सरकारी ज्याखँया भाषा निर्धारण यायेत दबाब

येँ (नेपालभाषा टाइम्स)- नेवाः देय् दबू स्वनिगः विशेष प्रदेशपाखें संस्कृति पर्यटन तथा नागरिक उड्डयन मन्त्री जीवनराम श्रेष्ठ लगायत भाषा आयोगय् समेत डेलिगेशन वनाः आयोगया सिफारिस कथं बागमति प्रदेशय् नेपालभाषा व तामाङ भाषायात सरकारी ज्याखँया भाषा कथं लागू याकेत इनाप यात ।

उगु इलय् मन्त्री श्रेष्ठं भाषा आयोगया सिफारिस कथं बागमति प्रदेशय् नेपालभाषा व तामाङ भाषायात सरकारी ज्याखँया भाषा कथं लागू याकेगु नितिं भूमिका म्हितेगु बचं बियादिल । उकिया नितिं बागमति प्रदेशलिसे थम्हं समन्वयकारी भूमिका म्हितेगु बचं नं वय्कलं बियादिल ।

उगु डेलिगेशनय् नेवाः देय् दबू स्वनिगः विशेष प्रदेशया नायः श्रीकृष्ण महर्जन, न्वकु प्रा.डा. अमिता प्रधान शाक्य, मू छ्याञ्जे गणेशमान श्रेष्ठ, छ्याञ्जे गंगादेवी महर्जन व तोखाया समाजसेवी अष्टनारायण डंगोलपिनि उपस्थिति दुगु खः ।

उगु हे कथं साउन १६ गते सोमवाः भाषा आयोगया सिफारिस कथं नेपालभाषा व तामाङ भाषा बागमति प्रदेशय् सरकारी कामकाजी भाषाकथं लागू याकेगु सवालय् नेवाः देय् दबू स्वनिगः विशेष प्रदेशया पदधिकारी नापं जिल्ला नायःपिं भाषा आयोगया ज्याकुथिइ हे वनाः भाषा आयोगका सदस्य भाषाविद् अमृत योञ्जनलिसे सहलह ब्याकूगु खः ।

उगु इलय् संघीय सरकारया संस्कृति पर्यटन तथा नागरिक उड्डन मन्त्रालयपाखें बागमति प्रदेशय् छ्वःगु पौया नक्कल नं लःल्हायेगु ज्या जूगु खः । आयोगया सदस्य योञ्जनं नेवाः व तामाङ समुदायया मातृभाषायात बागमति प्रदेशय् ज्याखँया भाषा कथं कार्यान्वयन याकेगु नितिं थम्हं माःगु कथंया भूमिका म्हितेगु बचं बियादिल । ज्याझ्वलय् नेवाः देय् दबू स्वनिगः विशेष प्रदेशया नायः श्रीकृष्ण महर्जन लगायतया प्रतिनिधिपिनि उपस्थिति दुगु खः ।