९९ लिपा गुलि नम्बर बीगु ?

येँ – न्हूगु नम्बर प्लेट गय् यानाः तयेगु धइगु बारे छुं निर्णय याये मफयाः बागमती अञ्चलय् न्हूगु मोटरसाइकलया दर्ता हे बन्द जूगु दु ।
९९ लट तकया नम्बर इनेधुंकूगु वयां लिपाया लट नम्बर गय् यानाः तयेगु धइगु खँय् निर्णय याये मफयाः दर्ता याये माःगु अवस्था वःगु खः ।

निगः अंक दुगु नम्बर धुंकाः मेगु अंक तयाः न्हूगु नम्बर दर्ता याये मदइगु कानुनी अवस्थां यानाः दर्ता हे बन्द यायेमाःगु खँ यातायात व्यवस्था विभाग अन्तर्गतया मोटरसाइकल दर्ता कार्यालयं धाःगु दु । वंगु मंगलवाः निसें न्हूगु दर्ता बन्द जूगु खः ।

यातायात व्यवस्थापन नियमावलीइ निगः डिजिटया नम्बर जक तयाः नम्बर दर्ता याये दइगु नियम दुगु जुयाः मोटरसाइकल दर्ता बन्द यायेमाःगु खः । ‘बा ९९ प ९९९९’ मोटरसाइकल नम्बर दर्ता जुइधुंकूगुलिं वयां लिपाया नम्बर गय् यानाः बीगु धइगु समस्या यातायात व्यवस्थायात वःगु खः ।

बागमती अञ्चलय् जक मोटरसाइकलया ल्याः १० लाख गः थ्यनेधुंकूगु दु । आः ९९ धुंकाः नं लगातार नम्बर तया वनेगु खःसा लट नम्बर १०० सुरु जुइगु खनेदु । स्वंगः अंक दुगु नम्बर तयेगु व्यवस्था मदुगु जुयाः न्हूगु दर्ता हे बन्द याये माःगु खः ।

यातायात व्यवस्था विभागं थुकिया लागिं नियमावली हे संशोधन यायेमाः धासें उकिया निंतिं मन्त्रिपरिषदय् प्रस्ताव छ्वयेधुंकूगु दु । तर उकिया बारे प्रधानमन्त्री केपी ओली स्वदेश लिहां वयेधुंकाः जक निर्णय याये फइगु खँ धाःगु दु । आः न्हूगु नियमावलीइ स्वंगः डिजिट तयाः मोटरसाइकल दर्ता याये फइगु व्यवस्था यानाः संशोधन यायेगु खँ विभागं धाःगु दु ।