किपाय् स्वनिगः

तना वनेधुंकूगु स्वनिगः हानं छक्वः जीवित जुयाः दना वःगु दु, कलाकार हरिप्रसाद शर्माया किपाय् । सलंसःदँ न्ह्यःया स्वनिगः आः लिहां वइ मखुत । क्यामेरा आविष्कार जुइ स्वयां न्ह्यःया उगु स्वनिगः गथे च्वं, व सुनां सीगु खँ नं मजुल ।

तर कलाकार हरिप्रसाद शर्मां विस्मृतिइ वनेधुंकूगु उगु स्वनिगःयात थःगु कल्पनाशीलता व सिर्जनशीलताया खुबी प्रयोग यानाः जीवन्त यानादीगु दु । स्वनिगःया पुलांगु जीवनशैली, बहाःचुक ननि, देगः, फल्चा, सतः आदिया आकर्षक किपा च्वयेगु ज्याय् सिद्धहस्तम्ह कलाकार हरिप्रसाद शर्माया प्यक्वःगु किपा ब्वज्या थनया बबर महलस्थित आर्ट काउन्सिलया हलय् न्ह्यानाच्वंगु दु ।

ब्वयातःगु किपा छपाः थे छपाः आकर्षक जू । उकी मध्ये नं लुम्बिनीइ सम्राट अशोकं अशोकस्तम्भ धस्वाकाच्वंगु किपा थौं स्वयां निद्वःदँ न्ह्यःया घटना खः । स्वयम् सम्राट अशोक हे न्ह्यःने दुगु उगु किपाय् द्वलंद्वः मनूत मुनाच्वंगु खनेदु ।

हरेक मनूया ख्वाः छम्हलिसे मेम्ह पाः । कलाकारं अतिकं हे धैर्य तयाः उगु किपा च्वयादीगु जुइमाः । च्वयेत जक मखु उकिया लागिं अध्ययन व अनुसन्धान यायेत तकं वय्कःयात दँ दँ ई बित । अथे हे येँदेय्या नुगःचुइ दयेकातःगु लानिपुखू भुखाय् लिपा छु शैलीं दयेकेगु धइगु खँय् ताःई विवाद जुल । लानिपुखूया पूर्व रुप ला शिखर शैलीयागु जुयाच्वन ।

कलाकार शर्मांं थनिं न्यासःदँ न्ह्यः शिखर शैलीं दयेकातःगु लानिपुखूया काल्पनिक किपा नं अन न्ह्यब्वयादीगु दु । किपा स्वनिगः दुने नं येँदेय् जःखः च्वंगु थीथी लागायागु जूगु कारणं उकी नेवाः समाज व थ्व समाजया धुकुधुकु सनाच्वनीगु स्वाभाविक हे खत । सखे थनिं ८२ दँ न्ह्यः येँदेय् दुने नं थनया भित्री लगं लागाय् जन्म जुयादीम्ह जुयाः जुइमाः, कलाकार शर्मा जातं ब्राम्हण खःसां कलाकारितां मुक्कं नेवाःया नेवाः जक खः ।

लुम्बिनीइ सम्राट
अशोकं अशोकस्तम्भ धस्वाकाच्वंगु किपा थौं स्वयां निद्वःदँ न्ह्यःया घटना खः । स्वयम् सम्राट अशोक हे न्ह्यःने दुगु उगु किपाय् द्वलंद्वः मनूत मुनाच्वंगु खनेदु । हरेक मनूया ख्वाः छम्हलिसे मेम्ह पाः ।

वय्कःया थ्व कलाय् पूवंक हे नेवाः दु ।छपाः किपा सिद्धार्थ गौतमं गृहत्याग यायेत्यंगु ईयागु दु । तर उकियात नं वय्कलं थःगु कल्पनाशक्तिं नेवाःकरण यानादीगु दु । सिद्धार्थ गौतमया दरवार मुक्कं नेवाः वास्तुं जायेकाः च्वयातःगु दु । गुकिं यानाः किपा अझ जीवन्त जुयाः थःगुपनं जाया बिउगु दु ।

वय्कलं किपाय् हयादीगु गुलिखे चुक, बहाः, ननि थौं तक नं अस्तित्वय् ला दनि, तर उकी न्हापाया थें प्राण धाःसा मदयेधुंकल । अज्याःगु निर्जीव थें जुइधुंकूगु नेवाः वास्तुइ वय्कलं प्राण जायेकादीगु दु । छुं नं कलाया ज्यानया आधार कलाकारया कुशलता व अनुभव जुइ । तर थ्व कलाया ज्यान उकिया कलाकारिता जक मखु, उकी सुलाच्वंगु इतिहास नं खः ।

उकिं थ्व किपायात केवल कला जक धयां मगाः । थुकियात कला व इतिहासया संगम धाये माली ।इतिहासं व्याख्या याये मफुगु आपालं खँत थ्व छपाः किपां धाइगु विश्वास यायेफु ।

जुजु जयप्रकाश मल्ल तलेजु भवानीलिसे पासा म्हिताच्वंगु, जंगबहादुर बेलायत वंबलय् अनया छम्ह मिसा लोरालिसे मतिना याना जूगु, जुजु प्रताप मल्ल अर्धनग्न मिस्तलिसे होली म्हिताच्वंगु, यँयाः जात्राबलय् पृथ्वीनारायण शाहं येँदेशय् आक्रमण याःगु आदि किपाय् रंगया समायोजन ला गाक्कं दु, नापं उगु ईया स्पष्ट इतिहास नं दु ।

कला व इतिहासयात छथासं ल्वाकछ्यानाः बिस्कं सम्प्रेषण बीम्ह कलाकार नेपालय् शर्मा हे छम्ह जक खः धाःसां मपाः । वय्कलं च्वयादीगु थुपिं किपातय्त पाठ्यसफुली दुथ्याकेगु खँ नं जुयाच्वंगु दु । व स्वयां न्ह्यः थ्व फुक्कं किपा दुथ्याकाः छगू सफूया रुपय् पिथनेगु तयारी न्ह्यानाच्वंगु दु ।

नेपाःया समग्र संस्कृति, सम्पदा, जीवनशैली समेत कःघानाच्वंगु किपा जूगुलिं थुकियात राष्ट्रियस्तरया संस्थां हे पिथनेमाःगु खँ नं जुयाच्वंगु दु । नेपाःया वैभव व तःजिगु सम्पदा दुथ्यानाच्वंगु किपा जूगुलिं नेपाःया कुटनीतिक नियोग, परराष्ट्र मन्त्रालय वा येँ, यल ख्वपया जनप्रतिनिधितय्सं सुं विदेशी पाहांयात उपहारया रुपय् बीगु सफूया रुपय् तकं उकियात हे प्रयोग याये फइगु खँय् शंका मदु ।

आर्ट काउन्सिलय् आः जुयाच्वंगु ब्वज्याय् मुक्कं ४५ पाः जक किपा ब्वयातःगु दु । उकी मध्ये छपाः किपा ला च्वये हे सिमधःनि । असोज ९ गते तक ब्वज्या न्ह्याइगु ग्वसाः दु । झीगु स्वनिगः धाथें गथे च्वं धइगु कल्पना जक यायेगु लागिं नं ब्वज्या छक्वः मस्वसें मगाः ।

थौंकन्हय् स्वनिगःया नेवाःतय् दथुइ थःगु सम्पदा, संस्कृति व संस्कारयात कयाः जागरण वयाच्वंगु दु । स्यनावं वनाच्वंगु स्वनिगःयात ल्यंकेमाः धइगु सः प्यखेरं थ्वयाच्वंगु दु । थज्याःगु अवस्थाय् कलाकारया शर्माया थ्व किपां स्थानीय नेवाःतय् थ्व जागरणयात हे तिबः बीगु खँय् शंका मदु ।

सम्बन्धित बुखँ

LEAVE YOUR COMMENTS