दुरुया भाः थहां वन । छगू पाकेटय स्वतका दां अप्वल । पिनें दुरुया भाः थहां वंगु खनेदइ । उकिया लिच्वः मेमेगुलिइ नं लाः वनी । आः च्याया भाः नं थहां वनी । पाउरोटीया भाःला यक्व हे यक्व वाः न्ह्यः हे थहां वनेधुंकल । छुचुं पाकेटया भाः नं अथे हे थहां वनी । भाः थहां वनीगु न्हूगु खँ मखु । उद्योगपति, व्यापारीतय् मनय् लुल कि भाः थकाइ ।

छाय् ? छु खँय् ? कारण चिउताःतय् माःगु जिम्मेवारी, सरकारया खः । तर । देय्या सरकार हे लोभी, पापी, उद्योगपति, व्यापारीतय् चंगुलय् । जनताया निंतिं भाः नियन्त्रण यायेगु ला गन ! अःखबतं सरकारं न्ह्याम्हेसिनं न्ह्याथे यानाः भाः थकाःसां मखं छू यानाच्वनी । यानाबी । स्पष्टिकरण कायेगु गन खः गन ।

मौन स्वीकृति बियाः उद्योगपति, व्यापारीतय्त अखबतं थः यथे चलखेल यायेगु अवसर बियाच्वन ि। थौं सरकारं समृद्धिया खँ हइ । न्हाय्पं हे थ्वक्क प्रचार यानाच्वनी । तर । सरकारं हल्ला यानाच्वंगु समृद्धि धाःगु छु ? मूर्त, स्पष्ट मजू । ततजाःगु छेँखात, आधुनिक होटल, अस्पतालतय् संख्या वृद्धिं जक देय्या विकास व समृद्ध जूगु प्रमाणित जुइमखु ।

समृद्धि, विकासया नामय् अन धनपति, पूँजीपति, शोषक, सामन्ततय् स्वार्थ अनुकूलया समृद्धि, विकास जक खने दइ, न्ह्याः वनी । उकिं सरकार सत्ताधारीतय्सं वि कास, समृद्धिया भजन हालां जन मगाः, सर्वसाधारण जनताया दृष्टिं समृद्धि, विकास छु खः कार्यान्वयन यायेमाः । वप्रति प्रतिवद्ध जुइमाः । तर ।

अपसोच थौं नाराय्, भाषणय् आम जनताया नां जपे याःसां सरकारया ध्यान, आम सर्वसाधारण जनताप्रति वनाच्वंगु मदु । अःखः आम जनतायात माःगु अत्यावश्यक वस्तुतय् मनोमानी भाः वृद्धिं आम जनताया जीवन झंझं कठिन व कष्टप्रद याना बिउगु दु । च्या छगू कप व पाउरोटी निकू नयाः प्वाः जायेकेमाःपिं गरिब जनतातय्त दुरु व पाउरोटीया भाः वृद्धिं आर्थिक भार तना बिउगु दु ।

ततजाःगु छेँखात, आधुनिक होटल, अस्पतालतय् संख्या वृद्धिं जक देय्या विकास व समृद्ध जूगु प्रमाणित जुइमखु । समृद्धि, विकासया नामय् अन धनपति, पूँजीपति, शोषक, सामन्ततय् स्वार्थ अनुकूलया समृद्धि, विकास जक खने दइ ।

उखेंथुखें, त्यःमत्यः विचाः मयासे अन्धाधुन्ध कमे याना जुइपिंत पाउरोटी, दुरु, चिनी, छुचुंया भाः थहां वनां छुं मतलब दइमखु । इमित थज्याःगु भाः वृद्धि इमूचां न्याइ थें तिक्क नं मिनी मखु । उकिं अत्यावश्यक वस्तुया भाः थकायेबलय् दुपिं, फुपिं धनाढ्य मनूतय्त जक ध्यानय् तयां मगाः ।

अत्यावश्यक वस्तुया भरय् म्वायेमाःपिं आर्थिक विपन्न वर्गयात थुकिं लाइगु मारयात नं विचाः यायेमाः । च्या छगू कप, निकू पाउरोटी, छुचुं मरि निपा नयाः जक म्वायेमाःपिं, म्वाये फुपिं जनतातय्त थौं झं झं जीवन निर्वाह यायेत कठिन जुयाच्वंगु दु । गुलिं देशय् प्याजया किलोय् झिगः ध्यबा थहां वनकि जनता दनी ।

सरकार, व्यापारीतय् विरोधय् आम्दोलन याइ । अझ ला सरकार हे क्वथला बी । सजक, सचेत जनतां आम जनताया जीवनय् प्रभावित याइगु गलत ज्यायात सह याइमखु । प्रतिवाद याइ । झीथाय् देशय् आम रुपं प्रभावित जनतायाके न्ह्याथेंज्याःगु मार, कष्ट फयेमाःसां उकिया विरोधय् सः थ्वयेकेगु तागत मदु ।

अःखबतं थःगु हे भाग्यययात दोष बियाः दुःख, कष्ट फयाच्वनी ।देशय् थौं फुक्क योजना, विकासया ज्याझ्वःत आम जनताप्रति लक्षित मखु । अनेक स्वार्थंप्रेरित भ्रष्ट दलाल ठेकेदार, माफियातय् इशाराय् जुइ । देशय् ततःधंगु अस्पताल दयां छु याये । आम जनतां अत्यावश्यक स्वास्थ्य उपचार नं काये फइगु स्थिति मदु ।

शिक्षा नं धनी वर्गतय् विशेष अधिकारया ख्यः जुइ । म्वायेगु संघर्षय् शक्ति दुपिं म्वाइ, दुर्बलपिं सी । डार्विनं धाःथें देय् शक्ति दुपिनिगु एक्का जुइ । शक्ति मदुपिं निर्बलपिं म्वायेगु अधिकार दइमखु । प्रकृतिया नियम जुइ । थौं देशय् सरकार कम्युनिष्टया जुइ । प्रतिपक्ष समाजवादी । नेतातयसं नारा, भाषणय् लाछि मलाछिं थःपिं जनता, गरिब दीन दुःखीया निंतिं समर्पित धाइ ।

दावा याइ । थौं सरकार, नेतातय्सं सः थ्वयेकी ‘कम्युनिज्म थौं खतराय् । प्यखेरं थ्वयात आक्रमण ।’ जनतायात क्वाकेत स्वइ । दुःखया खँ । थौं महत्वकांक्षी कथित नेतातय्सं थः प्रतिया खतरायात कम्युनिज्मप्रतिया आक्रमण धाइ । जनतायात गुमराह यायेत स्वइ । थौं जनतायात माःगु अत्यावश्यक वस्तुया भाः वृद्धिया विरोध नं कम्युनिज्मया विरोध खः ला ?!

नेताजुपिं ! खतराय् लाःगु छिकपिनि कम्युनिष्ट सरकारय् जनता गन दु ? क्यनादिसँ, मखुसा डार्विनं धाःथें म्वायेगु संघर्षय् बलवान म्वाइ, कमजोर सी, तप्यंक घोषणा यानादिसँ । छाय् छलछाम !

सम्बन्धित बुखँ

LEAVE YOUR COMMENTS