बैंकिङया पासवर्ड न्ह्याबलें नं गोप्य याना तयेत, चेकं कारोबार यायेमाःगु अवस्थाय् थःगु एकाउन्टय् दुगु ध्यबा कथं चेक जारी यायेत, सामाजिक सञ्जालय् थःगु व्यक्तिगत विवरण व यात्राया विवरण अद्यावधिक मयायेत नं इनाप याःगु दु ।
उकथं हे लंगुरबुर्जा, तास, जू म्हितेगु थेंज्याःगु त्याःबू जुइगु कासा म्हितेबलय् छेँ–बुँ छखे लायेफइगु पाखें सचेत जुइत, मादक पदार्थ सेवन (मापसे), लागू पदार्थ सेवन (लापसे) यानाः सवारी चले मयायेत, ट्राफिक नियमया पालना यायेत नं प्रहरीं इनाप याःगु दु । अथे हे स्वनिगलय् तालिम बियातःपिं खिचा व ड्रोन तकं छ्यलाः स्वनिगःया सुरक्षा निगरानी अप्वयेकूगुलिं धुक्क जुयाः नखः न्यायेकेत नं इनाप याःगु दु ।
LEAVE YOUR COMMENTS