अन्तर्राष्ट्रिय मातृभाषा दिवसय् कविता महोत्सव

येँ – नेपालय् नं थीथी ज्याझ्वः यासें अन्तर्राष्ट्रिय मातृभाषा दिवस हन । थ्व लसताय् नेपाल प्रज्ञा प्रतिष्ठानं राष्ट्रिय मातृभाषा कविता महोत्सव २०७४ यात । स्वीखुगू भाषाया १०७ पू कविता दुतिंगु ज्याझ्वलय् ल्यज्याः पुचलं ल्ययाः मुक्कं पीप्यपु कविता दुथ्याकूगु खः ।उकि नेपालभाषा, तामाङ भाषा, मैथिली भाषा, अवधि भाषा नापं स्वीखुगू भाषां कविता न्यंकेगु ज्या जूगु खः । झिंगुगू भाषाय् छपु छपु जक कविता दुथ्यावःगु खँ धाःगु दु ।

नेपाल प्रज्ञा प्रतिष्ठानया ख्यलय् जूगु उगु मातृभाषा कविता महोत्सवय् प्रतिष्ठानया कुलपति गंगाप्रसाद उप्रेतिं सहभागीतय्त पारिश्रमिक व दसिपौ लःल्हानादिल ।रामेछापया सिताल थोकर तामाङया कवितां सुरु जूगु महोत्सवय् प्रयास दुमि राई, मगरानी रामजिता, सविनसिं चौधरी, कृतिका केहरथ, छङ गुरुङ,निशा चौधरी, पवनकुमार यादव, लक्ष्मी ऐडी, दिल बहादुर कुमाल नापं पीम्ह कविपिसं कविता ब्वनाः न्यंकूगु खः ।