च्यागः हेलिकप्टर आकस्मिक अवतरण
येँ – मौसम बांमलाःसां उडान याःगु च्यागः हेलिकप्टरं मंगलवाः आकस्मिक अवतरण यायेमाःगु दु । त्रिभुवन अन्तर्राष्ट्रिय विमानस्थलं धाःकथं लुक्लाया सुर्कें ब्वयेकूगु थीथी कम्पनीया विमानयात थथे आकस्मिक अवतरण यायेमाःगु खः । लुक्लाया मौसम सामान्य सुधार खनेदयेवं हेलिकप्टर ब्वयेकूगुलिं थथे आकस्मिक अवतरण यायेमाःगु खँ धाःगु दु ।
लुक्लाय् वंगु स्वन्हु न्ह्यवनिसें मौसम स्यनाच्वंग्ु दु । मंगलवाः सामान्य सुधार जुइवं लुक्ला विमानस्थलय् अनुमति कयाः हेलिकप्टर ब्वयेकल, तर देय्न्यंकंया मौसमयात ध्यान मतःबलय् छुं भचा न्ह्याः वनेवं छुं हे खनेमदयेवं आकस्मिक अवतरण याःगु खः । सिम्रिक एयरया छगः व कैलाश एयरया छगः हेलिकप्टर पाँचखालय्् आकस्मिक अवतरण याःगु खः ।
अथेहे ९ एन अल्फा नोवेम्भर ब्राभो कलसाइनया हेलिकप्टर फाप्लुइ अवतरण याःगु दु । मनाङ एयरया छगः व श्री एयरया छगः हेलिकप्टर रामेछापय् आकस्मिक अवतरण याःगु खः । अथेहे अल्टिच्युड एयरया हेलिकप्टर रोशी खाला लिक्क, समिट एयरया छगः हेलिकप्टर वासाय् आकस्मिक अवतरण यायेमाःगु खँ धाःगु दु ।
च्यागः हेलिकप्टर आकस्मिक रुपं अवतरण जूगु थ्व हे न्हापांखुसी खः । हेलिकप्टर कम्पनीतय्सं नाफायात जक ध्यानय् तयाः हेलिकप्टर ब्वयेकूगुलिं थथे च्यागः÷च्यागः हेलिकप्टर आकस्मिक रुपं अवतरण यायेमाःगु खँ धाःगु दु । सगरमाथा क्षेत्र चाःहिउ वःपिं पर्यटकत वंगु आइतवाः निसें मौसम खराब जूगुलिं लुक्लाय् हे अलपत्र जुयाच्वंगु खः ।
अन प्यसलं मल्याक पर्यटक अलपत्र जुयाच्वंगु खः । मौसम भचा सफा जुइवं पर्यटकतय् दबाब व हेलिकप्टर कम्पनीतय्सं नाफाय् जक ध्यान बियाः मेथाय्या मौसमयात वास्ता हे मयासे हेलिकप्टर ब्वयेकूगु खः । विमानस्थलया छम्ह वरिष्ठ अधिकारीं धाःगु दु, ‘हेलिकप्टर कम्पनीतय्सं मौसम स्वयेगु एप छकः तक हे मस्वःगु खनेदत ।
सामान्य मनुखं तकं मौसमया जानकारी कायेत एप स्वइगु जमानाय् कम्पनीतय्सं हेलिकप्टर ब्वयेके न्ह्यव मेथाय्या मौसमया जानकारी मकाःगु धयागु नाफाय् जक ध्यानय् तःगुलिं खः ।
थज्याःगु ज्यां तःधंगु दुर्घटना जुइफु । तर भाग्यं हे धायेमाः थ्व पालय् च्यागः च्यागः हेलिकप्टर आकस्मिक अवतरण यायेमाःसां छुं दुर्घटना धाःसा मजुल ।’मेखे हलिकप्टर कम्पनीतय्सं धाःसा थथे आकस्मिक अवतरण जुइगु धयागु सामान्य खँ खः धाःगु दु ।
LEAVE YOUR COMMENTS