सेनाय् च्याद्वः कर्मचारी माग

येँ – नेपाली सेनाय् थीथी पदया निंतिं च्याद्वः व १०२ म्ह कर्मचारी भर्ना याइगु जूगु दु । सेनां लेखा जमदार, सैन्य मेडिकल, सैन्य सिग्नल, सैन्य ड्राइभर, सैन्य वाद्यवादक, कुचिकार, सुचिकार, धोवी, सयस, सिकर्मी, माली, अमल्दार कर्मचारी, केशकर्तक, सहायक पण्डित पदया निंतिं कर्मचारी माग याःगु खः । सेनां सैन्य सेवाया निंतिं जक ७ हजार ६३५ म्ह कर्मचारीया माग याःगु खः ।

सेनां देय्न्यंकंया २९ गू भर्ती केन्द्र पाखें कर्मचारी काइगु खँ धाःगु दु । सेनाय् भर्नाया निंतिं वइगु वैशाख ३ गते निसें २९ गते तक थीथी भर्तीकेन्द्रपाखें आवेदन बीफइ ।

लेखा जमदार पदया निंतिं म्होतिं प्लस टु पास जूसा गाः, अमल्दार कर्मचारीया निंतिं एसएलसी व सैन्य ड्राइभर, सैन्य वाद्यवाधकया निंतिं च्यागू कक्षा पास जूसा गा । कर्मकाण्डया निंतिं सहायक पण्डित पदया निंतिं ३०० पूर्णांकया संस्कृत विषय कयाः प्रवेशिका परीक्षा उत्तीर्ण जूगु जुइमाः ।