वँय्या देशय् क्वय्या जात्रा
छगू उखान दु । ‘वँय्या देशय् क्वँय्या जात्रा ।’ थ्व उखान थौंकन्हय् नेपाःया सरकार, राजनीतिक दल, नेता व कार्यकर्तातय्त थ्याक्क मिले जू । देशय् स्थानीय, प्रदेश व संघीय यानाः स्वंगू तहया सरकार दु । स्वंगू तहया सरकार दुसां ज्या धाःसा ‘हात लाग्यो शुन्य’ धाःथें जुयाच्वंगु दु । देय् दयेकीपिं नेतात देय् दयेकेगुलिइ स्वयां नं अप्वः विदेशया यात्रा यायेगुलिइ हे तक्यनाच्वंगु खनेदु ।
देय्या नागरिकत हिलोपुरया यात्रा यायेमाला च्वंगु दु, तर देय्या नेतात सिंगापुर दबईया यात्रा यायेगुलिइ व्यस्त । चिमि देय्या नेतात नं आराम छकः यायेत सिंगापुरय् वनेमाःगु ! देय्या विकट गांगामय् स्वास्थ्य केन्द्रय् सिटामोल मदु । सरकारं थ्यंके फयाच्वंगु मदु । तर नेतात धाःसा वासः यायेत विदेशय् वनेमाःगु ।
थःगु सम्पत्तिया नामय् स्वतोला लुँ व १ कठ्ठा जग्गा जक दुम्ह धाःम्ह नेकपाया छम्ह अध्यक्ष प्रचण्डया सकल छेँजः मुनाः दुबईया सयरय् अले थः तिरिमय्जुया वासः यायेत विदेश वनाच्वंगु दु । आः धयादिसँ थ्व वँय्या देशय् क्वँय्या जात्रा मखुसा छु ? छु नेपाःया ततःधंपिं नेता अले दलया अध्यक्षपिंत विदेशय् सितिकं वासः याना बीगु खःला ?
नेपाःया स्थानीय सरकारया प्रमुखनिसें संघीय सरकारया प्रमुखतकं विदेशया सयर यायेगुलिइ न्ह्यःने लाः । येँ महानगरपालिकाया मेयर नं येँ देय्यात व्यवस्थित यायेगुलिइ स्वयां विदेश यात्रा यायेगुलिइ तक्यनाच्वंगु दु । विद्यासुन्दर शाक्य येँ मनपाया मेयर जुयादीगु निदँ मयायेधुंकल ।
येँ देय्यात गुलि व्यवस्थित रुपं न्ह्याकेमाःगु खः, उलि न्ह्याके फयाच्वंगु मदु । येँ महानगर अझं अस्तव्यस्त जुयाच्वंगु दु । आपालं थासय् सतक पिच याये फयाच्वंगु मदु । धू व कुँया प्रदूषण नं उलि हे । धाये कि थुकिया विकराल समस्या दु । घौछि तसकं वा वल धाःसा येँया थीथी थासय् सतक पुखू जुइ । धःया उचित व्यवस्थापन याये फयाच्वंगु मदु ।
ट्राफिक जामया समस्या नं उतिकं, पार्किङया समस्या छुं भचा समाधान जूगु खने दु । तर सतकय् लाथेपाथे तयातइगु बँपसःया कारणं लथालिंग जुयाच्वंगु दु । बःपसः तयातःपिंत उचित व्यवस्थापन याये फयाच्वंगु मदु । सुथय् बहनि मखंनिसें भोताहितितक छस्वा जुइक बँपसः तयाच्वनिपिं उतिकं ।
येँ मनपां लिपांगु इलय् महानगरयात सुचुकुचु यायेगु ज्याय् तीव्रता बिया हयाच्वंगु दु । न्हियान्हिथं बहनि ब्रुमर संचालन यानाः धू मुनेगु ज्या यानाः महानगरपालिकां धाथेंया महानगर दयेकेगु अभियान न्ह्याका वयाच्वंगु च्वछायेबहजू । थथे ब्रुमर चले यायेगु ज्या येँ महानगरया मेमेगु सतकय् नं न्ह्याकेमाःगु अति आवश्यक जू ।
लँ सिथय् जवंखवं निखेरं बँपसः तइपिनिगु कारणं लँय् जुइत हे घ्वात्तुघ्वानाः जुइमाःगु अवस्था दु । मखं, वंघः असं, न्हूसतक, रत्नपार्कय् जक मखसे स्वनिगःन्यंकं हे थाय्थासय् उकथं लाक्वपाक्व बँपसः तइपिं वालछ्याल हे दु । थथे बँपसः तइपिंसं आन्तरिक आप्रवासया समस्या नं उतिकं अप्वयेकाच्वंगु दु ।
‘जाबो बँपसः छगू हे व्यवस्थित यायेमफु, मेगु छु याइ’ धकाः महानगरपालिकायात कुंखिनेगु यानाच्वंगु दु । थुकी मात्र महानगरपालिकाया जक दोष मदु, बँपसः तयेकीपिं स्थानीयवासीया दोष नं उलि हे मात्राय् दु । महानगरपालिकां चिइकेगु कुतः याःसां स्थानीयवासीं ‘ज्या यानाः नं नके मबिउ’ धकाः अःखबतं महानगरपाकिायात हे द्वपं क्वःचिंकेगु स्वइपिं नं थन दु ।
थुकथं बँपसः तइपिं अप्वया वनाच्वंगुया लिउने स्थानीय क्लब, टोल सुधार समिति लगायत थीथी संघसंस्थाया कारणं हे खः धकाः सरोकारवालातय्सं धायेगु यानाच्वंगु दु । गुलिखे क्लब, टोल सुधार समिति, संघसंस्थां ध्यबा कयाः बँपसः तयेके बियाच्वंगुलिं यानाः नं बँपसःयात व्यवस्थित याये मफयाच्वंगु खः ।
येँ मनपां बँपसः तइपिंत नियन्त्रण यायेत नगर प्रहरीया व्यवस्था यानातःगु दुसा गुलिखे नगर प्रहरीं बँपसल्यातयेके हे आर्थिक लबः कायेगु यानाच्वंगु धइगु नं खँ पिहां वयाच्वंगु दु । थुकी येँ मनपां ध्यान बीमाःगु आवश्यक जू । थुकिं यानाः येँ मनपायात बदनाम यायेगु ज्या जुयाच्वन धाइपिं नं दु ।
आः ला मनूतय्सं बँपसः छगू हे नियन्त्रण याये मफुसा छुकिया स्थानीय सरकार धकाः तकं धायेगु यानाहःगु दु । थ्व धइगु स्थानीय सरकारया बेइज्जत मखुला ? थ्व खँय् महानगरपालिकां विचाः यायेमाःगु व ध्यान बीमाःगु तसकं हथाय् जुइधुंकूगु दु । खतुं येँ मनपां लिपांगु इलय् महानगरयात सुचुकुचु यायेगु ज्याय् तीव्रता बिया हयाच्वंगु दु ।
न्हियान्हिथं बहनि ब्रुमर संचालन यानाः धू मुनेगु ज्या यानाः महानगरपालिकां धाथेंया महानगर दयेकेगु अभियान न्ह्याका वयाच्वंगु च्वछायेबहजू । थथे ब्रुमर चले यायेगु ज्या येँ महानगरया मेमेगु सतकय् नं न्ह्याकेमाःगु अति आवश्यक जू । अथे हे महानगर लागाया अतिकं व्यस्त थीथी थासय् पार्किङयात व्यवस्थित यायेगु ज्या नं धाथें च्वछायेबहजू ।
बांलाःगु ज्यायात झीसं बांलाः धकाः धायेमाः । राजनीतिक दल व विपक्षीतय्सं थें न्ह्याबलें खाली विरोध जक यानाच्वनेगु नगरवासीयात ल्वःगु ज्या मखु । थज्याःगु प्रवृत्तियात च्यः प्रवृत्ति धाइ । मेखे स्थानीय, प्रदेश व संघीय सरकार नागरिकया आवश्यकतायात प्राथमिकता बीगु स्वयां नं भौतिक पूर्वाधार निर्माण यायेगु ज्याय् लिपांगु इलय् व्यस्त जुयाच्वंगु खनेदु ।
गथेकि धरहरा दयेकेगु, जहाज चले यायेगु, मोनोरेल चले यायेगु, अन्तर्राष्ट्रिय क्रिकेट रंगशाला दयेकेगु थेंज्याःगु ज्याय् हे तक्यनाच्वंगु दु । थ्व दथुइ नं येँ महानगरपालिका व मेयर शाक्यं नेवाः संघसंस्था, खलः, पुचःया छेँ, भवन दयेकेत आर्थिक ग्वाहालि याना वयाच्वंगु नं छगू बांलाःगु पक्ष खः ।
येँ मनपां दयेकेगु धाःगु भ्यू टावरया ज्या नं आतकं बांलाक न्ह्याये मफयाच्वंगुलिं थुकियात कयाः यक्वसिनं व्यंग्य यायेगु यानाच्वंगु दु ।
ठेक्काया ज्या कयाः इलय् निर्माण सम्पन्न मयाइपिं ठेकेदार येँ मनपां न त कारवाही याये फयाच्वंगु दु, न त ठेक्का सम्झौता हे रद्द यानाः मेपिंत हे बी फयाच्वंगु दु ।
थज्याःगु ज्याय् सुनां चलखेल यानाच्वन धइगु पत्ता लगे यायेमाः । अथे हे महानगरया सार्वजनिक जग्गा जमिन सम्पदा, सतक फुटपाथ पसल्यापाखें अतिक्रमण जुयाच्वंगुयात याकनं नियन्त्रण यायेगु स्वयेमाः । थुकिं यानाः स्वनिगय् वइपिं पर्यटकयात आनन्दपूर्वक सम्पदाया अवलोकन यायेगु वातावरण दइसा मेखे लँजुवाःयात सहज रुपं थःगु गन्तव्यय् वनेत अःपुइ ।
LEAVE YOUR COMMENTS