वंशज नागरिकताया लुखा चाल

येँ – सर्वोच्च अदालतं जन्मया आधारय् नागरिकता काःपिनि सन्तानयात वंशजया नागरिकता बीगु लँपु चायेका बिउगु दु । सर्वोच्च अदालतया थ्व निर्णय कथं आः जन्मया आधारय् नागरिकता काःपिनि सन्तानयात वंशजया आधारय् नागरिकता बीगु लागिं फुक्कं सीडीओ ज्याकूयात अःपुका बिउगु दु ।

गृह मन्त्रालयया पौ कार्यान्वयन मयायेत अन्तरिम आदेशया माग यासें सर्वोच्चय् तःगु रिटय् मंगलवाः न्यायाधीशपिं हरिकृष्ण कार्की व बमकुमार श्रेष्ठया इजलासं अन्तरिम आदेश जारी यायेम्वाःगु निर्णय न्यंकूगु खः । गृह मन्त्रालयं चैत १९ गते पौ च्वयाः फुक्कं जिल्ला प्रशासन ज्याकूयात जन्मया आधारय् नागरिकता कायेधुंकूपिनि सन्तानयात वंशजया आधारय् नागरिकता बीत निर्देशन बिउगु खः ।

उगु हे कथं जिल्ला प्रशासन ज्याकुथिं नागरिकता इनेगु ज्या तकं न्ह्याकेधुंकूगु खः । तर गृह मन्त्रालयया पौ कार्यान्वयन मयायेत अन्तरिम आदेशया माग यासें वरिष्ठ अधिवक्ता बालकृष्ण नेउपानें प्रधानमन्त्री व मन्त्रिपरिषद् ज्याकूयात विपक्षी दयेकाः सर्वोच्च अदालतय् रिट तःगु खः ।

उगु रिटय् सुनुवाइ यासें न्यायाधीश पुरुषोत्तम भण्डारीया एकल इजलाशं पौ यथास्थितिइ तयेत आदेश बिसें मुद्दाया पक्ष व विपक्षीयात वैशाख ३ गते सहलहया निंतिं सःतूगु खः ।म्हिगः पक्ष व विपक्ष निगुलिं पक्षलिसे सहलह लिपा सर्वोच्चं निवेदकया माग कथं गृह मन्त्रालयया पौ कार्यान्वयन मयायेत अन्तरिम आदेश जारी यायेम्वाःगु निर्णय न्यंकूगु खः ।

सम्बन्धित बुखँ

LEAVE YOUR COMMENTS