गर्मिबलय् सँया सुसाःकुसाः

गर्मिया मौसमं सँया निंतिं यक्व हे समस्या ज्वनावइ । विशेषज्ञतय्गु मान्यता दु कि गर्मिया मौसमं हे सँयात दकलय् अप्वः नोक्सान याइ । थुगु मौसमय् मेमेगु मौसमय् स्वयां सँ अप्वः हाइ । थुकिया लिसें तुँचा दाइगु, सँय् चमक मदइगु, सँया रंग हिलावनीगु, सँ च्यापच्याप च्वनीगु थेंज्याःगु समस्या तच्वइ । अथे जूगुलिं गर्मिबलय् सँया विशेष सुसाःकुसाः यायेमाःगु जुयाच्वनी ।

गुकथं यायेगु सुसाःकुसाः ?
चमक मदुगु व मिचलः दुगु सँ ः गर्मिबलय् चःति यक्व वइ । अले उकिं यानाः स्कैल्प व सँय् लवण मुनी । लवण मुनीगु व तापक्रम अप्वइगुलिं क्युटिकलयात क्षतिग्रस्त यानाबीफु, गुकिं यानाः सँ सुख्खा जुयाः अःपुक हे त्वःधुलीगु जुयावइ । क्वाःगु व हसंमसं दंगु फसं नं सँयात सुख्खा यानाबी, गुकिं यानाः व अस्तव्यस्त जुयावनी ।

छाःगु निभाःजलय् लातकि सँय् मिनरल्सया कमि जुइ, गुकिं यानाः सँय् निचलः दयावइ ।थथे जुइगुलिं गर्मिबलय् सँया सुसाःकुसाः यायेत यक्व लः त्वनेमाःगु जुइ । यक्व लः त्वनकि म्हय् च्वंगु विषालु पदार्थ पिहां वनी । थःगु डाइटय् प्रोटीनया मात्रा नं अप्वयेकादिसँ ।
गर्मिबलय् सँया सुसाःकुसाः यायेत नियमित रुपं थःगु सँया ट्रिमिङ्ग याकाच्वनादिसँ ।

नियमित रुपं सँया बागू इंचि स्वयां क्वय् लाकाः ट्रिमिंग याकां तुं च्वनादीसा बांलाइ । सँयात नाइसे च्वंकेत धौ, ख्यें व अलःचिकं ल्वाकछ्यानाः सँय् पानादिसँ । थुकी सँ नाइसेच्वंकी । छवाःया छक्वः चिकं तिलेगु नं याना हे दिसँ । थुकिं यानाः सुख्खागु सँय् चमक दयावइ । निचलः लुइगु समस्या नं कम जुइ ।

निचलः लूगु सँपाखे मुक्ति कायेगु खःसा नैंक्याःचिकं छताजि बांलाःगु कन्डिसनर जुइफु । थुकिं म्वाइश्चरयात लक यानाबी । ल्हातय् नैंक्याःचिकं भचा कयादिसँ, अले निपा ल्हातं ब्वब्वस्याये धुंकाः छ्यनय् थानादिसँ । सँया रंग हिलीगु ः छाःगु निभालं कलकि सँया रंग हिली । थुकिया कारण थुकिया अस्थायी ब्लिचिंग प्रभाव खः ।

गुर्मिबलय् अप्वः मनूतय् स्वीमिंग पुलय् वने ययाच्वनी । थुकिया लखय् क्लोरिन तयातःगु दइ । उकिं नं सँयागु रंग हिलाबी । गर्मिबलय् लगातार चि दुगु लखं सँ चायेगु यानाच्वन धाःसां नं सँया रंग हिलावनी ।

थथे मजुइकेगु खःसा क्लोरिन दुगु स्वीमिंग पूलय् म्वःल्हुइ धुंकाः सादा लखं सँ चायादिसँ, अले डीप कन्डिसनर तयादिसँ । निभालय् पिहां वनेमालकि हाय्ट अथवा स्कार्फ छ्यलादिसँ । थःगु सँय् सन प्रोेटेक्सन लोसन नं तयेफइ । यदि सँया सुसाःकुसाः बांलाक यानाच्वनेगु फुर्सद मदु धयागु खःसा चिहाकःगु सँ तयेगु हेयर स्टाइल तयेगु छगू बांलाःगु विकल्प खः ।

गर्मिबलय् सामान्य सँया बिचाः यायेगु गुकथं ?
गर्मिबलय् सँ चायागुयां निन्हु लिपा व चिकुलां स्वन्हु लिपा हानं सँ चाये माःथें जुल धाःसा थुइकादिसँ, छिगु सँ सामान्य खः । सामान्य सँया सुसाःकुसाः यायेत थुकथंया उपाय यानादिसँ –

#गर्मिबलय् सँया सुसाःकुसाः यायेत सँयात स्याम्पु यायेधुंकाः कन्डिसनिंग जरुर यानादिसँ, अले प्रोटीन, सनस्क्रिन व म्वाइश्चराइजर दुगु कन्डिसनर हे ल्ययादिसँ ।

# छवाःया छक्वः हाम्वःचिकं व मस्र्याबरांचिकं उतिग्यंक ल्वाकछ्यानाः उकिं सँय् मालिस यानादिसँ । ४–५ घौ लिपा स्याम्पु यानादिसँ ।

# गर्मिबलय् थःगु सँयात छवाःया छक्वः डीप कन्डिसन जरुर यानादिसँ ।

# सँ अप्वः टाइट जुइक चिनाः द्यनेगु यानादीमते । सँ चायेत लुमुलुमु धाःगु वा ख्वाउँगु लः छ्यलादिसँ । मस्त खास यानाः मिसामस्तय्गु सँ चिना हे तयादिसँ ।

# गर्मिबलय् छक्वःपतिकं सँय् ब्रश यानाच्वनकि सँ सुख्खा जुयावनी । सँ चाये धुंकाः तुरुन्त लिपा हे सँ गथः मचिंकेत प्राकृतिक फाइबर ककीचा छ्यलादिसँ ।

# सँयात ताःई तक छुं मस्यंक तयातयेत गर्मिया छाःगु निभालय् पिहां वने न्ह्यः हिट प्रोटेक्सन स्प्रे छ्यलादिसँ । थ्व छगः न्यायेबलय् गर्मि महिना ज्वःछियात गाइ । थ्व हेयर स्प्रें छिगु सँयात ताःई तक मस्यंक तयातइगु जक मखु, सँया चमक नं अप्वयेकी । हीट ड्यामेजं रक्षा याइ । लिसें कर्लड सँयात पराबैजनी किरणं रक्षा यायेगु निंतिं कवचया ज्या याइ ।

# गर्मिबलय् निभालं मखयेकेत सँयात कापतं भुनाः तपुलिं पुयाः अथवा कुसां कुया वनेगु यायेमाः । यदि छि छाःगु निभालय् ताउत हे च्वनावयागु खःसा लिपा छेँय् थ्यंकाः ख्वाउँलखं म्वःल्हुइमाः ।

# गर्मि मौसमय् सँय् गुगु कथया फेन्सी ट्रीटमेन्ट याके मजिउ । गथेकि ः कलरिंग अथवा यक्व तापक्रमय् सँया मोडिफाइ याकेगु आदि ।

# ब्राम्हीया चिकं गर्मि मौसमय् दकलय् भिंगु व बांलाःगु विकल्प खः । थुकिं सँया रक्षा नं याइ, छितः सिचुका नं बी ।

# गर्मिबलय् सँ गंकेत हेयर ड्रायर छ्यलेगु यानादी मते ।

चिकं कंगु सँया सुसाःकुसाः
गर्मिबलय् सँ चायेधुंकाः कन्हय्कुन्हु व चिकुलां छन्हुइ अतः सँ च्याप्च्याप् च्वन धाःसा सिइकादिसँ कि छिगु सँ चिकं कंगु (आयली) लानाच्वन ।

# सँ च्यापच्याप् मच्वंकेगु खःसा कागतियात कन्डिसनरय् छ्यले थें छ्यलादिसँ । छगू मग लखय् बागः कागति तयादिसँ । थुगु लखं दकलय् लिपा सँ चायादिसँ । यदि सँ अप्वः हे चिकंकंगु जुयाः तुँचा नं दाल धाःसा छगू चम्चा त्रिफला पाउडर कयाः बागू कप लखय् तयाः दायेकादिसँ । ग्वाराग्वारा दालकि ख्वाउँकाः छानय् यानादिसँ ।

थुकी छगू चम्चा भेनेगर ल्वाकछ्यानादिसँ । अले थ्व पानाः छ्यनय् मसाज यानादिसँ । सुथय् न्ह्यागुसां भिंगु स्याम्पु छ्यलाः म्वःल्हुयादिसँ ।
लवाउँगु लैंचाय् छगू चम्चा धौ व लः ल्वाकछ्यानाः पेस्ट दयेकादिसँ, अले थ्व सँय् पानादिसँ । १५ मिनेट त्वःतातये धुंकाः यचुगु लखं म्वःल्हुयादिसँ ।

# नवःघाँय्या हः निम्हू कयाः बागू गिलास लखय् तयाः२० मिनेट दायेकादिसँ । अनंलि उगु लः छानय् यानाः फ्रीजय् तयादिसँ । म्वःल्हुइबलय् थुगु लः श्याम्पुइ ल्वाकछ्यानादिसँ ।

सुख्खा सँया सुसाःकुसाः
यदि छिगु सँ श्याम्पु व कन्डिसनर यानां नं सुख्खा जुयाः, छानाः व भुइभाय् दनाच्वन धाःसा थुकिया मतलब खः छिगु सँ ‘ड्राइ’ खः । थज्याःगु सँयात थुकथं यानादिसँ सुसाःकुसाः –

# न्हिं न्हिं म्वःल्हुइगु मयासे निन्हुइ स्वन्हुइ छक्वः जक म्वःल्हुयादिसँ । गर्मिबलय् अप्वः म्वःल्हुल धाःसा सँयागु नेचुरल आयल पिहां वनी, अले सँ तसकं सुख्खा जुयाः कमजोर जुयावनी ।

# न्हिं न्हिं चिकं तयाः मसाज यानादिसँ । यदि मसाजया निंतिं ई मदुसा पेशेवरया ल्हातं टेक्सचरिंग याकादिसँ ।

# फ्वयाः चुलि वयेकातःगु अन्न व बूबः नियमित भपियादिसँ । थुकिं छिगु म्हया लिसेलिसें सँयात पोषण बी । थुकिया लिसें लः खूब त्वनादिसँ । जूस, फलफुल व धौ नं प्रशस्त भपियादिसँ ।

एजेन्सीया ग्वाहालिं निरा महर्जन