ने. सं. ११४४ ञलागा पारू -

तःजिगु सैनिक सम्मानं छायेपीबहम्ह पद्मरत्न तुलाधर

#शान्तरत्न शाक्य

म्हिगः द्यने न्ह्यः मनय् खँ लूगु खः— झी तसकं हनेबहम्ह मानवअधिकारवादी नेता भाजु पद्मरत्न तुलाधरया ज्याजंक्वया लसताय् थितुंथिइक ज्याझ्वःत न्ह्याका हयाच्वंगु दु । निगू ति ज्याझ्वलय् जि थः नं थ्यंकः वना । उगु ज्याझ्वलय् पद्मरत्न तुलाधरजुया बारे नवानादीपिंसं तयादीगु विचाः खँत न्यनेबलय् धाथें नं वय्कः पद्मरत्न धइम्ह मनू मखु ‘द्यः’ खनी धइगु महसुस जुइ ।

धाथें ला वय्कः छम्ह थ्व देय्या ‘हिरा’ हे खः । ‘रत्न’ खः धकाः न्ह्याम्हेसिगु नं मनय् थथे दनीगु स्वाभाविक हे खः थें ताः ।आः ईलचनय् चान्हसिया स्वताः प्यात । मनय् धौबजि वाल । म्हिगः द्यने न्ह्यः मनय् लूगु खँ च्वयाः ‘नेपालभाषा टाइम्स’ न्हिपौयात बीगु कि ……. ? बीगु । छाय् मबीगु ? बांलाःगु खँ सुनां मनाली ? सकसिनं नाली, स्याबासी बी ।

च्व ……. च्व ……. मनं धाल । धम्मपदया ‘मनवग्गया’ खँ लुमन— ‘मन हे न्हापालाक्क वनीम्ह खः । सु गुम्हेसिनं भिंगु मन भिंगु खँ ल्हाः वयात किपालु जुयाः सुख लिउलिउ वयाच्वनी ।’धाथें झीसं मेगु छुं बी मफुसां, छुं तःधंगु ज्या याये मफुसां थुगु वैंशय् वय्कःयात ‘सुख’ अनुभव जुइगु छगू ज्या जक याना बी फत धाःसां वय्कः धन्य ! धन्य ! जुइ ।

वय्कःया मिखां ‘मोति वा’ गाइ । अहो ! सुख, अहो ! सुख । जीवित अवस्थाय् वय्कःयात सुख प्राप्त जुइ । वय्कलं यानादीगु ज्वःमदुगु त्यागया पुजा जुइ । मंगलसुत्तय् धयातःथें ‘पुजा यायेबहपिंत पुज्यायेगु नं मंगल खः !!!’ धाथें मंगलया ज्या खः न्हिं ! जितः मंगललाभी जुइगु खँया ‘हःपाः’ मदिक्क बियाच्वंगुलिं आँट यानाः थन थुलि खँ सकल न्यायह्यःमिपिनिगु न्ह्यःने च्वयेगु घृष्टता यानाच्वना ।

द्वंबिद्वं दःसा क्षमा न्हिं क्षमा …… ।पर्यटन बोर्डय् जूगु ज्याझ्वलय् (गोष्ठिइ) वय्कःया नेपाःया न्हापांम्ह राष्ट्रपति जुइगु खँयात वय्कलं नालामदी । वय्कलं धयादी, ‘जि छम्ह सामान्यम्ह मनू जुयाच्वने यः, राष्ट्रपति जुइ मयः ।’ गुलि महान विचाः वय्कःया । वीर पुरुष सर्वमान्य नेता गणेशमान सिंहजुं नेपाःया न्हापांम्ह नेवाः प्रधानमन्त्री जुइगु अवसरयात त्याग यानादिल ।

वय्कलं धयादी, ‘जि छम्ह सामान्यम्ह मनू जुयाच्वने यः, राष्ट्रपति जुइ मयः ।’ गुलि महान विचाः
वय्कःया । वीर पुरुष सर्वमान्य नेता गणेशमान सिंहजुं नेपाःया न्हापांम्ह नेवाः प्रधानमन्त्री जुइगु अवसरयात त्याग यानादिल । थ्व चीधंगु खँ मखु ।

थ्व चीधंगु खँ मखु । थ्व ‘नेवाः नुगः’ या जाज्वल्यमान थीगु त्याग खः । गुगु त्याग धाथें थ्व देय्या नेवाः भुवाःतय्सं जक याये फइ, मेपिंसं याये फइमखु । अज्याःम्ह त्यागिम्ह महापुरुषयात तुति त्वःधूगु मेचय् फ्यतुकाः वय्कःया तुति हे लंगडा यानाबिल । थ्व देय्यात सतिं सराः बियातःगु देय् धकाः धाइ । तर थ्व खँ पत्याः यायेबहगु खँ मखु । थ्व खँ धूर्ततय्गु झंगः लानाः नयेगु दाउ जक खः ।

बेइमानतय्गु जालं भुनातःगु जालि खँ जक खः । झी पद्मरत्न तुलाधरजुं ‘राष्ट्रपति पद’ त्याग यानादिल । छाय् त्याग यानादिल ? थ्व अनुसन्धानया विषय जुइफु । वय्कलं थ्व देय्या शासक व शासित मानसिकतां जर्जरित संरचनायात ध्यानय् तयाः वय्कलं राष्ट्रपतिया पद त्याग यानादीगु खः ला ? वा छुं अनिश्चित भविष्यया कारण खनाः वय्कलं ‘राष्ट्रपति पद’ त्याग यानादीगु खः ? थ्व खँ थन हे दिकाछ्वये । …….

नेपालय् लोकतन्त्र, गणतन्त्र, संघीय समाजवाद उन्मुख शासन व्यवस्था वल । थन छगू नश्लीय मनूतय्गु जक बोलबाला जुल । छम्ह नेवाः मन्त्री जुइत नेवाःतय्गु ‘म्यान्डेट’ मगाः हँ ! धइगु खँ पिहां वल । गज्जब । थ्व झीगु देय् गुगु दिशाय् न्ह्याः वनाच्वन । थ्व छु सुखद् खँ खःला ? छम्ह दलित, छम्ह मुस्मां, छम्ह थारु, छम्ह अपांग मन्त्रीयात थाय् दइगु, छम्ह नेवाःयात मन्त्री पद बीत नेवाःतय्गु म्यान्डेट मगाइगु ?

अहो ! थ्व गज्याःगु व्यवस्था वःगु ? थ्व देय्या नेवाःत आदिभूमिपति, थ्व देय्यात सम्पन्न याःपिं, यानातःपिं खः । इमित थ्व देशय् मन्त्री पद छगूया लागी म्यान्डेटया ल्याः स्वयेगु ? उकिया लँपंख्याः थनाः नेवाःतय्त छ्वा वायेगु ? नेवाःतय्त अल्पमतया थामय् चीगु थ्व गनया न्यायोचित खँ खः ? झःझः धाःगु नेवाः गालय् च्वनेगु त्वःता हुँ ।

थनया वाउँसे वाउँसे च्वंगु बुँइ कंक्रिटया जंगल थनाः थनच्वंपिं आदिवासीतय्त सुकुम्वासी यानाः नयेगु कुटिल चालयात त्वःति । थन निचाः, प्यचाः, झिंनिचाः, झिंखुचाः घःचाःया सवारी साधन न्ह्याकेगु दिकि । जिमिगु बागमति, विष्णुमति लित हिँ ! जिमिगु लुँबुँ, वहबुँ लित हजि । जिपिं थ्व हे बुँइ बालि ज्यानाः सुख शान्तिपूर्वक जीवन यापन यानाच्वने ।

आः सुयागुं निंतिं ‘छफुति हि’ हायेके मखु जिमिसं । जिपि पूर्खाया गौरवयात म्हालासाला यानाः सुन्दर, शान्त कान्तिपुर महानगरीया महान वासिन्दायात हैसियतं जिपिं म्वानाच्वने । सुयागुं न्ह्यःने वनाः जिमिगु म्यान्डेट ब¥हः तः वने मखु । ब्वः वने मखु । बस् ।थन राष्ट्रिय गानय् संगीत थंम्ह अमर गुरुङयात राष्ट्रिय सैनिक सम्मानं छाय्पी जिउ ।

थन राष्ट्रकवि माधव घिमिरेयात उच्च नेपाली सैनिक सम्मानं छाय्पीगु ज्या जूगु दु । तर थन सुं नं नेवाःयात थज्याःगु भाग्य छाय् चू मलाइगु ? सर्वमान्य नेता गणेशमान सिंहजुयात मरणोपरान्त जक जूसां छगू तःधंगु सम्मान थ्व देशं छाय् याये मफुत ? तसकं तसकं अजू चायापु । थज्याःगु अजू चायापुगु खँया ल्याःचाः यानाच्वनां साध्य हे मजू ।

आः न्ह्यःने वयाच्वंगु अवसरयात खुसिइ चुइके मछ्वसे थुकियात पनाः झी सकसिनं अतिकं हनेबहम्ह नेल्सन मण्डेला स्वयां म्हो मजूम्ह त्यागीम्ह लोभचित्त धइगु भ्याः भचा हे मदुम्ह झी सकसिगुं समान हकहित व कल्याणया निंतिं न्ह्याबलें मिखाय् ख्वबि, नुगलय् पीडा लहिनाः थः न्ह्याबलें सामान्य मनू जुयाः म्वानाच्वने धाइम्ह सिद्धार्थया गुणं जाःम्ह व्यक्तित्व, साधु प्रकृतियाम्ह भाजु पद्मरत्न तुलाधर गुम्हेसिया नेवाः सनातन परम्पराकथं ज्याःजंक्व जूवनाच्वंगु दु ।

वय्कःयात भव्य अतिकं तःजिक नागरिक अभिनन्दन यायेगु तयारी न्ह्यानाच्वंगु दु ।थ्व हे ने.सं. ११३८ यंलाथ्व खस्थि, १५ सेप्टेम्बर २०१८, भदौ ३० गते शनिवाः कुन्हु राष्ट्रिय सभागृहय् वय्कःया अभिनन्दन जुइगु दु । थ्व बय् न्ह्यः वय्कःयात नेपाली सैनिक वृत्तपाखें मानार्थ उच्चतम सैनिक सम्मान प्रदानया ज्या जुइगुलिइ आशावादी दु ।

थ्व स्वयां न्ह्यः हे वय्कःयात नेपाली सेनापाखें उच्चतम सैनिक सम्मान प्रदान याःगु खँ न्यने दइ ला धकाः तःधंगु विश्वासा व आशा यानाच्वना । हनेबहपिंत, गौरव यायेबहपिंत गौरव यायेगु नं तःधंगु मंगल खः । नेपाःया सपुत भगवान शाक्यमुनि बुद्धं थ्व हे शिक्षा, अर्ति संसारयात बियाबिज्याःगु दु । वसपोलया मूवंगु शिक्षायात संसारं हनाबना तयाः हना वयाच्वंगु दु ।

नेपाःया छगू अभूतपूर्व अवसर वयाच्वंगु दु — थुगु भूगोलया छम्ह अज्याःम्ह त्यागिम्ह महापुरुषयात सम्मान यायेगु । गुगु अवसरयात तःजिक सम्मान जुइ, जुइ धइगु आशा, भलसा व विश्वास दु ।
भवतु सब्ब मंगलं ।