निर्वाचन व राष्ट्रिय मामला

म्हिगः पंचायतीकालय् जनतायात थ्व याना बी व याना बी धकाः नानाभाँतीया आश्वासन बियाः मत संकलन याइगु खः । आः नं उगु हे कथं मत संकलन यायेगु ज्या तःधंगु राजनीतिक पार्टीतय्सं यानाच्वंगु दु । अथे जुया हे खइ, निर्वाचन आयोगं सारी इने मदुगु, तिसा इने मदुगु व मोबाइलया सेट व सिम कार्ड इने मदुगु कथं आचारसंहिता दयेकातःगु दु ।

न्हापा छगू कथं बिकृति व विसंगति खने दइगु खःसा आः मेगु हे कथं नं थ्व बिकृति सुरु जूगु कारणं उकथं हे बिकृति बिरुद्ध मनूतय्त सचेत व संगठित यायेमाःगु अवस्था ब्वलनाच्वंगु दु । थौं स्वयां पीदँ न्ह्यः ख्वपय् कर्णप्रसाद ह्योजूं २०३८ साल बैशाख २७ गते जूगु निर्वाचनय् थः निर्वाचित जुइत नं अथेहे जनतायात मजुइगु आश्वासन बिउगु खः ।

उगु इलय् थःगु निर्वाचन चिं ल्हाःपाय् छाप तयेत इनाप याःगु इलय् कर्णप्रसाद ह्योजूं थः त्यात धाःसा प्रत्येक छेँय् छगः छगः टेलिफोन तयाबीगु आश्वासन बिउगु खः । उगु इलय् तक ख्वपया लाय्कू लागाय् पुलांगु बालमन्दिर भवनय् छगःयां छगः जक डायल यानाः ई कथं दां पुलाः फोन यायेमाःगु टेलिफोन दुगु खः ।

मनूतय् आवश्यकता कथं शासक व दल जुइत ताःलापिं तःधंगु राजनीतिक दलतय्सं उकथं जनतायात ध्वँ लायेगु उपाय नालिगु नं पुलांगु राजनीतिक संस्कार खः । थ्व पंचायती शैली खः धाःसां छुं पाइमखु । छगू इलय् मिसा मदुपिंत मिसा, तिसा मदुपिंत तिसा धकाः नारा थ्वयेकाः पंचायती शैली नाला एमाले, कांग्रेस सत्ताय् थ्यंगु खः ।

आः ख्वपय् जुइत्यंगु उपनिर्वाचनया झ्वलय् जुयाच्वंगु चुनाव प्रचारया शैली स्वयेगु इलय् हाकनं छक्वः पंचायती भूत झीगु न्ह्यःने दनावःगु खःला धइगु महसुस जूगु दु । व नं सत्ताशीन राजनीतिक दलया प्रतिनिधितपाखें हे । पंचायतीकालय् गथे ‘छ त्यात धाःसा मन्त्री याये’ धाधां जनतायात लोभ क्यनाः उम्मेदवारयात मत फ्वनेत सत्तासीन मनूत उद्धत जुइगु खः ।

थ्व इलय् नेकपाया केन्द्रीय स्तरया नेतात स्वयम नं उकथं गलत आश्वासनय् तक्यनाच्वंगु दु । थाय्थासय् लँ दयेका बीगु खँ, करोडौं करोडया बजेट हयाबीगु खँ व आः हे नं यदि जिमि उम्मेदवार त्यात धाःसा वयात फलाना मन्त्री दयेकेगु ढिस्कना मन्त्रालयया जिम्मेवारीया ग्यारेन्टी जुल धकाः पुलांम्ह गृहमन्त्री थेंज्याःम्ह अति जिम्मेवार राजनीतिक नेतातय्सं तकं जनतायात ध्वँ लायेत्यंगु दु ।

छगू इलय् मिसा मदुपिंत मिसा, तिसा मदुपिंत तिसा धकाः नारा थ्वयेकाः पंचायती शैली नाला एमाले, कांग्रेस सत्ताय् थ्यंगु खः । आः ख्वपय् जुइत्यंगु उपनिर्वाचनया झ्वलय् जुयाच्वंगु चुनाव प्रचारया शैली स्वयेगु इलय् हाकनं छक्वः पंचायती भूत झीगु न्ह्यःने दनावःगु खःला धइगु महसुस जूगु दु ।

यदि करोडौंया बजेट हयेगु ज्या याइगु खत धाःसा आः तकं नगरकोट वनेगु लँ दयेके मफुगु छु जुयाः ? प्रचण्डया हे घरबेटी जुयाच्वंम्ह ठेकेदारं हे अज्याःगु ज्या यानाच्वंगु दु । चुनाव त्ययेकाः निन्हुति खः थें न्यंकाः निगः स्काइभेटर हयाः आः ला सत्तासीन दलं विकास यायेत्यंगु खःला धइगु खँ वाः चायेकाः जनताया मिखालय् धुलं छ्वाकेगु ज्या यानाः विकासे आश्वासन लिसें विकासया क्यनेजा यानाच्वंगु स्थिति दु ।

इलामय् झलनाथ खनाल, सुवास नेम्वाङपिंसं नं चुनावया निला प्यला न्ह्यः डोजर खने दयेकाः छगू निगू सार्वजनिक व निजी जग्गाय् लाःगु पहाड थुनेगु वा बिजुलीया थां धस्वाकेगु ज्या यानाजूगु व आः तकं अन न बिजुली वं न गाडी वंया स्थिति कायम जुयाच्वन तिनि । थथे सत्ताय् थ्यंपिसं सत्ताया दुरुपयोग यानाः चुनाव त्याकेगु प्रबृत्ति झीथाय् पंचायती कालंनिसें आः तकं कायम जुयाच्वंगु दु ।

विकास धइगु भाषण बियां वइमखु । न त आश्वासन बियां हे जक वइ । जनतायात सचेत व संगठित यानाः जनता थःम्हेसियां हे छुं याना क्यन धाःसा उकि सरकारं साथ बिल धायेवं निति धात्थेंया विकास जुइ । थन ला जनतायात थुइकेगु व सिइकेगु अवसर बीगु पलेसा पूर्ण रूपं हे ज्ञान व विज्ञानं बञ्चित यानाः मिखा पिइकाः व कनाच्वंगु मिखाय् धुलं छ्वाका हे जूसां बलजफ्ती जनमत थःपिंके लाकेत स्वइ ।

भ्वय् नकेगु, सारी इनेगु, साइकल व प्रेसर कुकर इनेगु ज्या यानाच्वनी । थ्व निर्वाचन आचारसंहिता अःखः ज्या खः । वास्तवय् थथे निर्वाचन आचार संहिताया उल्लंघन यानाः चुनाव प्रचार याना जुइपिं उम्मेदवारतय् उम्मेदवारी हे रद्द यायेमाःगु खः । तर सरकारं अज्याःगु पहल यानाच्वंगु मदुनि ।

निर्वाचन आयोगयात तकं थःपिनि मातहतय् तयाः उगु राजनीतिक पार्टी सत्ताया दुरुपयोग यानाच्वंगु दु । छगू स्वायत्त संस्था निर्वाचन आयोगयात सत्तां कय्कुंका तःगु दु । अले निर्वाचन शिक्षा बीपिं पार्टी कार्यकर्ता हे छ्वयाः थःपिनिगु राजनीतिक पार्टीं धाःथें हे वा छगू निश्चित राजनीतिक दलया प्रचार यायेत वइपिसं थें यानाः फलाना चिन्हय् थथे छाप तयाः थथे मतपत्रयात लथ्यायेगु धइकथं शिक्षा बियाच्वंगु दु ।

निष्पक्ष व सकसितं सचेत यायेगु कथं शिक्षा बिउगु मदुनि । थ्व इलय् ला राजनीतिक एजेण्डा दयेकेगु खःसा राष्ट्रियताया सवाल व सिमा अतिक्रमणया बिरोध यायेगु विषययात राष्ट्रिय एजेण्डा दयेकेमाःगु खः । ताः ई न्ह्यःनिसें भारतं नेपाःया भूमि अतिक्रमण यानाः अन भारतीय सेना हे तैनाथ यानातःगु खँय् सरकारया निन्दा यानाः सरकारं उकि सबल व सक्षम पहल यायेत दवाब बीकेगु निंतिं उपनिर्वाचनयात माध्यम दयेके फयेकेमाःगु खः ।

तर न छुं राजनीतिक नेतां शासकतय् कमजोरीयात उकथं ब्यक्त यानाच्वंगु अवस्था दु । न त शासक दलतय्सं हे थथे हे यानाः उगु भूमि सम्वन्धी समस्यायात ठोस रुपं समाधान याये धइगु लँपुइ थ्यंकेफुगु दु । थथे स्वयेगु इलय् थः नेतातय्सं महाकाली सन्धी, कालापानी मामला थें राष्ट्रियताया सवालय् मौन च्वनेगु अले विद्यार्थी व ल्याय्म्हतय्त ग्वाकेगु थेंज्याःगु नाटक जक न्ह्यब्वयाच्वंगु खनेदु ।

थ्व इलय् नियमित रुपं सिमाया निगरानी यायेगु व नेपाल व भारत छथाय् च्वनाः निर्धारण याये ल्यंदनिगु सिमा क्वछिये फःसा दीर्घकालीन रुपं समस्या ज्यंकेफइ । चुनाव थेंज्याःगु जनता न्ह्यःने दनेत वइगु व नेतातय् खँ न्यनेत वइगु इलय् हे झीसं जनतायात थःगु मातृभूमि, सिमाना व अतिक्रमित भूभागया बारे सचेत याये मफुत धाःसा गब्ले झी राष्ट्रियताया सवालय् खँ ल्हायेगु ?

प्रधानमन्त्री ओलीं भारतं अतिक्रमण यानाच्वंगु थाय् त्वःतकां त्वते धयाच्वंगु इलय् प्रमुख प्रतिपक्षी दलया नेतां धाःसा प्रधानमन्त्रीया सहमति मदयेके गथे भारतं उकथं नेपाःया भूमि भारतया नक्साय् लाकाः न्हूगु नक्सा पित हइफइ धकाः न्ह्यसः थनाच्वंगु दु । चुनाव जुइवं हे राष्ट्रिय मामलय् बायेमजिउ ।

सम्बन्धित बुखँ

LEAVE YOUR COMMENTS