ख्वपया माधवनारायण मेला नं कोरोनां प्रभावित

ख्वप – माघ जःछि सुथ न्हापनं ख्वपया हनुमानघाटय् च्वंगु त्रिवेणीधामय् मस्त निसें ज्याथपिंसं ख्वाउँगु लखय् म्वःल्हुयाः माधवनारायणया व्रत च्वनेगु सुरु याःगु दु । नेपाल संवत् कथं च्यागूगु शताब्दी निसें थन लछियंकं माधवनारायणया व्रत च्वनेगु सुरु जूगु धाइ । थन दँय्दसं छ्यला पुन्हि निसें मिला पुन्हि लछियंकं माधवनारायणया मेला जुइ । थुगु इलय् त्रिवेणीधामय् म्वः ल्हुयाः सूद्यःयात अर्घ बियाः माधवनारायणयात पुजा यानाः व्रत सुरु याइगु खँ व्रत व्यवस्थापन समितिया दुजः व द्यःपाःलाः गोपाल शर्मां कनादिल ।

सक्वया नारी खुसि स्वयां न्ह्यः हे थन माधवनारायणया मेला व व्रत सुरु जूगु थीथी शिलालेख व ग्रन्थय् न्ह्यथनातःगु लूगु खँ वय्कलं कनादीगु दु । माधवनारायणया व्रत च्वनिपिंसं लछितक व्रत सुरु जुइ छन्हु न्ह्यवनिसें निराहार च्वनेमाःगु, सुथ न्हापनं त्रिवेणीइ म्वः ल्हुइमाःगु, नीलः तयाः द्यः पुज्यायेमाःगु, शङ्खजल ग्रहण यानाः मन्त्रोच्चारण यायेमाः, मेपिंत थी मजिउगु व लछियंकं लाकां न्ह्यायेमजिउगु परम्परा दुगु खँ नं द्यःपाःलाः शर्मां कनादीगु दु ।

थुगुसी धाःसा कोरोना महामारीया कारणं थन जुइगु व्रत औपचारिकताय् जक सीमित जूगु दु । कोरोना संक्रमण जुइफुगु हुनिं थुगुसी हनुमानघाटय् हे च्वनेगु कथं माधवनारायणयात व्रत मतयेगु निर्णय जूगु खँ माधवनारायण धलं सेवा समिति हनुमानघाटया नायः उद्धव खाइतुं कनादीगु दु ।

थुगुसी हनुमानघाटय् सुयातं माधवनारायणया लछियंकंया व्रत मतयेगु, तर व्रतया परम्परा त्वाःमदयेमा धकाः सीमित मनूतय्त जक तयेगु खँ धाःगु दु । हुलमुल जुइक व्रत मतःसां त्रिवेणीइ न्हियान्हिथं यायेमाःगु पुजा व माधवनारायणया बाखं कनेगु, हनुमानघाट त्रिवेणी कुण्डय् न्हियान्हिथं म्वःल्हुइगु ज्या धाःसा नियमित जुइगु खँ नं समितिं धाःगु दु ।

नेपाल संवत् ७२२ इ जुजु रणजीत मल्लं थःम्हं हे व्रत च्वनेगु निंतिं थाय्या व्यवस्थापन याःगु शिलालेखय् न्ह्यथनातःगु खँ कनादिसें भाजु खाइतुं थनच्वंगु त्रिवेणीघाटय् च्वनाः एकचित्त जुयाः न्ह्यागु फ्वंसां पूवनीगु जनविश्वास दुगुलिं न्हापां निसें थन व्रत च्वनीपिं व म्वः ल्हुइत वइपिनि भीड जुइगु खँ कनादिल ।

धलं दनीपिंसं लाकां मन्ह्यासे हे तीलमाधव निसें तलेजु भवानीया दर्शन यायेत वनेमाःगु, सप्तमी कुन्हु पन्तिइ वनाः त्रिवेणीइ च्वनाः म्वः ल्हुयाः इन्द्रेश्वर महाद्यःया दर्शन यानाः अष्टमीकुन्हु लिहां वयेगु, दशमीकुन्हु पशुपतिइ वनाः म्वः ल्हुयाः जल हाः यानाः जयबागेश्वरी ताम्रेश्वर महाद्यःतक कलश यात्रा यायेमाःगु, द्वादशी कुन्हु चांगुनारायणया शंखदहय् म्वः ल्हुयाः कलश ज्वनाः चांगुनारायणया दर्शन यायेगु व माघ शुक्ल पुन्हि कुन्हु देय् चाःहिलाः भूपतिन्द्र मल्लया मूर्तिइ इन्द्कलश छायाः लछियंकंया व्रत क्वचायेकेगु परम्परा दुगु खँ छम्ह व्रतालु विनोदकुमार प्रजापतिं कनादिल ।

थ्व परम्परा कथं गुलिसिनं त्रिवेणीघाटय् हे लछियंकं च्वनाः व्रत पूवंकीगु व गुलिसिनं न्हियान्हिथं सुथय् त्रिवेणी घाटय् वयाः म्वःल्हुइगु व थीथी थासय् जुइगु यात्राया इलय् ब्वति कायेगु चलन न्ह्याना वयाच्वंगु खःसां थुगुसी कोरोनाया कारणं त्रिवेणी घाटय् हे व्रत च्वनीपिं मतइगु जूगु खः ।

सम्बन्धित बुखँ

LEAVE YOUR COMMENTS