आः गरिबमान मखु, अमीरमान जुयादिसँ

#हृदयप्रसाद मिश्र

संसार धयागु न गज्जब हे खः खनि बाऽ । गुम्हं न्याकं धनी, गुम्हं गाक्कं गरिब । गुम्हं तसकं विद्वान, गुम्हं तसकं मूर्ख । गुम्हं साप बांलाः गुम्हं स्वये हे मजीक बांमलाः । गुम्हं तसकं लम्बु, गुम्हं तसकं चम्बु । गुम्हेस्यां तसकं सुख, गुम्हेस्यां साप दुःख । धाथें हे थ्व संसार अजीब हे खनि बाऽ ।

गय् अथे जूगु जुइ हला ? गुम्हेस्यां छछाः प्वाः जायेक नयेत हे ध्यबा मदु, गुम्हेस्यां तयां तयेथाय् हे मदयक ध्यबा दयाः थःगु देशय् जक मन्ह्यनाः विदेशय् वनाः तकं ध्यबा तःवनी । थ्व गथे जूगु ? मनू जुसेंलि सकलें उथें जुइमाःगु, समान जुइमाःगु मखुला ? मनू मनू हे गय् पात धयागु बिचाःया घःचाः चाःहिइकुकुं तरकारी न्यायेत लँय् वनाच्वनागु तःदँ लिपा छम्ह पासा ध्वदुक्क नापलात ।

पासां जितः खनेवं हे धाल, ‘ओहो छ ला न्हापा गपाय्सकं स्वये जिउम्ह आःला छु जूगु ? गपाय्सकं जक स्वये मजिउगु, छु जुल छंत ?’
खासा पहलं न्ह्यसः तःम्ह उम्ह पासाया खँ न्यनाः मान्चोसा जिगु तं ला छथुं हे गाक्कं चार्ज जुयाबिल धयां । अयनं तःदँ लिपा नापलाःम्ह जूगुलिं जिं तँयात हाकनं रिचार्ज धाःसा मयाना ।

खँ ल्हाःगु स्वरे । गपाय्सकं स्वये मजिउ हँ का । सुनां मस्वः जितः ? लँय् वनेबलय् तकं गुलि ल्यासेतय्सं स्वयावनी जितः । अजं गुम्हं गुम्हं ला वास्याक्क न्हिलाः तकं वनी । स्वये मजिउगु जूसा स्वयावनी ला ? उकिसनं भूतप्रेत ला जि स्वये हे मजीत । जिगु तं ला डबल चार्ज जूगु खः, अय्नं जिं म्वाःल धकाः डिस्चार्ज यानाः धया, ‘छु याये पासा, सर्वसाधारण नेपाःमि व गरिब जुयाः म्वाये थाकुयाच्वन का थन ।

थः ला किसि थें तःधिकःम्ह मखुसें छुँ थेंज्याःम्ह लात । अले ला मेपिनिगु ला छु खँ कलाःचां तकं हे थःत अजिंगर भाःपाः झीत झतिंगर धाइगु धयां । छक्वः निक्वः ला जितः रानीपुखुली हे क्वब्वानाः सिना वने ला धयाथें तकं हे मती लूगु खः । अय्नं अन लः हे मदु छु याये ?
जिगु खँ न्यनाःलि थारं दनाः उम्ह पासां थःगु पथूम्हगु जँ तियाः जितः क्वंनिसें च्वय्तक स्वयाः जिउजिउगु थाय् खन दुदुथाय् छक्वः क्वथीक स्वल । जिं नं वयात स्वया ।

न्हापा पथू थ ज्वःगु म्हयाम्ह आः ला स्प्रीङ्ग रोल थें का थपाय्मछिं ग्वारा । न्हापा चप्पलचा न्ह्याना जुइम्ह आः ला सान्दारगु न्हाय्कं थें तिलिक्क तल्के जूगु लाकां । न्हापा पुली गूगु पाइन्ट व गःतां हाकुगु लं फिना जुइम्ह आः ला सुटेड बुटेड, न्हापा न्ह्याथाय् वनेमाःसां तुति गया जुइम्ह आःला करोडौं वंगु गाडी, अझं वयागु पहःचहः स्वयेबलय् ला एयरपोर्ट तक वनेमाःसा हे जामय् मलायेमा धकाः हेलिकप्टर गया जुइम्ह ख्वाः वः ।

वयागु पर्शनालिटिी ला धरोधर्म पुन्हिया चन्द्रमा थें हे जहाँ थी धयां । थपाय्सकं गय् यानाः दां कमे यात ? थः ला अनं न्हिछिं प्वाःफुस्लुं यानाः ‘दान्छिया आलु, दान्छिया पालु निदाँया मल्भता’ धकाः म्यँे हाला जुइमाः । रंग नं धंगया ब्यंग्य च्वयाः दंग जुइमाः, छु याये धकाः घौपलख मन्ह्यसें पुकुपुकु कू न जक नयागु, उम्ह पासां अय् छाय् चिनःम्ह खा थें छ्यं क्वछुकाः त्वलं च्वनागु धकाः न्यंगु न्ह्यसलं नेपाःमितसें न्हापा भोट बियाः गल्ती याये लात धकाः महसुस यानाः आः झसंग जू थें जि नं झसंग जुल ।

अले जिं थःत सम्हाले यासें धया, ‘मखु मखु छुं बिचाः यानागु मखु । बरु छता खँ छं थपाय्सकं उन्नति प्रगति गथे याना भाइ ? न्हापा ला छ नं जि थें ल्हाः व म्हुतुया ट्रेजिडिम्ह मनू खः । छथुं चमत्कार गथे जुल ? जितः नं कनाबिउसा जिगु दुःख नं तनावनाः जिगु नं कल्याण हे जुइगु जुइ ।छंत खँ सुचुकेमाःगु छु दु धकाः ।

जि ला काय् म्ह्याय्यात ब्वंकेत व कलाःया माग कथंया पर्सि छत्वाः न्यानाबीत हे चिठ्ठां लाकेमाः थें जुयाच्वन धयां । जिं न्हिछिं हे अल्सि मचासे ल्हाः तुति चुत्तुचुलाः च्वनागु दु, अय्नं हे थः चिधंम्ह मनू जूबलय्… ।

जिगु खँ पूवने मलावं हे मौकाय् चौका ह्वानाः लौका खायेसःम्ह जूगुलिं हे मांबौ नं अवसरलाल धकाः नां तयातःम्ह पासां छ्वाराक्क धायेक म्हुतु चायेकल, ‘आम्थे ल्हाःतुति चुलेवं प्यनय् मचिकं लाःम्ह खिचाथें उखेंथुखें बेतोडं ब्वाँय् वनेवं जक जी ला, चुत्तुचुल कि ला ल्हाःतुति झन जकं ज्यलावनी का ।

थन स्व साधारण मनू जुतले न्ह्याक्व मेहनत परिश्रम याःसां महेन्द्रपुल गालय् हे जक जुइ, सगरमाथाया च्वकाये थ्यने फइमखु । सुखया सगरमाथा च्वकाय् थ्यनेत ला असाधारण विशिष्ट तःधंम्ह भीआइपी जुइमानि का । अले धकाः ह्वारारारां सुखया खुसिबाः वइ । न्ह्याथासं ‘एनीहाउ पैसा आउ’ जुइ का ।

मोस्ट इम्पोर्टेन्ट खँ छु धाःसा साधारण मनू जूसां विशिष्टम्ह जुइगु गुण दयेमाः का । नमस्कार ज्वजलपा याइम्ह मखु थःत ज्वजलपा याकीम्ह जुइमाः का । अझं ल्हाःतुतियात चुलां छुं नं जुइमखु न्ह्यपुयात प्वाला प्वालां थिइक चुत्तुचुले सयेकेमाः का । अले जक जुइ का राजा महाराजा । मखुसा ला सदां नांगा बाबा का ।

अवसरलालया स्टाइल तरिका पहः टेक्निक सिस्टम फुक्कं हे तगडागु खनाः थ्व ला धाथेंयाम्ह पहुँचवाला सन्त थें च्वं । जिं थौं खःम्ह हे मनू नापलात बाऽ । धन्य देवं हे नापलाका बिउगु जुइ । थ्वयागु सल्लाह न्यन धाःसा गुगुं हल्ला हे मजुइक विपन्नं सम्पन्न जुइत सम्भव जुइ धयागु मतिं वयात अल्लाह भाःपियाः थःगु बोलीयात क्लियर गति यायां जिं रिक्वेस्ट याना, ‘स्व भाइ अवसरलाल छंगु बिचाः फेसबुकया बांलाःगु किपायात थें लाइक यायेबह जू ।

थौंकन्हय् पा फयेकेबलय् प्रधानमन्त्रीया कुर्सीया कसम, पार्टीपतित स्यानाः हत्या, संविधानया कसम, उखान टुक्काया कसम, भ्रष्टाचारया कमस धकाः जमानायात ल्वःकथं पा फयेकेमाः । का पा फयेकी ।

अनं कमेन्ट हे यायेगु खःसा ला सुपर्ब जक मखु महांसुपर्ब हे धायेल्वः । उकिं छं जितः नं भचा ग्वाहालि यानाबिउ रे भाइ । न्ह्याथे धाःसां छ जिम्ह स्कुलं बिसिउँ वनाः न्या लाः वनेगु व चिडियाखानाय् चाःहिउवनेबलय्याम्ह पासा खः । प्लिज धाये, बरु जितः नं थ्व चमत्कार जुइगु करामत क्यनाबिउ रे भाइ ।’ जिगु अनुनय विनय न्यनाःलिं वं थःगु न्हाय्यात प्वलःचा यायां धाल ।

सुयातं कने मखु खः ला ? कनेमखु कनेमखु सत्य भगवान कसम धया । जिं पा फयेकेवं जितः विश्वास याइ जुइ धकाः च्वनां ला गनं अथे जू धकाः । अःखतं बम्के धकाः जुयाहल, ‘हिं… छु तालं सुनां हे पत्याः मयाइकथं पा फयेकागु आम । आम्थे सत्य धरोधर्म भगवान कसम मां स्यानाः हत्या, मचा स्याना हत्या धकाः पुलांगु स्टाइलं पा फयेकां सुनानं पत्याः याइ ला छन्त ? थ्व गणतन्त्रया युग जूगुलिं वयात ल्वःकथं पा फयेकेमाः ।

थौंकन्हय् पा फयेकेबलय् प्रधानमन्त्रीया कुर्सीया कसम, पार्टीपतित स्याना हत्या, संविधानया कसम, उखान टुक्काया कसम, भ्रष्टाचारया कसम धकाः जमानायात ल्वःकथं पा फयेकेमाः । का पा फयेकि । गज्याःगज्याःपिं नेतातसें गुलि मनूतय् न्ह्यःने शपथ ग्रहण यानाः ला लिपा गोली मारो याइ धाःसा जि जक छाय् ग्यायेगु धयागु मतिं जि नं छतिं हे मग्यासे पा फयेका, ‘उखान टुक्काया कसम नेतात स्याना हत्या ।’

थुलि पा फयेकाः थःगु भविष्य सान्दार जुइगु जूसा छाय् पा मफयेकेगु धयागु बिचालं हाकनं छक्वः तसकं धया, ‘शान्ति सुरक्षा स्याना हत्या, महंगी स्याना हत्या ।’ जिं छम्ह सच्चाम्ह भक्तं थें वयागु खँ झट्ट व चट्ट न्यनागुलिं अवसरलालं जितः थःम्ह पक्काम्ह भक्त भाःपियाः लय्तातां धाल, ‘का बांलाक न्यँ, सुयातं कनेमते खँ ला, कन धाःसा पञ्चमहापाप लाइ खं ला ।’

जिं हस् धयागु भासं छ्यं ल्हुकुक्क संका । अले वयागु म्हुतुं महानवाणी थज्याःगु मन्त्रत हायावल । छेँय्निसें सुरु याये का न्हि । दकलय् न्हापां थौंकन्हय् म्वाये थाकु, काय् म्ह्याय् लहिइत ला थाकु सुनां खिचा लहिइ धकाः मखु । खिचा दयेमा मदयेमा छेँय् ‘कुकुरदेखि सावधान’ धकाः च्वया तयेमाः ।

अनंलि तरकारी तिरकारी न्याःवनेबलय् सुं नापलाःसा थःगु झोला खालि, थिके जुयाः तरकारी न्यायेमफुम्ह मधायेकेत उम्ह मनुखं न्ववाये मलावं हे थःम्हं हे ग्व … तरकारी नं नये थें छुं हे मदुकाऽ, ला जक गुलि नयेगु ? न्हिछिं ला जक जुयाः वाक्क जूगुलिं न्हूगु तरकारी छुं दइ ला धकाः स्वः वयागु नये थें च्वंगु छुं हे मदुकाऽ धकाः न्हूगु तरकारी न्याः वयाम्ह थें यायेगु ।

अन्त्यय् बरु सुनानं मखंक दकलय् दंगु तरकारी न्यानाहःसां जिउ । अले छेँय् थ्यंकाः नं कलातं न्ववाये मलावं हे छुं छुं हे तरकारी मदुकाऽ, काउली न्याये धकाः वनागु उलिमछिं बजाः चाःहिलां हे गनं हे मदुका । थ्व पाछैचा न धन्न भाग्यं जक दत का धाधां सुकू गंगू पाछैचा झोलां लिकायेगु, तै थुलिसां लुइका काये फतका धकाः थःत थम्हं हे स्याबासी बीगु ।

अझं कलातं विरोध यायेमलावं हे सुकुगु वाउँचा म्हयात साप निं धाइ धकाः थःगु खँयात थःम्हं हे तुरुन्त समर्थन याये ल्वःममंकेगु । थथे यातकि कलातं नं बजारय् धाथें हे तरकारी मदुगु जुइ धकाः म्हुतुयात स्टप यानाछ्वइ ।अनलिं पासापिं मुनाः बसबिसय् गनं वनेबलय् होटेल रेष्टुरेन्टय् नःवनेबलय् नं गफय् भुले जूम्ह थें जुयाः जिक्व ताउत बिकाः वास्याहां काउलें पहलं नयेगु ।

अले मेपिंसं ध्यबा पुलेधुंकूगु पक्का कन्फर्म जुल ला अले जुरुक्क दनाः पर्स लिकयाः जवय् खवय् गन हे मस्वसें तप्यंक काउन्टर पाखे वनाः धायेगु –धत्तेरीका थौं छक्वः जिं हे पुले धकाः च्वनागु ला पुले हे धुंकल का ऽ । जिं पुले धया छं छाय् पुलागु धकाः फांगा मस्यंक मू पुलाः थःगु भीआइपीपना क्यनेगु ।

थथे हे गन पासापिंथाय् म्यारिज स्यारिज म्हितः वनेत नं छन्हु न्ह्यः हे छेँय् कलाःचित कन्हय् जि मिटिङ्ग दु खं ला, प्यम्ह न्याम्ह गेष्ट नापलायेमानि, लिहां वयेबलय् भचा लिबायेफु धकाः न्हापा हे सुचं बिइगु । थथे जुलकि कलातं लँलिं नं आइरन यानाबी, लाकमय् नं पालिस तयाबिइ, अले जा नं टाइमय् हे बुकाबी ।

म्यारिज म्हितेथाय् नं टाइमय् थ्यनाः आनन्द धुक्क जुयाः म्हितेखनी । म्हिता च्वनेगु इलय् सुयागुं फोन वःसा जि मिटिङ्गय् दु, अर्जेन्ट मिटिङ्ग दुगुलिं थौं छितः नापलाये फइमखुत धकाः धायेगु नं गुबलें ल्वःमंकेमजिउ । छेँय् च्वनेबलय् नं काचाक्क फोन ल्ह्वनेगु याये मजिउ। कलातं फोन ल्ह्वंकाः वय्कः मिटिङ्गय् दी धकाः लिसः बिइकेगु ।

अझं वय्कः थौंकन्हय् छगू प्रोजेक्टय् तसकं बिजी धकाः धायेकेगु । थथे यातकि यम्मायसा थ्वं ला प्रोजेक्टय् बिजि धाःगु न्याक्क हे कमे यानाचवंगुदु जुइ धकाः कायेमाःपिं नं फुक्कं सुम्क च्वनी । थथे हे बाज्या बराजुं तयाथकूगु छेँबुँ मिइ माःसा नं थःके ध्यबा मदयाः थ्व ज्या यायेत मियागु धकाः नं गुबलें मधायेगु ।

अःखतं न्याक्क तापाः, तयातयां छु याये धकाः जक मिइगु। ध्यबा मालाः मियागु मखु, बरु शेयरय् लगानी याःसा भचासां फाइदा जुइ ला धकाः जक मियागु । व प्यमुरि खुमुरि वा कायेगु स्वयाः ला बैंकय् तःसा हे यक्व ब्याज वइ धयागु मतिं जक खः । अय् धाथें ८÷१० करोड ति वंगु छेँ मदु ला ? दःसा खबर या रे धकाः पासापिंत धायेगु ।

अले मोटर मोटरसाइकल बाध्यतां मीमाल धाःसां छु याये डाक्टरं न्यासि हुँ न्यासि वने मगात धाल । आः तयातयां छु याये अथें खं नयाः स्यनावनी धकाः जक मियागु धकाः माकःफुँइ क्यनाः समाजय् सदां हे प्रतिष्ठित जुयाच्वनेगु कुतः यायेगु । गनं पार्टीपिर्टी वनेबलय् नं गफय् मस्त जूम्ह थें जुयाः स्नाय्क्सं हे प्वाः जायेकेगु ।

अले डिनर कायेबलय् भूतयात बौ तयेबलय् थें भति भति कयागु भाय् यानाथें यानाः जक कायेगु । ननं गफ यायेबलय् नं फल्ना मन्त्रीं छक्वः नापलायेमाल धयाच्वंगु, वने हे लाःगु मखु, धिस्काना नेतां छक्वः सल्हा हे यायेमाल धयाच्वंगु, थौंतक नं वनेफुगु मखु का । थःगु ज्यां हे लिलाःगु मखु गबाय्ति नापलाः वनेगु उमित ।

ज्या मयासें नं मजिल, आः याःसा थथे का छु याये धकाः धायेगु । थथे यातकि अटोमेटिक हे विशिष्टम्ह मनू सावीत जुइ । अथेहे सुनानं छुं ज्या यानाबिउ धाःसा मजिउ मफु धकाःम्हगसय् तकं हे मयोगु । झी प्रधानमन्त्रीं पानीजहाज हये, रेल चले यायेध काः माकः फुँइ याःथें सर्गतय् खेती यायेगु व समुद्रय् छेँ दयेकेगु खँ जूसां हे दये जिउ, हस् जिं यानाबी धकाः धायेत छतिं हे मग्यायेगु ।

अले ततःधंपिं नेता मन्त्रीतसें थःत म्हमसिउसां उपिं फुक्कं हे थः लंगोटी यार थें च्वंक खँ ल्हायेगु । म्हसिइमा म्हमसिइमा उकी मतलब मयासे न्ह्यागु उपचारं नं थःगु प्रेस्टिज बढे यायेगु जक स्वयेगु । थथे तुं ऊँ नमः शिवाय, बुद्धं शरणम् गच्छामि धाये थें चाचुचा यै नमः (चाकडी चुक्ली चाप्लुसी)या मन्त्र सदां हे जपे यायेगु ।

अझं अत्यन्त हे गोपनीय व दुर्लभगु मन्त्र कने, बांलाक न्हाय्पंयात वानवे यानाः न्यं । जागीर ठेक्का पत्ता इत्यादी ल्हातिइ लाकेगु मनसुवां ततःधंपिं मनूत नापलाः वनेबलय् छुं छुं कोसेली, गिफ्ट ज्वनाः जक वनेगु । फयाफत्तले मन्त्री स्वयाः मन्त्रानी व नेता स्वयाः नेतानीयात लय्तायेकेगुली थःत पूर्ण रुपं समर्पित यायेगु खँ नुगलय् सदां जन्तरचा थें घानाः जुइगु ।

अझं मौका लाःसा न्ह्याथें भ्रष्टाचारीम्ह घुस्याहा हुल्याहाम्ह मन्त्री नेता जूसां संसारय् व ति इमान्दारम्ह भिंम्ह न्यायप्रेमी महान व्यक्ति मेपिं द हे मदु धयागु खँय् ग्यारेन्टी बिइत नं छतिं मग्यासें वकालत यायेगु । गणगान व बखानया महाभारत हे दयेकेगु । थथे यातकि थम्हं धयागु फुकं ज्याखँत वने जुयाः नां दां इज्जत फुक्कं हे छथुं खुसिबाः वये थें वइ ।

उकिं छं नं थ्व मन्त्र ज्ञान फर्मूलायात बांलाक छ्यल धाःसा लोडसेडिङ्गगु छंगु जीवन छथुं हजारवाटयागु चीम थें जहाँ थीना वइ । खबरदार ! होशियार तन (शरीर) नेपाःमि जूसां मनयात गबलें नं नेपाःमि यायेमजिउ । थथे यातकि थःगु आम्दानीया निकास जाम जुयाः भविष्य विकास जुइमखु । ल्वःमनाः नं जनता सनता धाःपिनिगु पंगः समस्या व राष्ट्रियता थज्याःगु िनगति खँय् ध्यान बीमजिउ ।

छपाः न्हाय्पनं न्यनेगु, मेगु न्हाय्पनं उमिगु खँयात पित छ्वयेगु यायेमाः । झीते मेपिनिगु छु मतलब ? थःगु भविष्य धकाः तगडा यायेमाःगु दु नि मखुला । पत्याः मजूसा झी नेतापिंत हे स्वरे । जिमिगु सम्पूर्ण जीवन हे ज नताया निंतिं धकाः न्हिछि भाषण याना जुइ, तर ज्याखँ याइबलय् मात्र थःगु जीवन दयेकेगु जक स्वइ ।

बुद्ध थें सुद्ध जुयाः थःगु जासिइ जा बुइमखु, अले हरिश्चन्द्र थें सत्यवादी जुल धाःसा थन सदां ल्वाप्पा जक नयेमाली, गुबलें पापा नयेखनी मखु । धयागु खँ वय्कःपिंसं बांलाक हे थू । उकिं हे वय्कःपिंसं सदां थः बनेजुइगु व कमे यायेगुली जक चिन्तन मनन यानाः न्ह्यज्याना च्वंगु दइ । थ्व गणतान्त्रिक युगया स्यल्लाःगु साधना धयागु हे थःत भिंकेत बांलाकेत जक यायेगुखः ।

काऽ आः ला थुल मखुला छं । गोंज जुयाः गुबलें मोज याये खनीमखु । उकिं थ्व फुर्मलात छ्यलाः मज्जां म्वायेसयेकि । का जि छगु मिटिङ्ग भिजिट यायेमानी धयालिं स्वाराक्क वना हे छ्वत । अले ‘सर्वजन हिताय’ धयागु मतिं छिकपिनि नं कल्याण जुइमा धयागु पवित्र कामना यासें छिकपिंत नं जिं कनागु जुल । छिकपिंसं नं थ्व फर्मुलायात छ्यलादिसँ । अले गरिबमान जुयाः मखु, मज्जां अमीरमान जुयाः म्वानादिसँ न्हैसा । का थौंयात बाय् सुभाय् ।

सम्बन्धित बुखँ

LEAVE YOUR COMMENTS