ह्रासोन्मुख अमेरिकी साम्राज्यवाद

धाइ धुँ, भालु, चितुवा, सिंह थेंज्याःपिं मेपिंत हत्या हिंसा याना जुइपिं जन्तुतय्गु ल्याः संसारय् झन् झन् म्हो जुजुं वनाच्वंगु दु । इमुचा, सापेंचा, कस्ति हा नापनापं थवंथः मिले जुयाच्वनीपिं आपालं जीब जन्तुया ल्याः थ्व संसारय् झन्झन् अप्वः जुजुं वनाच्वंगु दइ । पाय्छि अथेहे थौं मेपिंत गथे यानाः जिल अथे यानाः क्वत्यलाः, हायेकाः ख्वयेकाः जुइगु विश्वया एक नम्बर देय् अमेरिका पतनपाखे वनाच्वंगु दु ।

थवंथः मिले जुयाः थःगु व मेपिनिगु नं अस्तित्वया लागिं जुयाच्वंगु राष्ट्र चीन, क्यूवा, उत्तर कोरिया, भियतनाम लगायतया समाजवादी मुलुकत धाःसा न्हियान्हिथं विकसित जुजुं वनाच्वंगु दु । थ्व धइगु गौतम बुद्धया कथं वा स्वयां म्येचया आयु अप्वः दु धइथें खः । छाःगु बस्तु छक्वलं विनाश जुइ, क्यातुगु बस्तु धाःसा ताः ई तकं तुयाच्वनी ।

गौतम बुद्धं थःगु ८० दँया बैसय् थ्यनेधुंकालिं थः उपासक उपासिकातय् न्ह्यःने छुं हे न्वमवासें आँ याना वां खायाच्वन । उगु इलय् फुक्कं वाल्ल च्वनाच्वन । अलेछाय् छिमिसं मथूनिला धकाः न्ह्यसः न्यन । लिपा थःम्हेसियां लिसः बियाबिज्यात कि जिगु वा छाःगु जूगु कारणं आः छपुं मदये धुंकल । तर क्यातुगु म्येचः धाःसा आः तकं मस्यंनि ।

थथे सु गुलि छाइ वयागु आयु, अस्तित्व उलि हे म्हो जुयाच्वनी । वयात मस्यंका तयेत तसकं हे थाकुइ । स्यंकीपिं, व स्वयां बल्लापिं नं पिहां वयेधुंकी । अमेरिकी साम्राज्यवाद, बेलायती उपनिवेशवाद वा पश्चिमी शैलीं धमाधम मनूतय्त आजित यानाच्वंगु कारणं थ्व संसारय् इमि बिरुद्ध उलि हे बल्लाःगु शक्ति नं विकास जुजुं वनाच्वंगु दु ।

शान्तिया नारा थ्वयेकाः थ्व विश्वयात हैरान यानाच्वंगु गुलिं शक्ति आः पत्तासाफ जुजुं वनाच्वंगु दु । थ्व धइगु छाःगु बस्तु अप्वः टिके जुइ फइमखु धइगु सिद्धान्त खः । संयुक्त राज्य अमेरिकां नं थःपिनि ५० गू संघीय प्रान्तयात बल्लाकेगु वा सवल यायेत लगानी यायेगु स्वयां विश्वया थीथी राष्ट्रय् अमेरिकी सेना तैनाथ यानाः उमित नकेगु, त्वंकेगु व पुंकेगु बन्दोबस्त यानाः विशेष कथं तया तयेमाःगु स्थिति दु ।

अमेरिका वा मेमेगु साम्राज्यवादी देय्या नागारिकतय्त अन प्रवेश हे याकातःगु मदु । थौं छु देसय् छु आवश्यक खः उकियात पूर्ति यायेगु ज्या समाजवादी देय् चीन, कोरिया, लाओस, भियतनाम आदि देसं यानाच्वंगु दु ।

छाय्कि वयात थः संसारय् एक नम्बरया देय् तायेके मालाच्वंगु दु । छगू इलय् युद्ध त्याकूगु कारणं व एक नम्बर देय् नं जूगु खः । तर खर्च अप्वया वंगु व सेनायात पालन पोषण व भरण पोषणय् जक करोडौं मखु कि अरवौं डलर खर्च याये मालाच्वंगु कारणं विकास व उन्नतिया खँ स्वयां थःगु शानया लागिं आर्थिक अपब्यय जुजुं वनाच्वंगु दु ।

थज्याःगु अनुत्पादक ज्याय् लगानी अप्वः जुयाच्वंगु कारणं म्हिगः विश्वया एक नम्बर धाःगु थ्व देय् थौं झन्झन् ह्रास जुजु वनाच्वंगु दु । थ्व मामला अमेरिकाया लागिं जक मखुसें विश्वया मेमेगु साम्राज्यवादी देय् धाःगु मुलकतय्सं नं न्हापा हे सामना यायेधुंकूगु खँ खः । छगू इलय् चीन नापं तसकं दुश्मनी नालाच्वंगु जापानी साम्राज्यवाद नं अज्याःगु हे गति जूवंगु खः ।

लिपा जक वं थःगु पलाः खःगु लँपुइ वा थासय् यंकेगु स्वत । आः जापान उन्नतिया लँपुइ वनाच्वंगु दु । अन बुराबुरी जक लहीगु ज्याय् पिनेयापिं मनूत दुकायेगु यानाच्वंगु दु । अमेरिका वा मेमेगु साम्राज्यवादी देय्या नागारिकतय्त अन प्रवेश हे याकातःगु मदु । थौं छु देसय् छु आवश्यक खः उकियात पूर्ति यायेगु ज्या समाजवादी देय् चीन, कोरिया, लाओस, भियतनाम आदि देसं यानाच्वंगु दु ।

उकियात पनेगु लागिं अमेरिकां थीथी कथंया षडयन्त्र नं यानाच्वंगु दु ।भियतनाम, क्यूवा, उत्तर कोरिया नापं चीन थेंज्याःगु समाजवादी देय् विरुद्ध अमेरिकी साम्राज्यवादी शक्तिं प्रतिवन्ध वा आर्थिक नाकाबन्दी तयातःगु ताः ई दयेधुंकल । तर आत्मनिर्भर जुयाः मेपिनि सामान तकं थःगु देसय् दुत महःसें नं गुलिं समाजवादी देय्त चले जुयाच्वंगु दु ।

बरु पूँजीवादी प्रतिस्पर्धाय् लानाच्वंपिं देय् थवंथः अस्वस्थ प्रतिस्पर्धाया कारणं धराशायी जू वनाच्वंगु आपालं दसुत दु । जर्मन चान्सलर स्वयमं हे आः ट्रम्प थेंज्याःम्ह मित्र चूलायेवं शत्रु मालेत गनं वनेम्वाः धइगु टिप्पणी यानाः छगू पूँजीवादी देय् विरुद्ध मेगु पूँजीवादी देसं उलि हे कडा प्रतिस्पर्धा जूगु उदाहरण प्रस्तुत यानाच्वंगु दु ।

अथेला अमेरिकां गबलें नं मेपिंत भिंकेगु वा जिइकेगु स्वःगु उदाहरण हे मदु धाःसां छुं पाइमखु । उकिं नं अति विकसित न्हय्गू देय् वा ग्रेट सेभेन मुलुकय् नं अमेरिकी साम्राज्यवादया विरोध जू ।आः नकतिनि हे जक चीन व अमेरिकाया दथुइ सुरु जूगु अन्तःशुल्क अप्वयेकेगु खं नं हाकनं छक्वः अमेरिकी साम्राज्यवादी देय्या सक्कली ख्वाः उलाः क्यनाबिउगु दु ।

चीनं अमेरिकाय् हइगु सामानय् अन्तःशुल्क अप्वयेकेवं छगू ल्याखं ब्यापार युद्ध सुरु जूगु तायेकूगु दु । ब्यापार, आर्थिक लेनदेन व थीथी कथं आर्थिक सुधारया लागिं न्ह्यचिलाच्वंगु चीन थेंज्याःगु देय्या लागिं थ्व अमेरिकी नीति छगू ल्याखं ब्यापार युद्ध हे तायेकूगु दु । ब्यापार युद्ध कन्हय् वनाः राजनीतिक वा कुटनीतिक युद्ध कथं हिला वनेफुगु खँय् नं थनया मनू सचेत जुयाच्वंगु दु ।

उकिं आः हे चीन समर्थक गुलिं देय् व अमेरिकायात साथ बियाच्वंगु गुलिं साम्राज्यवादी मुलुकतय्सं उकियात समर्थन नापनापं आलोचना यायेगु यानाच्वंगु दु । उत्तर कोरियायात छुं कथं सामान मछ्वसें नाकाबन्दी तयातःगु अमेरिकी नीतिया कारणं नेपालय् उत्तर कोरियां वयाः लगानी अप्वयेकूगु संस्था वा ब्यक्तियात याकनं थःपिनि उत्पादन मिया वा मेपिंत बियाः पिहां वनेत नेपाल सरकारं नोटिस जारी यानातःगु दु ।

अथेहे विश्व न्यंकं साम्राज्यवादी शक्तिया प्रभाव लाकेत्यंगु थासय्कि उकिया बिरोध कि उकिया समर्थन यायेगुलहर सुरु जूगु दु । थ्व ब्यापार युद्ध कन्हय् वास्तविक आणविक युद्ध वा तनावय् हिलेफुगु सम्भावना दु ।थुकथं म्हिगःया ब्यापार साझेदारी थौं ब्यापार युद्धय् परिणत जुयाच्वंगु अवस्था दु ।

विकास निर्माणय् लगे जुयाच्वंगु क्यूवा, उत्तर कोरिया थेंज्याःगु समाजवादी देय्या समर्थन दुगु चीनं विश्वय् एक नम्बर आर्थिक हैसियत कायम याइगु खँया प्रक्षेपण जूसानिसें अमेरिका ग्यानाच्वंगु खः । तर आः चीनयात विश्वया एक नम्बर देय् यायेगु ज्यां सुनानं पने फइगु अवस्था मदये धुंकल । छुं दँ लिपा हे विश्वय् नम्बर एक साम्राज्यवादी देय् अमेरिकां आः चीन जुइगु खँय् धुक्क जूसां छुं पाइमखु ।

सम्बन्धित बुखँ

LEAVE YOUR COMMENTS