चीनं हःगु र्यापिड टेस्टकिट मछ्यलेत मन्त्रालयया हे निर्देशन

प्रदेश नं. १ या चिकित्सकतय्सं पिपिइ छ्यलेत अस्वीकार यात

कोरोना भाइरस परीक्षण स्वास्थ्य मन्त्रालयं हे चीनं न्यानाहःगु र्यापिड टेस्ट किट मन्त्रालयं हे मछ्यलेत निर्देशन बिउगु दु । मन्त्रालयया स्वास्थ्यविज्ञ डा. खेम कार्कीं छगू विज्ञप्ति जारी यासें चीनं न्यानाहःगु टेस्ट किट मछ्यलेत निर्देशन बिउगु खः । मन्त्रालयं थ्व टेस्ट किटया गुणस्तर निक्र्यौल यायेधुंकाः जक छ्यलेगु खँ धाःगु दु ।

स्वास्थ्य मन्त्रालयं चीनं मेडिकल सामान न्यानाहःगु थौंकन्हय् तसकं विवादय् लानाच्वंगु दु । बजाः भाः स्वयां प्यंदुगु अप्वः भाः पुलाः न्यानाहःगु सामान नं गुणस्तरहीन लानाच्वंगु दु । सरकारं हःगु थ्व किट विश्व स्वास्थ्य संगठनं बियातःगु मापदण्ड दुने मलाःगुलिं हे थुकियात मछ्यलेत मन्त्रालयं पाखें हे निर्देशन वःगु खः । मन्त्रालयं आः थ्व किटया गुणस्तर जाँच यायेत नेपाल स्वास्थ्य अनुसन्धान परिषद्यात इनाप यायेधुनागु व परिषद्या सिफारिस कथं जक छ्यलेगु मछ्यलेगु निर्णय यायेगु खँ धाःगु दु । मन्त्रालयं पित बिउगु विज्ञप्तिइ धाःसा थ्व किट चीन सरकारपाखें प्रमाणित यानातःगु हे किट जूगु खँ धयातःगु दु ।

मेखे सरकारं थ्व किटया लिसें हे न्यानाहःगु पिपिई नं ज्यालगे मजूगु खँ सीदुगु दु । पिपिइ धकाः हःगु सामानय् गाउन छपाः जक दुगु खँ धाःगु दु । प्रदेश नं. १ या चिकित्सकं सरकारं इनेहःगु पिपिइइ गाउन छपाः जक दुगु धासें थज्याःगु पिपिई पुनाः सुरक्षित जुइमखु धकाः पिपिइ पुनेत हे अस्वीकार याःगु दु ।

स्वास्थ्य मन्त्रालयं हःगु थ्व सामान प्रदेश सरकार मार्फत बिपी अस्पताल धरानय् हःगु पिपिई गाउन छपाः जक दुगु लूगु खः । चिकित्सकतय्सं धाःसा पिपिइ धायेवं पुरा म्ह छम्ह त्वपुइगु लँ सुरुवाः लिसें ख्वाः त्वपुइगु मास्क, पञ्जा फुक्कं दयेमाःगु खँ धाःगु दु । गाउन छपाः जक वयेवं प्रदेश १ या मुख्यमन्त्रीं हे पिपिइ मइनेत निर्देशन बीधुंकूगु दु ।

स्वास्थ्य मन्त्रालयं छगू ओम्नी नांया छगू निजी कम्पनी मार्फत थ्व सामान आयात याःगु खः । सामानयात कयाः तसकं विवाद वयेवं सरकारं ओम्नीलिसे सम्झौता हे रद्द यायेधुंकूगु दु । ओम्नी अझ निगू लट थज्याःगु सामान हये ल्यं दनि ।

मेखे स्वास्थ्य मन्त्रालयं चीनं सामान न्याना हयेगु झ्वलय् अनियमितता याःगु धासें स्वास्थ्यमन्त्री भानुभक्त ढकाल विरुद्ध अख्तियारय् नं उजुरी लायेधुंकूगु दु । बजारय् स्वद्वः तकां लाइगु पिपिइ तकं सरकारं खुद्वलं मल्याक पुलाः न्यानाकाःगु खः ।