विद्यार्थी–अग्रज कलाकारया कला ब्वज्या–छगू हे थासय्
थ्व इलय् नेपाली कलाया थीथी शैली, विषय व माध्यमयात कःघानाः चित्र व मूर्तिया ब्वज्या जुयाच्वंगु दु । थनया बबरमहलस्थित नेपाल आर्ट काउन्सिलय् न्ह्यानाच्वंगु ब्वज्या पुस्ताया ल्याखं अजू चायापु । छाय्कि थुगु कला ब्वज्याय् ज्याथगु पुस्तानिसें कयाः थौंया नच्चा नच्चापिनिगु तकं कलाकृति तयातःगु दु ।
अल्फ्रेस्को मिडिया एण्ड इभेन्ट म्यानेजमेन्ट प्रा.लि.या ग्वसालय् वंगु विहीवाःनिसें न्ह्यानाच्वंगु झिंन्यान्हुयंकंया कला ब्वज्याय् ज्याथपिं व न्हूपुस्ताया न्यासः स्वयां अप्वः कलाकारया द्वःछिं मल्याक कलाकृति तयातःगु दु । समसामयिक राजनीतिक व सामाजिक घटनाया विषयनिसें धर्म, संस्कृति, परम्परा, ग्रामिण परिवेश व जनजीवनया विविध आयाम पिज्वइकथंया कलाकृति ब्वज्याय् तयातयागु ग्वसाः खलकं जानकारी बिउगु दु ।
ब्वज्याया उलेज्या यासें नबिल बैंकया प्रमुख कार्यकारी अधिकृत अनिलकेशरी शाहं कलां समाजयात समृद्धिया दिशापाखे यंकीगु धापू तयादिल । नेपाःया थीथी सामाजिक पक्षयात कलाकारं क्यानभासय् किउगु ब्वज्याया संयोजक श्यामकृष्ण श्रेष्ठं कनादिल । वय्कःयाकथं ब्वज्याय् न्यासः स्कुलया च्यासः व अग्रज कलाकारया तकं यानाः द्वःछि कलाकृति तयातःगु दु ।
वय्कलं धयादिल, ‘थ्व प्रतियोगितात्मक ब्वज्यां दक्वं पुस्ताया कलाकारयात छगू हे थासय् हयेत सफल जूगु दु, नेपाली समाजया विविध आयाम व परिवेशयात कलात्मक रुपय् कःघाःगु दु ।’
उगु कला ब्वज्याय् अग्रज कलाकारपिं शशीविक्रम शाह, गेहेन्द्रमान अमात्य, शंकरराजसिंह सुवाल, जीवन राजोपाध्याय, सुषमा राजभण्डारी, रमेश खनाल, देवेन्द्र थुम्केली, अजित साह, राजेश मानन्धर, राजकृष्ण महर्जन, दीपेन्द्र बनेपाली, विक्रम प्रजापित, गजेन्द्रमान श्रेष्ठ, राजकुमार रानामगर, किशोर नकर्मी, विपना महर्जन, दिना श्रेष्ठ, राकेश श्रेष्ठ, सुनिलबाबु कार्की, झलक केसी, देवांशी काफ्ले लगायात कलाकारया कलाकृति तयातःगु दु ।
ब्वज्याय् विद्यालय जक मखसे २३ गू स्वयां अप्वः कलेजया विद्यार्थीया कलाकृति नं ब्वज्याय् तयातइगु आयोजक सदस्य दीपा विश्वकर्मां जानकारी बियादिल । प्रतिस्पर्धाय् सहभागि विद्यालय व कलेजया विद्यार्थीया उत्कृष्ट जूगु कलाकृतियात ब्वज्याय् तयागु कला ब्वज्याया संयोजक श्रेष्ठं कनादिल ।
ब्वज्याय् हिमालयन कलेजया दिपेश सिजाली मगरया थांका चित्रं न्हाप सिरपाः त्याकेत सफल जुल । ख्वप इन्जिनियरिङ कलेजया राहुल प्रजापतिया देवी कुमारिया चित्र लिउ व लिंकन कलेजया आकांक्षा सिंहा स्वयम्भूया चित्रं स्वंगू थाय्या निंतिं सिरपाः त्याकेत सफल जूगु दुसा मनिष ध्वँजु, नमुना तामाङ, मनोग्य विश्वकर्मां सान्त्वना सिरपाः त्याकेत सफल जूगु दु ।
थुकथं हे विद्यालयस्तरीय प्रतिस्पर्धापाखें छगूनिसें प्यंगू तगिंतक समूह ‘क’पाखें रोहना प्रधान न्हाप, सुक्रिया तामाङ लिउ व संयम अधिकारी लियांलिउ लाःगु दुसा अक्षभ्य गुरुङ, अरिस्का पोखरेल, युवानी सिंहं सान्त्वना सिरपाः प्राप्त याःगु दु । तगिं न्यागूनिसें न्हय्गू तकया समूह ‘ख’पाखें तमना अग्रवाल, निकेश बस्नेत, अस्मिना राई, छसिकथं न्हाप, लिउ व लियांलिउ लाःगु दु ।
स्तुति मूल, अलिशा आले व निशान्त लामां सान्त्वना सिरपाः प्राप्त यायेत सफल जूगु दु । थुकथं हे तगिं च्यागूनिसें १० गू तकया समूह ‘ग’पाखें देवांश अग्रवाल, खुश्बु तामाङ, नेहिका महर्जन छसिकथं न्हाप, लिउ व लियां लिउ लाःगु दुसा अदिति शेर्पा, बलिशा देलाल व अरिया तण्डुकारं सान्त्वना पुरस्कार प्राप्त यानादिल । थुगु कला ब्वज्या वइगु विहीवाः तक न्ह्याइ ।
LEAVE YOUR COMMENTS