नेपालभाषाय् साइकल सिरपाः

येँ (नेपालभाषा टाइम्स)- थनया दरवार स्कुलय् खुगू तगिमय् नेपालभाषा विषयय् दकलय् अप्वः हयाः पास जूम्ह विद्यार्थीयात साइकल सिरपाः बिउगु दु ।
खुगू तगिमय् दकलय् अप्वः हःम्ह विद्यार्थी व्यवस्ती शाहीयात म्हिगः

स्कुलया प्रधानाध्यापकं ‘हिराशोभा तुलाधर नेपालभाषा सिरपाः’ लःल्हाःगु खः । उगु हे ज्याझ्वलय् ५, ६ व ७ तगिमय् दकलय् अप्वः ल्याः हःपिं न्याम्ह न्याम्ह विद्यार्थीयात ‘ज्वजलपा’ सफू नं सिरपाः कथं लःल्हाःगु खः । फुक्क तगिमय् यानाः मुक्कं २७ म्ह विद्यार्थीयात सिरपाः बिउगु खःसा उकी मध्ये छम्हेसित साइकल सिरपाः नं बिउगु खः ।

नेपालभाषाया च्वमि कमलरत्न तुलाधरं थः मां हिराशोभा तुलाधरया नामं उगु सिरपाः स्वनादीगु खः । भाजु तुलाधरं येँ महानगरपालिकां ब्वंकाच्वंगु स्थानीय विषय ‘येँ देय् म्हसीके’ ब्वनीपिं त्यौड माविया उत्कृष्ट विद्यार्थीतय्त नं थुकथंया सिरपाः बीगु व्यवस्था यानादीगु दु ।

शिक्षकया नां बीत निर्देशन
थ्वहे झ्वलय् येँ महानगरपालिका शिक्षा विभागं मनपा दुने लाःगु फुक्कं निजी विद्यालयतय्त नेपालभाषा अनिवार्य रुपं ब्वंकेत इनाप यासें स्कुलय् थ्व विषय ब्वंकीम्ह शिक्षकया नां समेत छ्वया हयेत निर्देशन बिउगु दु । लिसें थ्व विषयय् छु छु पिरियडय् ब्वंकेगु यानाच्वंगु खः, उकिया रुटिन समेत छ्वया हयेत नं निर्देशन बिउगु दु ।

येँ मनपाया अधिकांश निजी स्कुल–तय्सं थ्व विषय ब्वंकेगु शुरु यायेधुंकूगु दुसा अन ब्वंकीपिं शिक्षकतय्त तालिम बीगु ज्या नं न्ह्यानाच्वंगु दु ।