सचेत नेतां जक देशयात मुक्त याइ

विश्वया इतिहासं क्यनाच्वंगु दु, तानाशाही राजतन्त्रयात वांछ्वयेगु लागि जनतां छप्पँ जुयाः जनक्रान्ति मार्फत तानाशाहीयात सत्तां चीका छ्वजइ । जब क्रान्ति सफल जुइ, हानं सामन्ती संस्कारया सोचं ग्रस्त जूपिं चतुर नेतात हे सत्ता संचालन यायेथाय् न्ह्यःने थ्यनी । सामन्ती संस्कारया अर्थ नकारात्मक सोच दुपिं धायेगु याः ।

जब नकारात्मक सोच दुपिं नेतातय्सं संचालन याइ उमिके देश संचालन यायेगु खुबी दइ मखु । देश संचालन यायेगु खुबी मदुपिंसं सत्ता संचालन यात कि छखे देशय् अराजक स्थिति हयाः जनतायात कष्ट बियाच्वनीसा मेखे विदेशी दलाल जुयाः देशया सम्पत्ति लुटे यायेगु ज्या यानाच्वनी । युरोपया फ्रान्स नं छगू अज्याःगु देश खः, गनं जुजुयात जनक्रान्ति मार्फत सत्ता वांछ्वयेत सफल जुल ।

क्रान्ति लिपा वःपिं नेतातय्गु महत्वाकांक्षा व व्यक्तिगत स्वार्थया कारणं देशय् चरम अशान्ति व अराजकता ब्वलन । क्रान्ति लिपा छगू पार्टीं मेगु पार्टीया नेता व कार्यकर्तायात भौतिक कारवाही व हत्या तकं यायेगु ज्या यानाच्वनी । दँदँ तक हत्या हिंसाया श्रृंखला मदिसेंलि फ्रान्सया जनतां तसकं हे निराश व भयावह अवस्थाय् म्वायेत बाध्य जुल । देशय् अशान्ति, अराजकता अव्यवस्था चरम रुपं न्ह्याः वनेवं सेना दुने हे नेपोलियन बोनापार्ट थः न्ह्यःने बढे जुल ।

फुक्क धइथें पार्टीया नेतातय्त ठिक थासय् हयाः देशय् शान्तिपूर्वक शासन यानाच्वनेत सफल जुल । नेपोलियनं शान्तिपूर्वक शासन यायेफुगु कारण मध्ये निगू खनेदु– छगू नियम कानूनयात कडाया नापनापं, स्वास्थ्य व मेमेगु क्षेत्रय् सुधार याना वन धाःसा मेखे क्रान्तिया इलय् गामं शहरय् वयाच्वंपिं गुण्डा, फताहा, बेइमान मनूतय्त गामय् तुं लिना छ्वयेगु ज्या यात । जब नकारात्मक व्यक्तितय्त गामय् तुं लिना छ्वयेसातकि पेरिसय् शान्ति जुल ।

नेपोलियन तानाशाह खःसां नं देशभक्त विवेकी दुम्ह नेता खः । देशभक्त तानाशाह जुयाच्वंगुलिं नकारात्मक नेतातय्त माइनस यायां देशयात प्रगतिया लँय् यंकाः शक्तिशाली फ्रान्स दयेकेत सफल जुल । फ्रान्सया इतिहासं थ्व नँ क्यना बिल यदि भिंम्ह शासकया ल्हातय् सत्ता लात धाःसा देशया विकास याउँक यायेफु । नेपोलियन देशभक्त जूगुलिं यानाः तानाशाह खःसां नं फ्रान्सया जनता जक मखु, विश्वया जनता तकं लुमंकेगु यानाच्वंगु दु ।

झीगु देशय् नं जंगबहादुर थःगु ल्हातय् शासन काये न्ह्यः जुजु व लानिया दथुइ जक राजनीति खिचलो जुयाच्वंगु मखु, भारदारया दथुइ नं चकोृ राजनीतिया षडयन्त्रया कारणं यानाः देशय् अराजक व अन्योल जुयाच्वंगु ई खः । व इलय् विशेष यानाः पाँडे, थापा, ठकुरी व सिंहया दथुइ चर्को षडयन्त्रया खेल जुयाच्वनीगु खः । वहे मौकाय् जंगबहादुर कोतपर्व यानाः नेता व सेनाया उच्च पदाधिकारीतय्गु हत्या यानाः श्री ३ पदवी कयाः देशया शासन थःगु ल्हातय् काःगु खः ।

राणात तानाशाह जुयाः जनतायात दुःख बीगु याःसां देशया सार्वभौम सत्ताय् आँच वइगु ज्या धाःसा याःगु खनेमदु । राणा शासकतय्गु मेगु छगू बांलाःगु पक्ष धइगु नकारात्मक सोच ज्वना वइपिं भारतीयतय्त नेपालय् वयेगु मौका मबिउ । उमिसं भारतीय मूलया व्यापारीतय्त अर्थात हाकुबन्जाः याइपिंत नं बांकी मतः । जब राणा शासन पतन जुल, अबलय्निसें भारतीय मूलया व्यापारीतय्त राज्यं हे स्वागत यानाः हाकुबन्जा याःसां नं राज्य हे मिखा तिसिना बिल ।

भारतीय व्यापारीतय्सं खुल्ला रुपं हे देशया सम्पत्ति लुटे यानाच्वंसां नं राज्यं मिखा तिसिनाच्वनेगु ज्या यानाच्वनी । राणा धुंकाः शाहवंशीय जुजुया ल्हातय् पूरा राज्य शक्ति लात । जुजु महेन्द्र व वीरेन्द्र देश विकास नापनापं जःलाखःला देश नाप जक मखु अझ युरोप व अमेरिकाय् तक नं स्वापू बल्लाका वनाच्वंगुलिं यानाः भारतया कपाः स्यात । भारतयात कपाः स्याःगुया विशेष यानाः निता कारण दु ।

झीगु देशया दुःखद् खँ, देशयात पूर्ण स्वतन्त्र यायेगुली खस नेतातय्सं ध्यान मबिल । अःखः स्वार्थी नेतातय्सं थःगु सत्ता स्वार्थ नीतियात राष्ट्रिय स्वार्थ नीति धकाः भाःपियाच्वंगुलिं यानाः देशया अवस्था भयावह जुया वनाच्वंगु खः ।

छगू ला चीनलिसे नेपाःया स्वापू बल्लात कि भारतं थःगु स्वार्थ पूर्ति याये मफइगु संकेत खनेदुगुलिं खःसा मेगु कारण भारतया हाकुबन्जाः व्यापारीपाखें नेपाःया अर्थतन्त्रयात कब्जा याये मफइगु अवस्था वइ ला धकाः नं खः । अझ मेगु भारतया स्वार्थ विहार व उत्तर प्रदेशया नागरिकतय्त नागरिकता कायेकाः नेपाःया सत्ताय् छ्वये मफइ ला धकाः नं आशंका दु । उकिं भारतं हाकनं नेपाःया खस नेतातय्त भारतय् दुकयाः जुजुया शक्ति माइनस याकेगु खेल म्हितल ।

वहे खेल कथं २०६२÷२०६३ या जनआन्दोलनपाखें जुजुया शक्तियात माइनस याकेगु लागि भारतं तःधंगु खेल म्हितल । २०६२÷६३ सालया जनआन्दोलनं नेपाः भारतया चक्रब्युहलय् फँसे जुल । जनआन्दोलन धुंकाः भारतं थनया खसब्रम्हू नेतातय्त च्यः थें यानाः ज्या कयाच्वंगु दु । निक्वःगु सफल आन्दोलन लिपा विहारी व उत्तरप्रदेशया मनूतय्त धमाधम नागरिकता बीत बाध्य याकल ।

नेपाःया उच्च तहलय् भारतीय मूलया नागरिकतय्त थाय् बीमाःगु बाध्य यात । अझ थुलि जक मखु विहा व उत्तर प्रदेशया गुण्डातय्त ध्यबा व ल्वाभः बियाः तराइलय् आतंकित याका च्वन । थ्व फुऽ ज्या भारतं अप्रत्यक्ष रुपं याकाच्वंगु दु धकाः स्वयम् तराइया मूलवासी धयाच्वनी । झीगु धापू राणा व राजतन्त्र या शासन ठिक गणतन्त्र अथवा प्रजातन्त्र बेठीक धायेत्यनागु मखु । अवश्य गणतन्त्र वा प्रजातन्त्र राजतन्त्र स्वयां सयौं गुणा ठीक व्यवस्था खः ।

जब गणतन्त्र अथवा प्रजातन्त्रया व्यवस्थापाखें भिंपिं नेतात तयार यायेफत धाःसा जक भिंपिं नेतातय्सं न्हापांगु ज्या देशयात पूर्ण स्वतन्त्र याना क्यना बी । जब देश पूर्ण स्वतन्त्र जुइ व राज्यया नेतातय्सं देश विकासया लागि भिजन ज्या अति परिश्रम यानाः देशयात याउँक विकास यानाः क्यना बी । दसुया लागि सिंगापुरया ली क्वानं देशयात याउँक विकास याना वन ।

झीगु देशया दुःखद् खँ, देशयात पूर्ण स्वतन्त्र यायेगुली खस नेतातय्सं ध्यान मबिल ।अःखः स्वार्थी नेतातय्सं थःगु सत्ता स्वार्थ नीतियात राष्ट्रिय स्वार्थ नीति धकाः भाःपियाच्वंगुलिं यानाः देशया अवस्था भयावह जुया वनाच्वंगु खः ।

सत्ता स्वार्थया अर्थ खः– क) विहारीतय्त धमाधम नागरिकता बिया वनाच्वनेगु, ख) थुलि जक मखु विहारी मूलतय्त देशया प्रशासन व मेमेगु क्षेत्रय् थाय् बिया वनीगु, ग) मेगु देशया प्राकृतिक श्रोतया सम्पत्ति नं भारतयात अधिकार बिया वनीगु वया नापनापं तराईया भूभाग भारतं धमाधम कब्जा याना वःसां नं नेतात मिखा तिसिना च्वनेगु मुख्य नीति जुयाच्वंगु दु ।

यदि सचेत देशभक्त जनतां नेतातय्सं न्ह्यागु देश घातक ज्या याःसां नं मौन जुयाच्वन धाःसा नेपाः फिजी अथवा सिक्किमया अवस्थाय् थ्यनेफु ।