किपुलिइ बाघभैरवया लुँयागु मूर्ति

यल (नेपालभाषा टाइम्स)- किपूया बाघभैरव जात्राया न्हि लाकाः थौं बाघभैरव देगलय् लुँयागु मूर्ति पलिस्था याइगु जूगु दु । मूर्ति पलिस्थाया निंतिं शुक्रवाः मूर्ति दयेकूगु थाय् यलया लुँखुसिं निसें मूर्तियात जात्रा यानाः किपूया बाघभैरव देगलय् हःगु खः । किपूया गुँदे दापा खलः लिसें किपू देय्यापिं यलय् वनाः द्यः काःवंगु खः । बाजंसहित द्यः काःवंपिंत द्यः दयेकाः बियादीपिनि छेँजः व कालिगडपिंत सम्मान यानाः द्यःयात खतय् तयाः हःगु खः ।

क्रोधकला शिरोमणि कालु कुमालेया मदुम्ह काय वीरेन्द्र कुमार अवालेया लुमंतिइ अवालें हे नीस्वनातःगु ल्हामो ह्याण्डिक्राफ्टपाखें थ्व द्यः दयेकूगु खः । स्वंगू फिट तःधिकःम्ह थ्व द्यः झिंन्याम्ह नीम्ह कालिगडतय्सं दछि बिकाः दयेकूगु खः । किपूया बाघभैरव देगः जुजु शिवदेव तृतीयं द्वःछिदँ न्हयः स्थापना याःगु धाइ । थन देगलय् च्वंम्ह स्वर्ण भैरव शक्तिया मूर्तिया जात्रा दँय्दसं भाद्र संल्हूकुन्हु गुँदे दापा खलःया ग्वसालय् जुया वयाच्वंगु दु ।

थ्वहे दथुइ शुक्रवाः बाघभैरव देगः न्ह्यःने च्वंगु दानपेटी चायेकाः उकी तयातःगु ध्यबा ल्याःखायेगु ज्या जूगु दु । जनप्रतिनिधि, सरोकारवाला संस्थाया रोहवरय् दानपेटी चायेकूगु खः । दँय्दसं जात्राया छन्हु न्ह्यः थ्व दानपेटी चायेकाः ध्यबा लिकाइगु चलन दु ।