सत्तारुढ नेकपा दुनेया प्रतिपक्ष
करिब १५ महिना लिपा बल्ल बल्लं वर्तमान सरकारया नेतृत्व यानाच्वंगु नेपाल कम्युनिष्ट पार्टी (नेकपा) अर्थात डबल नेकपाया विभागंनिसें क्वयया तह तकया एकता प्रक्रिया टुंगे याःगुलिं आः सांगठनिक रुपं छुं नं कथंया समस्या मन्त धकाः नेतातय्सं न्ववाइगु स्वाभाविक हे खः । नेतातय्सं अथे न्ववाःसां डबल नेकपा दुनेया पूर्व माओवादी केन्द्रया नेता कार्यकर्तातय्सं धाःसा तसकं चिन्ता कयाच्वंगु दु ।
पूर्व माओवादी केन्द्रया नायः नापं पुलांम्ह प्रधानमन्त्री पुष्पकमल दाहाल व वय्कःया जःखः च्वंपिं छुं नेता कर्याकर्तातय्गु थाय् ला सुरक्षित याःगु खनेदत तर क्वय्या तहया कार्यकर्तातय्गु भविष्य धाःसा अन्यौलय् लात धकाः थवंथवय् खँ ल्हायेगु यानाहःगु दु ।
पार्टी एकता क्रमय् पूर्व माओवादी केन्द्रया भागय् लाःगु थासय् ला च्वनेफत धाःसा कन्हय् वनाः एकता महाधिवेशन जुइबलय् पूर्व एमालेया अप्वः सदस्यत दुगु अवस्थाय् उमिसं पूर्व माओवादीया नेता कार्यकर्तातय्त स्वीकार याइमखु अले पराजय याना बी धकाः चिन्ता कयाच्वंगु खनेदु ।
थुकिया अर्थ आः निगू पार्टी एकता जूगु अले क्वय्या तह तक एकता जूसां अन्ततः डबल नेकपा दुने पूर्व माओवादी व पूर्व एमाले दथुइ संबायाच्वंगु खनेदु व नं कन्हय् तक कायम हे जुइगु अवस्था दु । डबल नेकपाया सांगठनिक संरचनाया ल्याखं केन्द्रंनिसें विभागया इन्चार्ज व प्रदेश अले जिल्लाया नेतृत्व तक स्वल धाःसा नेपाःया आदिवासी जनजाति, मधेसी, दलित, मुस्मांनिसें उत्पीडित समुदायया नेतात मालेमाःगु अवस्था दु ।
पार्टीया प्रमुख नेतात जःखः दुपिं व चर्चाय् दुपिं नेतात त्वःताः उत्पीडित समुदायया नेतात पार्टी दुने खने मदु । आदिवासी जनजाति, मधेसी, दलित, मुस्मां नापं उत्पीडित समुदाय नेपालय् बहुसंख्यक दु तर नेतृत्वय् धाःसा मदु । नेपाःया गुज्वःगु सामाजिक संरचना दु उकथंया प्रतिबिम्ब जुइगु कथं डबल नेकपा दुने नेता कार्यकर्तातय्त जिम्मेवारी बिउगु खने मदु ।
डबल नेकपाया दुने नेतृत्वया सवालय् आः प्रतिपक्षया भूमिका माधव कुमार नेपाल पक्षं म्हितीगु अवस्था खने दुसां नं कार्यकर्ताया स्तरय् धाःसा पूर्व माओवादी केन्द्रया कार्यकर्तात लाइगु अवस्था दु
उकिं मेमेगु पार्टीया नेता कार्यकर्तानिसें उत्पीडित समुदायया अभियन्तापाखें डबल नेकपायात छगू जातीय नश्लवादी नेतृत्व दुगु, नश्लबादी पार्टी धकाः धायेत थाय् दयेका बिउगु दु । कार्यकर्तात स्वल धाःसा उत्पीडित समुदायया अले नेतात स्वल धाःसा छगू जातिया बर्चस्व कायम जुयाच्वंगु खने दुगुलिं डबल नेकपापाखें उत्पीडित समुदाययात अधिकार बीगु सवालय् माःगु कथंया ज्या जुइमखु धकाः तकं मनूतय्सं धाइगु स्वाभाविक हे खः ।
थुगु खँयात कयाः उगु पार्टीया उत्पीडित समुदायया नेता कार्यकर्तातय्सं न्यँ जक न्यनाः अन्ततः पार्टी हे सार्वभौम खः धकाः तायेकाच्वंगु दु । आदिवासी जनजाति, मधेसी, दलित, मुस्मांनिसें उत्पीडित समुदाय दुने नं राजनीतिक रुपं चेतना दुपिं अप्वः यानाः डबल नेकपाया हे मनूत खःसा थौं उपिं हे पार्टीया नेतृत्वया निर्देशन आशा यानाच्वनीगु अवस्थाय् उत्पीडित समुदायया अधिकारया नितिं माःगु कथंया सशक्त आन्दोलन जुइ अले उपलब्धी हासिल जुइ धकाः आशा यायेगु तत्कालया नितिं सम्भव मदुगु अवस्था खः धाये फइगु अवस्था दु ।
थौं पार्टीया सांगठनिक एकता जूसां नं म्हिगः निसेंया स्वापू, स्वभावनिसें थःथःपिनिगु गुटबन्दी धाःसा कायम हे जुयाच्वंगुलिं पार्टी दुने हे थःपिनिगु भविष्य मदु धकाः नं धायेगु यानाच्वंगु दु पूर्व माओवादी केन्द्रया कार्यकर्तातय्सं ।
इमिसं थःपिनिगु अध्यक्ष नापं आः डबल नेकपाया अध्यक्ष पुष्पकमल दाहालयात ब्यापक रुपं दबाव बिउगु व थःपिनिगु भविष्य अनिश्चित जुल धकाः डबाब बिउगुलिं जुइमाः शायद वय्कलं सार्वजनिक रुपं हे गबलें गबलें पार्टी एकता मजूगु जूसां जिउगु खः ला धकाः ताइगु तर अन्ततः थ्व हे पार्टीपाखें वनेगुया विकल्प नं मदु धकाः न्ववानादीगु ।
थुकिया अर्थ न्हापा जनयुद्ध जूगु इलंनिसें थौं तक नं थःत साथ बिया वयाच्वंपिं पूर्व माओवादीया पार्टीया नेता कार्यकर्तातय्सं थःपिनिगु भविष्य बारे चिउताः प्वंकाः पार्टी दुने खँ तःगुलिं हे पुष्पकमल दाहालं अथे न्ववानादीगु खयेमाः । पूर्व एमालेया कार्यकर्तात मेगु इलय् सुम्क च्वंसां चुनावया इलय् सक्रिय जुइगु अले न्ह्याम्हेस्यां न्ह्यागु हे धाःसां एमालेयात हे भोट तयेगु उकिसनं थःपिनिगु गुटया पक्षय् आन्तरिक रुपं लगे जुइगु गुकथंया प्रबृद्धि दु थुगु प्रबृद्धिलिसे पूर्व माओवादीया नेता कार्यकर्तात ज्वःलाइगु अवस्था मदु ।
पूर्व एमालेया कार्यकर्ता नापं समर्थकत थीथी संगठननिसें संघ संस्था व मेमेगु कथं आबद्ध जुया च्वनीगु अले चुनावय् छगू हे थासय् वइगु प्रवृत्ति जूगु खःसा पूर्व माओवादीया कार्यकर्तात धाःसा अप्वः यानाः न्हापा पार्टीइ पूर्णकालीन जुयाच्वंगु तर मेमेगु ख्यःलिसे स्वापू मदयाच्वंगु अवस्थाय् उमिसं पार्टी दुने खास हे म्हिते फइगु अवस्था मदु ।
उकिं थौंया इलय् कार्यकर्तातय्गु ल्याखं पूर्व माओवादी केन्द्र दुने अप्वः पार्टीइ दुने थःपिनिगु थाय्या बारे चिन्ता कयाच्वंगु खनेदु ।थुगु कथं स्वल धाःसा डबल नेकपा दुने आः पूर्व एमाले व पूर्व माओवादी जुयाः निगू गुट जुयाच्वंगु खनेदुसां मूल रुपं नेतृत्वया सवालय् धाःसा अथे मजुसे पार्टीया अध्यक्षपिं केपी शर्मा ओली व पुष्पकमल दाहाल नापं वामदेव गौतम तकं छगू हे लाइनय् वंगु दुसा बरिष्ठ नेता माधव कुमार नेपाल धाःसा मेगु हे धारय् लानाच्वंगु दु ।
वरिष्ठ नेता माधव कुमार नेपालं न्हापा प्रदेश कमिटीया इन्चार्ज ल्ययेगु सवालय् पार्टीया निर्णयप्रति थःगु असहमत दु धकाः नोट अफ डिसेन्ट च्वयादीगु खःसा आः वयाः पार्टीइ वरियताया सवालयात कयाः नं नोट अफ डिसेन्ट च्वयादीगु दु । पार्टी एकता जुइ धुंकाः थःत वरियता क्रमय् ओली, दाहाल लिपा स्वंगूगु थासय् तयातःगु अवस्थाय् नेता नेपालं स्वीकार यानादीगु खःसा आः वयाः स्वंगूगु वरियता क्रमय् वामदेव गौतमयात हया थःत प्यंगूगु थासय् तःगुलिं असन्तुष्ट प्वंकाः नोट अफ डिसेन्ट च्वयादीगु खः ।
वय्कलं अथे नोट अफ डिसेन्ट च्वयादीगुलिं पार्टी दुने आः गुटबन्दी झन झन अप्वया वइगु अले फरक धार कथं नेपाल वनादी धकाः तकं चर्चा जुयाच्वंगु दु । डबल नेकपाया दुने नेतृत्वया सवालय् आः प्रतिपक्षया भूमिका माधव कुमार नेपाल पक्षं म्हितीगु अवस्था खने दुसां नं कार्यकर्ताया स्तरय् धाःसा पूर्व माओवादी केन्द्रया कार्यकर्तात लाइगु अवस्था दु ।
उकिं पार्टी एकता अधिवेशन जुइगु अवस्थाय् क्वय्या तहलय् पूर्व माओवादी केन्द्रया कार्यकर्तात व माधव नेपाल पक्षधर गुटया कार्यकर्तात छगू हे थासय् लाइगु सम्भावना नं मदुगु मखु । थुकिं यानाः डबल नेकपायात कन्हय्या दिनय् अझ नं अप्वः पार्टी दुने हे समस्या वयेफु धकाः धाःसां छुं पाइमखु ।
LEAVE YOUR COMMENTS