संचार माध्यमय् ख्वप नपा २या पितब्वज्या
ख्वप (नेपालभाषा टाइम्स) – नेपाल मजदुर किसान पार्टीया केन्द्रीय सचिव प्रेम सुवालं ख्वप नगरपालिकया न्हूगु पिथना ‘संचारमाध्यमय् ख्वप नपा २’ या पितब्वज्या यानादिल । उगु हे ख्वप नगरपालिकाया ग्वसालय् जूगु उगु हे ज्याझ्वलय् वय्कलं २०८२ सालया माध्यमिक शिक्षा परीक्षा (एसइइ)य् उत्कृष्ट लिच्वः हयेत ताःलाःपिं ब्वँमि व ब्वनेकुथियात नं हनेज्या यानादीगु खः ।
ज्याझ्वलय् नवासें सचिव सुवालं छुं नं संस्थां याःगु महत्वपूर्ण ज्याया लिखित दस्तावेजीकरण वा अभिलेखीकरण याना तयेगु ज्यां उकिया ऐतिहासिक महत्व अप्वइ धयादिल । ख्वपया ऐतिहासिक, सांस्कृतिक व पुरातात्विक महत्वया सम्पदाया संरक्षण व व्यवस्थापनय् विशेष ध्यान बीमाःगु खँय् बः बियादिसें भेटिकन सिटी थें योजनाबद्ध धंगं ख्वप देय्या नं संरक्षण व विकास यायेत सुझाव बियादिल ।
ख्वप देय्यात अझ व्यवस्थित याना यंकेगु निंतिं घोषणापत्रय् न्ह्यथनातःगु ल्यं दुगु प्रतिवद्धता नं कार्यान्वयन याना यंकेमाःगु खँय् बः बियादिसें घोषणापत्र कार्यान्वयन यायेगु धइगु हे जनताप्रति जवाफदेहिताया भूमिका निर्वाह यायेगु खः धयादिल ।
छगू फकर प्रसंगय् वर्तमान सरकार देय् व जनताप्रति जिम्मेवार मजूगु द्वपं बिसें वय्कलं थगुने भदौ २३ व २४ गते जूगु घटनायात कयाः चिउताः नं प्वंकादिल । वय्कलं थगुने जूगु हिंसात्मक व अराजक गतिविधि बारे जिम्मेवार निकायं स्पष्ट लिसः बीमाः धासें देसय् अशान्ति न्यंकेगु गतिविधिइ संलग्न जूपिंत कानुनी कारवाही यायेमाः व उकिया निंतिं न्हू पुस्तां सचेत जुयाः थुकथंया विषयय् सः ल्ह्वनेमाःगु खँय् नं बः बियादिल ।
सभापतिया थासं ख्वप नगर प्रमुख सुनिल प्रजापतिं थःपिंसं दछिया प्यंगू करोड तका बराबरया छात्रवृत्तिया व्यवस्था यानाः ख्वप कलेजय् ब्वंका वयाच्वनागु खँ कनादिल । थुगुसीया एसइइ परीक्षाया लिच्वतं ख्वपया शैक्षिक गुणस्तरयात अझ पुष्टि याःगु खँ कनादिसें थुगुसी नगर दुने संचालन जुयाच्वंगु सामुदायिक व संस्थागत ब्वनेकुथिपाखें १३ म्ह ब्वँमिं ४ जीपीए हःगु व न्हय्गू ब्वनेकुथिं शतप्रतिशत लिच्वः प्राप्त याये सफल जूगु खँ कनादिल ।
उपप्रमुख रजनी जोशी, विद्यालय अनुगमन तथा व्यवस्थापन समितिया संयोजक योगेन्द्रमान बिजुक्छेँ, प्रमुख प्रशासकीय अधिकृत वसन्त भट्टराई, भक्तपुर मासिकया सम्पादक लक्ष्मणराज जोशीं नं नुगःखँ तयादीगु खः ।
ज्याझ्वलय् ०८२ या एसइइ परीक्षाय् ४ जीपीए हयेत ताःलाःपिं १३ म्ह ब्वँमियात नगदसहित सम्मान नं याःगु खः ।
LEAVE YOUR COMMENTS