खुलासा जुजुं वनेमाः !

अबलय् । गुंपुन्हि, येँयाःपुन्हिया ताकाय् । त्वाःत्वालय् प्याखं क्यनेगु चलन । प्याखंया अर्थ थन नृत्य मखु । नाटक खः । जुइ । राणाकालय् दरवार दरवारय् थिएटर प्याखं क्यने यंकी । तर । त्वालय् क्यनीगु प्याखनय् दर्शक । सामान्य जनता जुइ । थ्व प्याखंया मञ्चन बहनिइ, चान्हय् पाखेर जुइ । अबलय् बेखाचिया प्याखं धालकि तसकं नांजाः ।

जिं अबलय् उलि थज्याःगु प्याखंत स्वये मनं । चान्हय् पाखेर मञ्चन जुइगुलिं छेँय् थकालिपिंसं मस्ताय्त गनी । पनी । छकः । जिमिगु चुकय् हे प्याखं क्यने हइ । मञ्च दयेकल । प्यखेरं दर्शकत । प्याखंम्वःत मञ्चय् वइगु, वनीगु लँपु नं दइ । अबलय् । प्याखनय् मिसात कुहां वइमखु । धाये । प्याखंम्वः जुयाः पिहां वयेत मिसातय्त बर्जित ।

अबलय्या सामाजिक संस्कारं मबिउ । उकिं प्याखंयात माःपिं मिसा पात्रत मिजंत हे जुइ । मिजंतय्सं हे मिसा जुयाः म्हिती । मिसा पात्र यायेत ल्वःपिं मिजंत ल्ययेगु ज्या जुइ । जितः लुमं । जिमिगु चुकय् अबलय् क्यंगु प्याखंया मिसा पात्र जूम्ह तसकं हे बांलाः वयात सुनानं मिजं मिसाय् हीकातःम्ह धाइमखु ।

वयागु ख्वाःपाः जक मिसाम्ह खने दुगु मखु, हाउभाउ नं दुरुस्त मिसा हे थें च्वं ! स्वयाच्वंपिंत भ्रमया आभाश जुइमखु । मिसाकथं हे खंकी । पक्का मिसाया भूमिकाया अनुभूति काइ । व मिसा पात्रया ख्वाः जितः अझ नं लुमं । छता खं धाःसा जितः आः नं नुगः संका च्वनी । न्हूगु अनुभव थें मनय् लुयाच्वनी । व प्याखनय् मिसा जुयाः म्हिताच्वंम्ह पात्र मञ्चं क्वय् थ्यनी ।

गुलिसिनं वयागु ल्हाः ज्वनाः साली । गुलिसिनं घय् पुइ । घय् पुइत स्वइ । ख्याः याइ । अथे सनीपिंके अन संकोच खने दइमखु । खुल्ला जुइ । धाथें । व मिसा पात्र जूम्ह मिसा हे जूगु खःसा ला वयात थी जी मखुगु जुइ ! तर व पिनें मिसा पात्र जूसां दुनें धाःसा मिजं धकाः सिउगुलिं हे मखा, वयात पासापिंसं छतिं सनेत लिफः स्वइमखु ।

थियाः, सनाः सन्तोष कायेत स्वइगु मखा जुइ ! खिचा ख्याः यायेत स्वइ । यौन अपराधया भय् इमिके खने दइमखु । ‘मि टू’या ख्याच्वः फये माःगु इमित त्रास दइमखु । तर । जितः धाःसा अबलय् व मिसा पात्रलिसे मञ्चं क्वय् पासापिंसं अथे स्वच्छन्दकथं सनच्वंगु लू लुमनी । धाथेंया मिसा पात्रलिसे हे अथे सनाच्वं थें ताइ ।

थौंकन्हय् शरीर मिजंया जुयाः नं गुलिं मनंमनं मिसा खया बी । अथे हे मिसाया शरीर दुपिं भाजु दइ । ट्रान्सजेण्डरं थौं थःगु पहिचान काये धुंकल । थौं मिजंत अपरेशन यानाः मिसा जुइफु । अथे हे मिसा पुरुषय् रुपान्तरित जुइ फु ।

व पात्र मिसा मखु । मिजं खः । तर । मिसा प्रतीक खः व मिजं । अन गुलिसियां व मिसा पात्रलिसेया ख्याःयात यथार्थय् व मिसाया मूर्त प्रतीकलिसे ख्याः यानाच्वंगु खः । अन परोक्षरुपय् यौन मनोविज्ञानं ज्या यानच्वंगु दु ला ? प्रतीकलिसे मनू लूथें सनेबलय् यौन हिंसा जुइ ला कि मजुइ ? जितः थ्व थौं नं अनुत्तरित न्ह्यसः जुया बी !

थौंकन्हय् । मिजं सु ? मिसा सु ? थुगु न्ह्यसःया लिसलं नाना रुप काये धुंकल । म्हिगः थें निश्चित परिभाषां मिजं सु, मिसा सु या लिसः पाय्छिकथं बी फइमखु । मफये धुंकल । थौंकन्हय् शरीर मिजंया जुयाः नं गुलिं मनंमनं मिसा खया बी । अथे हे मिसाया शरीर दुपिं भाजु दइ । ट्रान्सजेण्डरं थौं थःगु पहिचान काये धुंकल ।

थौं मिजंत अपरेशन यानाः मिसा जुइफु । अथे हे मिसा पुरुषय् रुपान्तरित जुइ फु । न्हापा न्हापा समाजय् ट्रान्सजेण्डरतय्त थाय् मदु । अझ ला इमित असामाजिक प्राणी खंकी । अवहेलना याइ । तर थौं ट्रान्सजेण्डरतसें थःगु हक अधिकारया निंतिं संघर्ष याइ । पहिचान सुनिश्चित याना हइ । थौं समाजं म्हिगःथें इमित नकारात्मक मिखां स्वये फइमखु ।

स्वये दइमखु । अथे हे समलिंगीतय्सं नं थःगु छ्यं ल्ह्वना हयाच्वंगु दु । सामाजिक, कानूनी मान्यता प्राप्त यायेत इपिं सक्रिय, संघर्षशील । इमिसं थःथःगु बिस्कं लैंगिक व्यक्तित्व निर्माण याना हयाच्वंगु दु । म्हिगः ‘मिजं–मिसा’ धकाः गुगु परिभाषा लैंगिक दुनियाय् परिभाषित जुयाच्वंगु दु आः व दक्व फुक्क विघटन जुयाः उकिया पुनःपरिभाषा, पुनर्संरचना लुया वयाच्वंगु दु ।

यौनिकताया मान्यताय् नं उथलपुथल जुया वयाच्वंगु दु । भूमिका श्रेष्ठ । छम्ह ट्रान्सजेण्डर मय्जु खः । वय्कः खास शारीरिक रुपय् मिजं खयाः नं वय्कःया मनोविज्ञान, जीवनशैली मिसाया खः । जुइ । ट्रान्सजेण्डरय् हकहितया निंतिं वय्कलं यक्व हे कुतः यानाच्वनादीगु दु । वय्कःया जीवनी पिहां वःगु दु ।

थौंकन्हय् हरेकसियां थःथःगु पहिचान, केन्द्रया निंतिं संघर्ष याइ । म्हिगः थें निश्चित केन्द्रतय् जक हावी सम्भव जुइमखु । जुइ मखुत । उत्तर आधुनिक मान्यतां धाइ । तर थौं अनेक जिज्ञासात नं दइ । लुइ ।

ट्रान्सजेण्डर मिसातय्त हायेकल कि, अनुचित धंगं कटाक्ष यात कि इमिसं ‘मि टू’या सः थ्वयेके दइ ला कि मदइ ? यौन हिंसाया आरोवी दइ ला कि मदइ ? कानूनं छु धाइ ? अथे हे सांस्कृतिक ज्याखँय् म्ह्याय्पिनि भूमिका दयाच्वनी । उकिं ट्रान्सजेण्डर मय्जुपिनि समाज, सांस्कृतिक ज्याखय् गुकथं समाहित अर्थात एड्जस्तमेन्ट जुइगु खः ? थुखेर नं खुलासा जुजुं वनेमाः ।

 

 

सम्बन्धित बुखँ

LEAVE YOUR COMMENTS