थुकियात अश्लिल धाये मजिउ !

चलायमान विश्व । म्हिगः थें थौं मजू । थौं थें कन्हय् जुइमखु । हिला वनी । हिलाच्वनी । न्हू न्हूगु क्रिष्ट, बक्र अनुभूतित लुइ । सरल, दुगु, फुगु अभिव्यक्तिया माध्यमं इमित सम्प्रेषित याये फइमखु । विद्यमान माध्यमत असमर्थ जुइ । अपार्यप्त जुइ । खँग्वः, वाक्य विन्यास संरचनाय् न्हू न्हूगु प्रयोगत अनिवार्य जुइ । खनेदइ ।

म्हिगःया चित्रकलाया मान्यता, कथ्य, विधिइ नं थौं तःधंगु हिउपाः वयेधुंकल । थौंया सोच, विचाः ब्वयेत कलां थौं न्हू न्हूगु विधि निर्माण सामग्रीत माली । छ्यली । म्हिगः । कलाकार जुइत क्यान्भास, रंग, ब्रुस दयेवं गाः । तर थौं कलाकारतय्सं छ्यलीगु हलंज्वलं–ज्याभःत गन खः गन, पाइ । पाये धुंकल ।

थौं कलाकारतय्सं झंगःपंछिया किपा कियां जक मगाः । मनूया ख्वाःपाः च्वयां जक मगाः । प्रकृतिया चित्रण जक थौं वया कलाकारिताया आज्जु जुइमखु । मनूया नुगलय् न्ह्यपुइ लुइगु अनेक मनोतरंगत सोच, विचाः, दर्शनयात नं थौंया कलाकारं कलामार्फत पित बी । किइत स्वइ । स्वयेमाः ।

कलाकारतय्सं म्हिगः थें सामान्य क्यान्भास, रंग, ब्रुसं चित्रण याये फइगु थौंया सत्यतथ्य मखयेधुंकल । थौं । कलाकारतय्सं चित्रय् थौंया वर्तमानयात दुग्यंक ब्वयेत अनेक विधि, निर्माण सामग्रीत छ्यला जुइ । ईया दुने, पिनेया सारयात सम्प्रेषित यायेत स्वइ । विश्वयुद्ध लिपा मानवीय मूल्य मान्यता अन्त्य जुइ ।

व्यस्त, अवसाद, अराजकता, विसंगतिबोधयात सम्प्रेषित यायेत प्रचलित कलाप्रतिया मान्यता असक्त जुइ । असमर्थ जुइ । युद्धं हःगु ध्वंसात्मक, परिस्थितयात ब्वयेत दादावादं अकल ‘एन्टी आर्ट’या अराजक अभियान न्ह्याकी । छगू कला प्रदर्शनीइ कलाकृतिया रुपय् युरीनल अर्थात क्वपरायात ब्वयाः विश्वयुद्धं थना बिउगु विसंगत, अराजक, सन्तुलनहीन मनस्थितियात व्यक्त याना क्यनी ।

विश्वयुद्ध लिपा आधुनिक कलाया प्रादुर्भाव जुइ । रुढ, परम्परापाखें उन्मुक्ति कायेत कलाकारतय्सं अनेक विचलनत नाला यंकी । लस एन्जलसया छम्ह मय्जु दिमेत्रा नाइवन्स । छम्ह विद्रोही मिसा । थःगु नुगलय् दासि वःगु विद्रोह, असन्तोषयात वं तसकं गजब माध्यमं व्यक्त याइ । मिसातय् थी मत्यः जुइ ।

मिसातय् थी मत्यः जुइ । अप्वःथें समाज, संस्कृतिं मिसातय्त थी त्यः–मत्यःया ईयात बांमलाःगु हेयया दृष्टिं स्वइ । थी त्यः–मत्यःया इलय् मिसातय्त अछुत तायेकी । खंकी । वयात अलग तइ । स्वां–सिमा थी मजिउ । सी धाइ । अझ छाउप्रथाकथं थी मत्यः जुइबलय् मिसातय्त अलग गोठय् थ्यनी । जीवन इमि तसकं हे कष्टकर जुइ ।

अप्वःथें समाज, संस्कृतिं मिसातय्त थी त्यः–मत्यःया ईयात बांमलाःगु हेयया दृष्टिं स्वइ । थी त्यः–मत्यःया इलय् मिसातय्त अछुत तायेकी । खंकी । वयात अलग तइ । स्वां–सिमा थी मजिउ । सी धाइ । अझ छाउप्रथाकथं थी मत्यः जुइबलय् मिसातय्त अलग गोठय् थ्यनी । जीवन इमि तसकं हे कष्टकर जुइ ।

मय्जु दिमेत्रां थी मत्यः जुइबलय्या असहज परिस्थिति व तनावं मुक्ति कायेत स्वइ । ‘महिनावारी’ मिसातय् निंतिं अभिशाप मखु । जुइ मजिउ । थ्व ला मिसातय् जैविक शक्ति, सृजनात्मकताया चिं खः । आधार जुइ । उकिं महिनावारीयात ईयात सुुचुकाः मखु, खुल्ला पर्वकथं मिसातय्सं न्ह्याकेमाः । उत्सव तायेकाः हनेमाः ।

न्हूगु विचाः थनेत स्वइ । न्ह्याकी । दिमेत्रां थी त्यः–मत्यः जुइगु ईया हि संकलन याइ । मुंकी । थःगु ख्वाःपतय् इली । म्हछम्हं ह्वली । वया ख्वाःपाः, म्हछम्हं थी मत्यः जूबलय्या हिं प्याकी । रक्ताम्य जुइ । विश्वयात थःगु सन्देश ह्वली । ‘थी मत्यः जूम्ह मिसा कमजोर मखु । शक्तिया प्रतीक खः । जुइ ।’ खतुं मय्जु दिमेत्रा कलाकार मखु ।

तर वया विद्रोह विधिइ कलाकारिता थ्वइ । मिसा शक्ति, अस्मिताया प्रतीककथं थी मत्यः जुइबलय्या हियात थःगु ख्वालय्, म्हय् पानाः गुगु जीवन्त चित्र वं थःगु ख्वालय् दयेकी । व चित्र स्वयम मिसामुक्तिया शंखनाद जुइ । नेपालय् छम्ह सशक्त मिसावादी कलाकार अस्मिना रंजितं नं थज्याःगु विचारं प्रभावित जुयाः कला रचना याःगु दु ।

छाउपढी प्रथांग्रस्त मिसातय् निंतिं मय्जु दिमेत्राया थी मत्यः जूबलय्या हिया गौरवीकरणया अभियान मुक्ति मार्ग जुइ । घृणाया प्रतीककथं न्यनाच्वंगु थी मत्यःया हिया अर्थ संस्कारय् थौं नारी अस्मिता, मुक्तया नवीन अर्थय् चकना वइ । सोच विचारय् खने दइगु, लुया वइगु, उथलपुथलं प्रचलित अभिव्यक्तिया व्याकरण, अर्थ संस्कारय् नं उथलपुथल हयाबी ।

थौं साहित्य, कलाया ख्यलय् वयाच्वंगु न्हू न्हूगु माध्यम, कथन विधिं थ्व खँ पुष्टि जुइ । याइ । नेपाःया नांजाःम्ह छम्ह कलाकार मनोजबाबु मिश्रंला छुं चित्रत रंग इलाः मखु, थम्ह फाःगु खि इलाः दयेकूगु बुखँ ब्वनागु लुमनी । कलाकार थम्हं याःगु बिस्कंया अनुभूतिया पाय्छि माध्यम, सामग्री जूगुलिं हे उकथं चित्र किउगु जुइ ।

फेसबुकय् । छम्ह मय्जु । लँ दथुइ । प्रसन्न मुद्राय् । मिजंमस्त वइ । वया नुगःपाय् थी । ल्हाः तइ । अले मय्जुं ध्यबा काइ । वया ल्हाती ध्यबाया पँ खाइ । तर । अन । ‘मी–टू’या सः थ्वयाच्वंगु मदु । महिला हिंसा विरुद्धया समूह खने दयाच्वंगु मदु । लिपा सिल ।

मय्जुं परोपकारी ज्याया निंतिं न्ह्याकूगु चन्दा संकलनया अभियान खनी व । मय्जुं स्वइच्छां नालाच्वंगु । व मय्जुया क्रियाकलाप स्वयमं । प्रतिस्थापन कला थें ताल । स्वयाच्वने । मती लुइ व चन्दा संकलन कलाय् वःगु न्हूगु विधि, न्हूगु भाय् । न्हूगु व्याकरण जुइ । न्हूगु प्रयोग । थुकियात अश्लिल धाये मजिउ !

सम्बन्धित बुखँ

LEAVE YOUR COMMENTS