नेपाल बहुराष्ट्रिय राज्य हे खः

छगू हे भाय्, छगू हे संस्कृति, छगू कथंया मनोविज्ञान व खास भूगोल दुपिं मानव समुदाययात राष्ट्र धकाः धायेगु यानावयाच्वंगु दु । तर राष्ट्र धकाः मान्यता बिल धायेवं इमिगु राज्य नं माली धइगु अन्तर्राष्ट्रिय मान्यताया खँ खः । अंग्रेजतय्गु इंग्ल्याण्ड, जर्मनतय्गु जर्मनी, फ्रेञ्चतय्गु फ्रान्स जक मखु भारतय् बंगालीतय्गु बंगाल, पंजाबीतय्गु पंजाब, मराठीतय्गु महाराष्ट्र दु । वास्तवय् नेवाःत नं छगू राष्ट्र खः व नेपाः नेवाःतय्गु देय् खः । अथे जुयाः हलिमय् राष्ट्रराज्य अर्थात् नेसनस्टेटया सिद्धान्त न्ह्यानावयाच्वंगु दु ।

मगरात, तमुवान, लिम्बुवान आदिया अस्तित्व न्हापा दु । मिथिलाया अलग अस्तित्व दुगु खः । उगु थाय् वास्तवय् नेपाः मखु, नेपाल मण्डलया नांयात हे विस्तार यानाः नेपाः धयातःगु खः । वास्तवय् आः नेपाःया थीथी राष्ट्रतय्सं सार्वभौमसत्ता सम्पन्न राज्य मखसें प्रदेश स्तरय् राज्य फ्वंगु खः अले सकल प्रदेशया संघया रूपय् नेपाःयात संघीय राज्य दयेकेगु धाःगु खः । तर राज्यय् छगू जातिया हे हालिम्वाःलि न्ह्याका च्वंपिं जाति वा राष्ट्रया नितिं थ्व खँ मान्य मजू । थुकिं इमिगु हालिम्वाःलि तनी । थ्व हे खनाः इपिं ग्याःगु खः ।

आः नं स्वयेबलय् खँय्तय्गु छगू मनोविज्ञान, जनजातितय्गु छगू मनोविज्ञान व मधेसीतय्गु छगू मनोविज्ञान ला स्पष्ट प्रकट जुयाच्वंगु हे दु । आपाः नेवाःत हे थ्व खँ मथुयाः एकलजातीय आधिपत्य कायम यानाच्वंपिनिगु प्रचारया लिउने ब्वाँय् वनाच्वंगु दु । थुकिं यानाः नं एकल जातीय वर्चस्व तयावयाच्वंपिं बल्लाना वनाच्वंगु दु ।

सरकारय् उपप्रधानमन्त्री जूम्ह राजेन्द्र महतों खँ पिकायेवं थ्व खँ हानं छक्वः चर्चाया विषय जुल । थुकथं चर्चाया विषय दयेकाबिउगुली वय्कःयात सुभाय् धाये हे माः । तर राजेन्द्र महतो थृुज्वःम्ह मनू थ्व खँया तछ्याइम्ह नेता जूगु धइगु झी सकसिंगु कमजोरी खः ।

सम्बन्धित बुखँ

LEAVE YOUR COMMENTS