जोशीयात आरोप हे बियाः चीकीगु

येँ – प्रधानन्यायाधीश नियुक्तिया ज्या म्हिगः नं मजुल । प्रधानन्यायाधीश पदय् वनेत सिफारिस जुया वःम्ह कावा प्रधानन्यायाधीश दीपकराज जोशीया नांयात स्वीकार यायेत समस्या जूगुलिं म्हिगः नं संसदीय सुनुवाई समितिं थुकिया निर्णय मयाःगु खः ।
जोशीया नां न्ह्याथे यानाः नं पारित यायेमाः धकाः नेपाली कांग्रेसं दबाब बियाच्वंगु दुसां सत्तारुढ पार्टी नेपाल कम्युनिष्ट पार्टीं धाःसा वय्कःयात अस्वीकार यानाच्वंगु दु । सुनुवाई समितिया १५ म्ह दुजः मध्ये झिम्ह जोशीया विपक्षय् दु ।

खास यानाः जोशीया शैक्षिक प्रमाण निगू लुया वःगु व जन्म मिति समेत निगू दुगु कारणं वय्कःयात प्रधानन्यायाधीश थेंज्याःगु गरिमामयी पदय् तये मजिउगु तर्क नेकपां बियाच्वंगु दु । वय्कःयात थज्याःगु आरोप बियाः अस्वीकार यायेबलय् प्रतिष्ठाय् घाः लाइ धकाः नेकपापाखें वय्कःयात थम्हं हे राजीनामा बियादिसँ धकाः सन्देश छ्वःगु खः । तर वय्कलं राजीनामा बीत अस्वीकार यानादीगुलिं आः आरोप हे बियाः अस्वीकार यायेगु तयारी नेकपां यानाच्वंगु खँ सीदुगु दु ।

२०७१ सालय् न्यायाधीश नियुक्तिया लागिं सुनुवाई जूगु इलय् नं तत्कालिन एमाले व माओवादीं जोशीया विपक्षय् मत तःगु खः ।
थ्वहे झ्वलय् कावा प्रधानन्यायाधीश जोशीं थः न्यायाधीश जुयाच्वंगु इलय् स्वनिगःया थीथी गुथि व सरकारी अधिनय् लानाच्वंगु जग्गात व्यक्तिया नामय् पास यायेगु फैसलात याना तःगु खँ नं सार्वजनिक जूगु दु । थनिं दछि न्ह्यः नं वय्कलं वालुवाटार लिक्कसं च्वंगु छगू

सरकारी जग्गाय् छेँ दंवःम्ह राजेश शमशेर राणायात अन छेँ दनेगु रोके याये मते धकाः सरकार व येँ महानगरपालिकायात आदेश बिउगु खः । अबले राणाया पक्षं वकालत याःम्ह अधिवक्ता शम्भु थापा खः ।

अथे हे वय्कलं येँया नरलय् च्वंगु छगू स्थानीय गुथिया जग्गा नं पिने जिल्लां वःम्ह मनूया नामय् दर्ता याना बिउगु खः।

सम्बन्धित बुखँ

LEAVE YOUR COMMENTS