सेलिब्रेटिङ्ग सक्सेसफुलय् स्वतन्त्रयात ग्वाहाली
येँ – ‘भुतुमालि ब्वये थें…’ म्यूजिक भिडियोया अपार सफलताया लसताय् खोनाया कार्यविनायकस्थित खोकना पार्टी भेन्युया हलय् वंगु बिहिवाः ‘सेलिब्रेटिङ्ग सक्सेसफुल म्यूजिकल प्रोग्राम’ तःजिक क्वचाल ।संसार क्रियसन्सया ग्वसालय् यल महानगरपालिका २१ वडा खोनाया विशेष ग्वाहालिइ जूगु उगु ‘सेलिब्रेटिङ्ग सक्सेसफुल म्यूजिकल प्रोग्राम’ संसार क्रियसन्सया क्रियटिभ डिरेक्टर स्वतन्त्र संसार महर्जनया सभापतित्वय् न्ह्याःगु खः । उगु ज्याझ्वलय् मूपाहां कथं यल महानगरपालिका २१ वडा खोनाया वडाध्यक्ष रविन्द्र महर्जन झाःगु खःसा विशेष पाहां कथं लोकंह्वाःम्ह बरिष्ठ अभिनेतालिसें चलचित्र कलाकार संघया नायः रविन्द्र खड्का झाःगु खः ।
ज्याझ्वलय् ‘भुतुमालि ब्वये थें’ म्यूजिक भिडियोया कलाकार, प्राविधिकलिसें ग्वाहालिमिपिंत मतिनाया चिं व हनापौ लःल्हाःगु खः । ज्याझ्वलय् कलाकार स्वतन्त्र संसार महर्जनया जीवनय् आधारित म्यँे नं न्ह्यब्वःगु खः । पवन जोशीं च्वयादीगु व अनिल तुलाधरं लसय् हनादीगु उगु म्येँय् सरीता शाही व कृष्ण महर्जनं सः बियादीगु खः । उगु ज्याझ्वलय् भुतुमालि ब्वये थें म्यँे नं पूजा सुनुवार व मचाराजा महर्जनं न्ह्यब्वःगु खः । थुगु म्येँ अनिल तुलाधरया संगीत व पवन जोशीया च्वसाय् पिहां वःगु खःसा नेपालभाषा संगीत ख्यलय् युट्युबय् छन्हुया दुने खुद्वलं मल्याक्क भ्युअर्सं स्वयाः अतिकं लोकंह्वाःगु खः ।
ज्याझ्वःया निगूगु ब्व कथं ‘सेलिब्रेटिङ्ग सक्सेसफुल म्यूजिकल प्रोग्राम’ जूगु खः । उगु ज्याझ्वलय् दकलय् न्हापां संगीत ख्यलय् नवोदित गायक भुवन महर्जनं थःगु न्हूगु मचाम्येँ हालाः न्यंकादीगु खः ।ज्याझ्वलय् स्वतन्त्र संसार महर्जनं नेपालभाषा संकिपा ख्यःया नायिकापिं आराध्यलक्ष्मी खड्गी, सरीता बज्राचार्य, शोभा महर्जन, अनु महर्जन व यासिना सञ्जु महर्जनपिंत दबुली सःताः न्हूगु संकिपा ‘कलियुगया किसनचा’य् उपिं न्याम्ह मिसा कलाकारपिन्त दुथ्याकागु जानकारी बिसें सरप्राइज बियादीगु खः ।
संसार क्रियसन्सया क्रियटिभ डिरेक्टर कलाकार स्वतन्त्र संसार महर्जन तुतिं चुइमफुगु ल्वचं पीडित जुयाच्वंगुलिं आः याकनं हे अपरेशन यायेत्यंगु दुसा ज्याझ्वलय् ब्वति काःपिं थीथी व्यक्तित्वपिंसं भाजु महर्जनया उपचारया नितिं आर्थिक ग्वाहालि नं लःल्हाःगु खः । लिसें थीथी व्यक्ति व संघसंस्थापाखें ग्वाहालि यायेगु बचं नं अन बिउगु खः । ज्याझ्वलय् समाजसेवी हसना शाक्यपाखें १५,००० तका, लूनिभाः बाल सरोकार समूह यलपाखें ५०,००० तका, अस्ट्रेलियाय् च्वनादीम्ह सुयश महर्जनं ५०,००० तका, पूजा श्रेष्ठं २०,००० तका, किशोर जङ्ग रानां १०,००० तका, श्याम महर्जनं ५,००० तका दां स्वतन्त्र महर्जनया उपचारया नितिं ग्वाहालि लःल्हाःगु खः ।
अथेहे, भाजु महर्जनया उपचार यायेगु नितिं यल महानगरपालिकालिसे नं ग्वाहालिया नितिं सहलह जुयाच्वंगु जानकारी यल महानगरपालिका २१ वडा खोकनाया वडा नायः रविन्द्र महर्जनं बियादीगु दु ।
LEAVE YOUR COMMENTS