नैंक्याः, नैंक्याःलः व नैंक्याःचिकंया फाइदा

नैंक्याः छताजि अज्याःगु फल खः, गुकियात शुभ नालातःगु दु । अथे जूगुलिं पुजापाठया अवसरय् थुकिया छ्यलाबुला जुइ । छुं ज्याया शुभारम्भ यायेमाल धाःसा नैक्याः तछ्यायेगु याइपिं नं दु । भगवानया प्रसादया रूपय् थ्व इनाबीगु याइ । नैंक्याः कचिगु (दुने लः दुगु) व पाकय् जूगु (दुने गंगु) यानाः निगू अवस्थाय् दइ ।

थुकिया लः त्वनेगु याइ, गुगु ख्वाउँगु, प्याःचाः लंकीगु, ज्वर लंकीगु व म्हयात दुनें शुद्ध याइगु जुइ । गंगु नैंक्याःयात मरिचरि व बिस्कुट आदि दयेकाः नं नयेगु याइ । कचिगु नैंक्याः नयेगु व उकिया लः त्वनेगु यात धाःसा कब्जियत लनी । नैंक्याः नल धाःसा चःति यक्व वइमखु, प्यास कम जक जुइ ।

भतिचा मेहनत यातकि हे त्यानुइगु ज ुल धाःसा नैंक्याः नयाच्वनादिसँ, थुकिया लः त्वनादिल धाःसा म्हय् लः मगाइगु जुइमखु । नैंक्याःया लखय् कार्बोहाइड्रेट, फ्रक्टोज, ग्लुकोज, अमीनो एसिड, फाय्ट, पोटासियम व क्याल्सियम दइ । ताजा १०० ग्राम नैंक्यालय् आर्द्रता ३६.३, प्रोटिन ४.५, चिकं ४७.६, कार्बोज १३, फाइबर ३.६, चून ०.१ प्रतिशत अले फस्फोरस २४ ग्राम, आइरन १६ मिग्रा, भिटामिन सी १ मिग्रा व छुं भचा मात्राय् भिटामिन बी, ए, ई व सिजः दइ ।

गंगु नैंक्यालय् ५७–७५ प्रतिशत चिकं दइ, गुगु मेमेगु चिकंया स्वयां अःपुक पचय् जुइगु खः । थुकियात छ्यंगुलिं नं अःपुक हे सोसे यानाकाइ । आः स्वये नैंक्यालं झीत छु छु फाइदा याः—

# यदि छितः पुलि स्याइगु जुयाच्वन धाःसा गंगु नैंक्याः ५० ग्राम न्हिं न्हिं हे भपियादिसँ । पुलिइ नैंक्याः चिकं क्वातुक थानाः मालिस यानादिसँ । मालिस निभालय् च्वनाः, बहनी द्यने त्ययेकाः यात धाःसा अप्वः लाभ जुइ । छ्यंगुलिं नैंक्याः चिकं सोसे याइ । उकिं ताउ बिक मालिस यानाच्वनादिसँ, गुकिं चिकं छ्यंगूया दुने थ्यंक दुहां वनाः दुग्ययेक प्रभाव लाकी । थथे यायेबलय् पुलि स्याःगु याकनं हे लनी । लिसें नैंक्याः भपादिसँ, अले थुकिया लः नं त्वनादिसँ । थ्व प्रयोग यक्व हे ल्वगितय्त सफल जुइधुंकूगु दु । पुलि स्याःपिंसं थथे छक्वः याना हे दिसँ ।

# नैंक्याःचिकं नयेगु ज्वरे यायेत ज्या काइ । नैंक्याःया शुद्ध चिकं कचिकं मक्वाकुसे न्हिं निगू चम्चा त्वनादिसँ, थुकिं मेटाबोलिज्म थासय् लाकातइ । पाचनशक्ति बल्लाकातइ । ल्ह्वंकी मखु । थुकिं थायराइड लंकी । रासायनिक दृष्टिं नैंक्याःचिकं मक्खनलिसे यक्व ज्वःलाः ।

# नैंक्यालय् प्रोटिन कुगाक दइ । थुकी दक्वं कथंया एमीनो एसिड दइ । स्वास्थ्यया ल्याखं नैंक्याः टनिक थें हे खः ।

#नंैक्याःचिकनय् कागति तिसिनादिसँ, अले कपू छकूचा तयादिसँ । थुगु चिकनं मालिस यायेधुंकाः म्वःल्हुल धाःसा म्ह चासुगु लनी । चि कम भपादिसँ ।

# नैंक्याः नलकि स्मरणशक्ति नं बल्लाइ । थुकिया निंतिं नैंक्याःलिसें मस्र्याबरां, ख्वःसिं व मिश्री ल्वाकछ्यानाः न्हिं न्हिं नयेगु यायेमाः । मस्तय्त थ्व नकेमाः, थुकिं मस्तय्गु दिमागी विकास जुइ ।

# तसकं प्याःचाइगु वा याकनं याकनं प्याःचाइगु जुयाच्वन धाःसा नैंक्याःलः त्वनाबिलकि प्यास शान्त जुइ । छक्वःपतिकं लः त्वनाच्वने मालीमखु ।

# नैंक्याःया लः दुरु त्वंकाच्वंम्ह मां, सा, च्वलेचिया दुरु समान जुइ । गुपिं ह्याउँमस्तय्सं मांया दुरु त्वने मखं वा कम जक त्वने खनाच्वंगु दु, उमित नैंक्याःया लः त्वंकेगु यायेमाः । नैंक्याःलः त्वंकलकि प्वाः स्याइगु व हिकु वइगु नं जुइमखु ।

# न्ह्यः बांलाक मवइगु जुयाच्वन धाःसा द्यने त्ययेकाः नैंक्याःलः त्वनाबिल धाःसा क्वातुक न्ह्यः वइ, दना वयेबलय् म्ह फ्रेस जुयाच्वनी ।

# प्वाथय् दुपिं मिसातय् वाक्वाक् वइगु व चा, ह्यंग्वाः आदि नये मास्ति वइगु धयागु क्याल्सियम मगाःगुया लक्षण खः । नैंक्याःलः त्वनाबिल धाःसा थ्व समस्या वइमखु । प्वाथय् च्वंम्ह मचाया पोषण नं बांलाक जुइ ।

# छगः नैंक्याःया लखय् प्यंगू चम्चा वाउँ धनियाया पेस्ट ल्वाकछ्यानाः त्वनाबिलकि पिसाब हियूगु लनावनी ।

# ख्वाःया ला हय्हय् कुनाच्वंगु दु, हाकुगु चातः वयाच्वंगु दु धयागु खःसा निक्वः नैंक्याःया लः पानादिसँ, फाइदा खनेदयावइ ।

# गर्मिया कारणं च्व बांलाक मवल धाःसा नैंक्याःलः त्वंकादिसँ । बन्द पिसाब वयेगु शुरु जुइ । नैंक्याःलखं किड्नीयात तागत बी, च्वप्वःचां अप्वः ज्या याये फयेका बी, गुकिं यानाः च्व बांलाक वइ ।

# किड्नीया ल्वचय् नैंक्याःलः त्वनेमाः । नैंक्याःलः स्नायुमण्डलया रक्षाकवच खः । थुकिया लखय् झीत न्हिछियात माःगु भिटामिन सी दइ । पथरी जूसां नैंक्याःलः त्वनादिसँ ।

# नैंक्याःया लखय् इन्फेक्सन मजुइकेगु गुण दइ । नैंक्यालं म्हय् दुने हे ओक्सीटेट्रासाइक्लिन एन्टिबायोटिक दयेकी । थुकिं ज्वर, ब्लडप्रेसर आदि ल्वय् नियन्त्रित जुइ ।

# नैंक्याःलखं चुरोट, अय्लाः ड्रग्स व मेमेगु एन्टिबडीजया साइड इफेक्ट मदयेकाबी ।

# प्वाथय् की दायाच्वंगु दुसा सुथय् खालि प्वाथय् कचिगु नैंक्याः नयेगु व उकिया लः त्वनेगु यात धाःसा प्वाथय् च्वंपिं कीत पिहां वनी । कोलाइटिस, डाइबिटिज, ग्यास्ट्रिक पेप्टिक अल्सर व अलःकै जूपिंसं कचिगु नैंक्याः नयेमाः ।

# मस्तय्त नैंक्याःचिकनं मालिस याकेगु बांलाः ।

# सोरायसिस जूथाय् नैंक्याःचिकं बुलादिसँ ।

# नैंक्याःचिकनय् चिल्लो यक्व दइ । सँय् तिलादिसँ, अले मालिस यानादिसँ । म्वःल्हुइ धुंकाः सँयात पुरा गंकाः थ्व सँया हाय् हाय् थ्यंक इलाः ५–६ मिनेट तक पतिंचां छ्यनय् मालिस यायेमाः । थथे बहनी द्यने न्ह्यः नं यायेजिउ । थथे यायेबलय् सँ हाइमखु, त्वःधुली मखु, बरु हाकुसे ख्वातुसे च्वनाः बांलानाच्वनी ।

# नैंक्याःचिकनय् कागतिया रस ल्वाकछ्यानाः सँय् पानाबिल धाःसा तुँचा वनी ।

# नैंक्यालं कब्जियत नं मजुइका बी । नैंक्यालय् फाइबर व चिल्लो यक्व दइ । तसकं तच्वयेक कब्जियत जुल धाःसा बहनी छगू चम्चा नैंक्याःचिकं त्वनादिसँ ।

# गंसि मजुइकेगु खःसा लः दुगु नैंक्याः यक्व ज्या वः । थुकिया चिकं नयेत व मालिस यायेत छ्यल धाःसा म्हं छाँट वनाः बांलाइ, अले ब नं लाइ ।

# नैंक्याःलःयात ड्रपरय् तयाः निफुति निफुति न्हाय्या निखेरं प्वालय् तिकि नंकाबिल धाःसा बागः कपाः स्याःगु लनावनी । फाइदा मजूतले सुथय्, बहनी अथे हे तयाच्वनेमाः ।

# छगू कप नैंक्याःलखय् जीचुं भतिचा तयाः त्वनाबिल धाःसा गर्मीं यानाः छ्वाल्लुक झारा जूगु दिनावनी ।

सम्बन्धित बुखँ

LEAVE YOUR COMMENTS