अबु–काय्या टीम

कलाकार हरिप्रसाद शर्मा कुशल कलाकार ला खः, तर वय्कःया कलाय् इतिहास, संस्कृति, सम्पदा व वास्तुकलाया रंगं जायेकादीम्ह मेम्ह हस्ती धाःसा स्वयम् वय्कःया काय खः, प्राध्यापक बिष्णुप्रसाद शर्मा । अबु हरिप्रसाद शर्मायात किपा च्वयेगु लागिं ग्वाकेगु व माःगु तकया ग्वाहालि यानादीम्ह भाजु बिष्णुप्रसाद शर्मा अध्ययन व अनुसन्धानया यायेगु धाल कि न्ह्यचिलीम्ह ।

किपा च्वये न्ह्यः दकलय् न्हापांवय्कः अबु–कायया दथुइ नं खँल्हाबल्हा जुइ । खँल्हाबल्हापाखें छगू थीम तयार जुइ । उकिया लागिं गनयागु दृश्य कायेगु धइगु खँ जुइवं निम्हं उगु थासय् वनी । विभिन्न एंगेलं किपा कायेगु ज्या जुइ । अले उकिया लागिं रिसर्च शुरु जुइ । रिसर्चया भाला काय् बिष्णुप्रसादया ब्वहलय् वइ ।

वय्कलं उगु विषयलिसे सम्बन्धित विशेषज्ञत नापलानादी, गनं वनाः सफू कायेमाःसा सफू कया हयादी, ब्वनादी, अले अबुयात उकिया डिटेल कनादी । अबु हरिप्रसाद शर्मां उकिया हे आधारय् थःगु सिर्जना न्ह्याकादी । छपाः किपा च्वयेगु लागिं वय्कःपिंत २०–२५ गू ति रिफरेन्स माली । उकिं थ्व पेन्टिङ च्वये अःपु मजू ।

गथे कि ब्वज्याय् ब्वयातःगु लुम्बिनीया छपाः पेन्टिङ च्वयेगु लागिं वय्कलं रिसर्चय् हे प्यदँ बियादिल । छाय्धाःसां लुम्बिनीइ सम्राट अशोक थःहे सवारी जूगु दृश्य उकी दु । थ्व छपाः दृश्य च्वयेगु लागिं वय्कःयात तत्कालीन लुम्बिनी गय् च्वं, अन च्वंपिं मनूत गय् च्वं, उमिसं पुनीगु वसः गथे च्वं, अशोकया पोशाक गथे च्वं, वया सेनामेनाया वसः गथे च्वं, सल गज्याःपिं खः, आदि फुक्क हे सीकेमाःगु जुल ।

थौं स्वयां निद्वःदँ न्ह्यःया परिवेश कल्पना यायेगु अःपुगु ज्या मखु । थःत माःगु फुक्क खँ गनं च्वयातःगु नं लुइ मखु । उकिं तःथाय् वनाः माले माःगु जुया बी । प्यदँ ति अध्ययन अनुसन्धान यायेधुंकाः चित्र च्वयेगु अवस्था तयार जुल । चित्र च्वःबलय् लगातार ११ महिनाया ई काल ।
आः नं अथे हे जुयाच्वंगु दु ।

छुं न्हूगु चित्र च्वयेगु खँ जुल धाःसा च्वयेगु ज्या स्वदँ लिपा तिनि शुरु जुइ । व स्वयां न्ह्यः किपायात माःगु वातावरण मालेत रिसर्च याये माली । थ्व यथार्थय् आधारित कला जूगुलिं फ्रेम जक बांलानां मगाः, उकी दुने च्वंगु तथ्य नं पक्का जुइमाः । यदि गलत जुल धाःसा उकी विवाद वयेफु ।

कलाकारिता उत्कृष्ट जूसां नं तथ्य फरक जुल धाःसा उकी आलोचना वयेफु । उकिं नं किपा स्वयां नं उकिया ऐतिहासिक पक्षयात कयाः अप्वः अध्ययन याये मालीगु खः । थ्व ज्याय् पूवंक हे काय बिष्णुप्रसाद शर्मा न्ह्यचिलादी । थुकथं किपा च्वयेबलय् थौं ज्या न्ह्याइ, स्वदँ लिपा तिनि च्वयेगु शुरु जुइ । गबलें गबलें किपा च्वयेगु ज्या नं जुयाच्वनी, अनुसन्धान नं जुयाच्वनी ।

सम्बन्धित बुखँ

LEAVE YOUR COMMENTS