ने. सं. ११४४ चौलागा पारू -

ओम्नीनाप जूगु स्वंगू विवादास्पद सम्झौता

येँ – कोरोना भाइरस (कोभिड-१९) संक्रमणया पहिचान, रोकथाम व वासः यायेगु निंतिं स्वास्थ्य उपकरण न्यायेत सरकारं छगू नीजि कम्पनी नाप याःगु सम्झौता बुधवाः रद्द जूगु दु । यलया पुच्वःय् च्वंगु ओम्नी कप्रोरेट इन्टरनेसनल प्रा. लि. (ओबीसीआई)नाप स्वास्थ्य सेवा विभागं याःगु सम्झौता बमोजिम सामान हयेमफुगु धासें सरकारं सम्झौता रद्द याःगु खः ।

ओबीसीआई प्राइभेट लिमिटेड २०६३सालय् नेपाःया कम्पनी रजिष्ट्रारया ज्याकूथी सूचना प्रविधि सम्बन्धी उपकरण आयात व जडान यायेगु धकाः दर्ता जूगु खः । ओम्नीया संचालक गुल्मीया तलुहरि सिंह (भुसाल) खः । सरकारया उच्च पदय् च्वपिं नाप प्रत्यक्ष स्वापु दुगुलिं ओम्नीं सूचना प्रविधि बाहेकया तःतःधंगु टेन्डर नं ल्हातय् लाकेधुंकूगु दु । सत्ताय् थ्यनीपिं प्रायः फुक्क नापया स्वापु बांलाकाः तयेफुगुलिं ओम्नीं तःतःधंगु टेन्डरय थःगु कब्जाय् कायेफुगु खः ।

ओम्नी दर्ता जुइधुंकाः आः तक आपालं सरकारी टेन्डर ल्हातय् लाकाः ज्या यायेधुंकूगु दु । उकी मध्ये दकलय् विवादास्पद जूगु स्वंगू टेन्डर थुकथं दु :

१. निर्वाचन आयोग नाप जूगु सम्झौता
संविधानसभापाखे न्हूगु संविधान निर्माण जुइधुंकाः दलकय् न्हापां स्थानीय, प्रदेश व संघीय निर्वाचन जूगु इलय् निर्वाचन आयोगं छगू टेन्डर आव्हान यात । निर्वाचनय् आवश्यक जुइगु मतदाता परिचय पत्र छापे यायेगु ठेक्का । न्हापा आव्हान यायेधुंकूगु टेन्डर तकं लिपा ई म्हो जूगु धासें बिना टेन्डर तप्यंक ओम्नीयात बिउगु खः । २० करोडया टेन्डरय् ल्हातय् लाकूगु ओम्नीं छपाः परिचयपत्रया झिंस्वतकाय् छापे याःगु खः । जबकी उगु परिचयपत्र मेमेगू कम्पनीं न्यतकाय् छापे यायेफुगु धकाः न्हापा हे मेमेगू कम्पनीं दाबी याःगु खः । लिपा निर्वाचन सिधयेत्यंगु इलय् ओम्नीयात हे बिना प्रतिस्प्रर्धा २२ करोडया प्रिन्टर न्यायेगु ठेक्का नं आयोगं बिउगु खः ।

२. नेपाल दुरसंचार प्राधिकरण नाप जूगु सम्झौता
नेपाल दुरसंचार प्राधिकरणं देय्न्यंकया १ हजार सामुदायिक विद्यालयलय् आईटी ल्याब स्थापना यायेगु धासें २०७५य् छगू टेन्डर आव्हान यात । ३ अर्बया उगु टेन्डर ओम्नी व म्याक्स इन्टरनेसनल नांया कम्पनीं जेभी यानाः प्राप्त याःगु खः । तर उगु टेन्डरया स्पेसिफिकेशन ओम्नी व म्याक्स इन्टरनेसनल नांया कम्पनीयात जक मिलेजुइगु कथं दयेकातःगु खः । १ अर्बय् ज्या जुइगु प्रोजेक्टयात ३ अर्ब दयेकूगु व अज्याःगु टेन्डर नं केवल छगू जक कम्पनीयात मिलेजुइक दयेकूगु धासें तसकं विवाद जूगु खः । अझ अनलाइनपाखें बुझे यायेमाःगु टेन्डर तकं अनलाइन मार्फत मजूगुलिं थुकी तःधंगु हे भ्रष्टाचार जूगु आशंका यानातःगु दु ।

३. स्वास्थ्य सेवा विभाग नाप जूगु सम्झौता
कोरोनाया संक्रमण रोकथामया निंतिं स्वास्थय सेवा विभागं शुक्रवाः ओम्नीनाप सम्झौता याःगु दु । १ अर्बया सम्झौताय् आम्नीं बीत कबोल याःगु सामानया भाः तसकं थीके तःगु धासें विवाद जूगु खः । विश्वन्यंक महामारी जुयाच्वंगु इलय् तकं ओम्नी बजाः भाः स्वयां अप्व जुइकथं सरकारयात भाः बिउगु व वहे आधारय् सरकारं ओम्नी नाप सम्झौता याःगु खः । तर ओम्नीं कबोल याः कथंया सामानया १० प्रतिशत जक उपकरण हयेवं उगु सम्झौता बुधवाः रद्द जूगु दु । नापं ओम्नीं तःगु ५ करोडया धरौटी खारेज यायेगु व कालो सूची तयेगु प्रक्रिया नं सरकारं न्ह्याकूगु दु ।