मेयरया सुचंयात कडा आपत्ति

येँ (नेपालभाषा टाइम्स)- येँ महानगरपालिकाया म्हिगः च्वंगु कार्यपालिका बैठकय् सर्वोच्च अदालतं याःगु खुसि सिथय् च्वंगु जग्गा सम्बन्धी न्हूगु मापदण्डया विषयय् नं खँ पिहां वःगु दु । बैठकय् थीथी वडाया अध्यक्ष लिसें मनपाया उपमेयरं सर्वोच्च अदालतं खुसि सिथय् न्हूगु मापदण्ड दयेकाः आदेश जारी यायेवं येँ महानगरपालिकां उकियात समर्थन यानाः सुचं जारी याःगु गलत जुल धकाः असन्तुष्टि प्वंकादीगु खः ।

बैठकय् न्ववासें येँ मनपाया उपमेयर सुनिता डंगोलं खुसि सिथय् च्वंगु जग्गाया मापदण्ड बारे नगर प्रमुखस्तरीय धकाः पिहां वःगु सुचं प्रति आपत्ति प्वंकादिल । मनपां थ्व बारे छु न्ववाइ धइगु खँ थःपिंसं सुचं ब्वनाः सीकेमाःगु विडम्बनाया खँ खः धासें उपमेयर डंगोलं मेयर बालेन साहया शैलीया आलोचना यानादिल । थ्व विषयय् सुचं पिकाये न्ह्यः बोर्डय् हयाः छलफल यायेमाःगु खःधासें वय्कलं न्ह्यसः तयादिल, ‘बोर्डय् चिचीधंगु खँ वयाच्वंगु दइ, स्थानीय जनता लिसे प्रत्यक्ष सरोकार दुगु थ्व विषय चाहिँ छाय् दुहां मवल ?’

महानगरपालिकाया थ्व छगू सुचंया कारणं जनता आतंकित जूगु व थुकिया बारे न्यनेकने यायेत मनूत वडा वडाय् थ्यनेधुंकूगु खँ कँसें वय्कलं अदालतया फैसलाया पालना यायेमाः खः तर उकी चित्त बुझे मजूसा पुनरावलोकनय् वनेगु लँपुज्वनेमाः धयादिल ।

बैठकय् महानगरपालिकाया प्रवक्ता लिसें १७ वडाया अध्यक्ष नविन मानन्धरं खुसि सिथया न्हूगु मापदण्ड बारे मनपां पिकाःगु सुचनं यानाः जनता आतंकित जूगुलिं उकिया बारे बिचाः यायेमाः धयादीगु खः ।

अथे हे २३ वडाया अध्यक्ष मचाराजा महर्जनं थ्व फैसलापाखें मेमेगु नगरपालिकात नं प्रभावित जूगु दु तर उपिं हथाय् मचाःसा येँ मनपा जक सुचं पिकायेत छाय् हथाय् चायेमाःगु धकाः न्ह्यसः तयादिल । थ्व सुचनं यानाः जनता आतंकित जूगु व बैंकत समेत प्रभावित जूगु खँ नं वय्कलं कनादिल । येँ मनपा थःपिंसं हे मनोहरा खुसि सिथय् ल्याण्डपुलिङ परियोजना सञ्चालन यानाः जनतायात ९ मिटरया मापदण्ड दयेकाः जग्गा मीगु व नक्सापास यायेगु ज्या यानाः आः मनपा थम्हं हे ४० मिटर तक छेँ दने दइ मखु धायेगु पाय्छि मजूगु तर्क नं वय्कलं तयादिल ।

वय्कः न्ववानाच्वंगु इलय् मेयर मेयर साहं ‘अथे खःसा मनपां उगु सुचं पिकाये मजिउ धइगु छिगु धापू खः ला ?’ धकाः न्ह्यसः तयादीगु खः । लिसलय् वडा अध्यक्ष महर्जनं पिकाये जिउ लाकि मजिउ धइगु खँ छलफलपाखें निर्णय यायेमाःगु खः, छलफल हे मयासे निर्णय याःगु चाहिँ गलत खः धकाः लिसः बियादीगु खः ।

थ्व सहलह जुयाच्वंगु इलय् मनपाया कानुन अधिकृत बसन्त आचार्यं सर्वोच्चया रिटय् मनपायात नं विपक्षी दयेकातःगु जुयाः तत्काल रेस्पोन्ज यायेत सुचं पिकाये माःगु खः धकाः लिसः बियादीगु खः ।
थीथी जनप्रतिनिधितय्सं न्ह्यसः पिकाःसां मेयर साहं धाःसा उकिया लिसः बियामदी । अन्तिमय् वय्कलं छक्वलं हे ‘थौंया बैठक क्वचाल’ धकाः जनाउ बिसें थः खुरुक्क दनावंगु खः ।