नेवाः–तामाङ समन्वय समितियात पौ
तराई लागाय् कफ्र्यू तयाः जूसां, गोली चले यानाः जूसां अले स्वनिगः व स्वनिगः जःखः लागाय् तःभुखाय् ब्वयाः जनतां न्ववाये हे मफयाच्वंगु इलय् जूसां आखिर संविधानसभापाखें हःगु न्हूगु संविधानय् व्यवस्था यानातःगु न्हय्गू प्रदेशयात आःया अवस्थाय् यःसां मयःसां स्वीकार यायेमाःगु बाध्यकारी अवस्था दु ।
संविधानय् न्हय्गू प्रदेशया उल्लेख यानातःगु खःसा न्हय्गू प्रदेश मध्ये नं ३ नम्बर प्रदेश धइगु हरेक दृष्टिकोणं महत्वपूर्णगु खः । स्वनिगःया आदिवासी अझ धाये ऐतिहासिक नेपालमण्डलया आदिवासी नेवाःत अले नेवाःत नापनापं हे स्वनिगः चाकःहीक च्वनाच्वंपिं तामाङतय्गु आदिभूमि लानाच्वंगु प्रदेश धइगु ३ नम्बर प्रदेश खः ।
थौं नेवाःत नापं तामाङतय्सं ३ नम्बर प्रदेशया नां, ३ नम्बर प्रदेशय् छ्यलीगु भाषा, अले थुगु प्रदेशया राजधानी गुगु थासय् लाइगु खः धकाः तसकं सरोकार क्यनाच्वंगु दु । उकिं न्हापा नेवाः स्वायत्त राज्यया निंतिं संघर्ष याःगु मंकाः मोर्चा नेवाः स्वायत्त राज्य मंकाः संघर्ष समिति व तामाङ स्वायत्त राज्यया नितिं संघर्ष याःगु ताम्सालिङ संघर्ष समिति जानाः मंकाः कथं मेगु मोर्चा नेवाः तामाङ समन्वय समिति नीस्वनाः थीथी कथंया अभियानत न्ह्याकाच्वंगु दु ।
नेवाःतय्गु दथुइ दुगु मू मू राजनीतिक पार्टीया नेवाः भातृ संगठन अले नेवाःतय्गु राष्ट्रिय संगठन नेवाः देय् दबू अथे हे तामाङतय्गु लागाय् दुगु मू मू राजनीतिक पार्टीया तामाङ भातृ संगठन व तामाङतय्गु राष्ट्रिय संगठन नेपाल तामाङ घेदुङ दुथ्याःगु उगु मोर्चायात न्हापाया नेवाः स्वायत्त राज्य मंकाः संघर्ष समिति व ताम्सालिङ स्वायत्त राज्य संघर्ष समितिया मेगु रुप धकाः धायेछिं ।
झिंस्वंगू हे जिल्लाया प्रतिनिधित्व याकाः,
नेवाः व तामाङतय्गु जातीय संगठनया प्रतिनिधि, बुद्धिजीवी नापं थीथी ख्यःयापिं मनूतय्त दुथ्याकाः राजनीतिक सम्मेलन यानाः नेवाः व तामाङतय्गु मंकाः माग नेवाः ताम्सालिङ प्रदेश नां तयेमाःगु, नेवाः व तामाङया भाषायात सरकारी कामकाजया भाषाया रुपय् मान्यता बीमाः ।
ई हिला वनेधुंकूगु नापं थौंया इलय् आः दुगु संविधानया व्यवस्थायात नालाः उकी दुने नेवाः व तामाङतय्गु पहिचानया अधिकार स्थापित यायेत धकाः अथे मंकाः मोर्चा दयेकाः न्ह्याः वनाच्वंगु खः ।
नेवाःतय्सं नेवाः स्वायत्त राज्यया खँ अले तामाङतय्सं ताम्सालिङ स्वायत्त राज्यया खँयात अथें तयाः आःया अवस्थाय् मंकाः कथं ज्वने फइगु अले मंकाः कथं वने फइगु लँपुया रुपय् ३ नम्बर प्रदेशया नां नेवाः ताम्सालिङ प्रदेश जुइमाः धकाः माग यायेगु नापं थुगु प्रदेशय् नेवाः व तामाङतय्गु भाषायात सरकारी कामकाजया भाषाया रुपय् मान्यता बीकेगु, थुगु प्रदेशया राजधानीया रुपय् मुकाम धकाः हेटौंडाय् तयातःगु अवस्थाय् आः राजधानी काभ्रेय् तयेमाःगु नाप नापं संविधानं हे व्यवस्था यानातःगु कथंया स्वायत्त क्षेत्र, संरक्षित क्षेत्र व विशेष क्षेत्रया व्यवस्था यायेत माग यानाः मंकाः कथं गतिविधि याना वयाच्वंगु खः ।
नेवाः ताम्सालिङ समन्वय समितिपाखें आः तकया दुने सतकय् संघर्ष याःगु मदुनि अले जनताया दथुइ नं वंगु खने मदुनि । इमिसं सरकार, प्रदेशया सरकार नापं सांसदतय्त ज्ञापन पौ बीगु नापनापं न्यागू राष्ट्रिय पार्टीया नेतातय्त नापलानाः थःपिनिगु खँ तयेगु ज्या यानाच्वंगु दु । छगू कथं धायेगु खःसा थ्व धइगु थःपिनिगु माग पूरा यायेगु निंतिं अप्रत्यक्ष रुपं दबाब बीगु कथंया लबिङ यायेगु ज्या जुयाच्वंगु खनेदु ।
नेवाः व तामाङत जाना वन धाःसा जक पहिचानया मुद्दा स्थापित याये फइगु अले नेवाः व तामाङत पहिचानयात स्वाकाः नेवाः ताम्सालिङ प्रदेश धकाः ३ नम्बर प्रदेशया नां तये फइगु, यदि नेवाःतय्सं नेवाः प्रदेश अथवा नेपालमण्डल प्रदेश अले तामाङतय्सं ताम्सालिङ प्रदेश धकाः माग याना वन धाःसा नेवाः व तामाङतय्त ल्वाकाः ३ नम्बर प्रदेशया नां बागमती प्रदेश, पशुपति प्रदेश, राजधानी प्रदेश, नारायणी प्रदेश धकाः तयेत प्रमुख दलया प्रमुख नेतात लिस्वइ मखु धकाः धाये फइगु अवस्था दु ।
उकिं नेवाः व तामाङत जानाः थौंया इलय् नेवाः ताम्सालिङ प्रदेश साझा मुद्दा दयेकाः गुगु कथं अभियान संचालन यानाच्वन थ्व थौंया आवश्यकता खः धकाः धाये फइगु अवस्था दु । थौं व हे नेवाः ताम्सालिङ समन्वय समितिपाखें संघर्ष यानाः नेवाः तामाङ प्रदेश धकाः नां तयेत सफल जुइ धकाः तायेके मजिउ । थ्व समन्वय समितिइ दुने वर्तमान सरकारया नेतृत्व यानाच्वंगु एमाले, सत्ता साझेदार दल माओवादी केन्द्रनिसें प्रमुख प्रतिपक्ष दल नेपाली कांग्रेस अथे हे संघीय समाजवादी फोरम दुथ्यानाच्वंगु दु ।
थ्व फुक्क कथंया राजनीतिक दलनिसें सामाजिक संगठन तकं दुथ्याःगु थुगु कथंया मोर्चां सतकय् वयाः आन्दोलन याइ अले नेवाः व तामाङतय्गु अधिकार स्थापित याये फइ धाये फइगु अवस्था मदु । उकिंं थुगु समन्वय समितिपाखें संघर्ष याइ मखु बरु दल व संघीय सांसद नापं प्रदेश सांसद्तय्त लविङ यायेगु, दबाब बीगु ज्या जक याये फइ धकाः थुइकेमाः ।
झिंस्वंगू जिल्ला दुथ्यानाच्वंगु थुगु प्रदेशय् मुक्कं यानाः सच्छि व झिम्ह प्रदेश सांसदत दुसा थनया आदिवासी नेवाः व तामाङत मुक्कं याना नीच्याम्ह जक दु । थुगु ल्याखं स्वल धाःसा नेवाः व तामाङतय्सं तःधंगु कुतः मयायेकं ३ नम्बर प्रदेशया नां नेवाः ताम्सालिङ धकाः तयेके फइगु अवस्था मदु । उकिया नितिं नेवाः तामाङ समन्वय समितिं लबिङ यायेगु अले मेगु हे छगू मोर्चा दयेकाः आन्दोलन यायेगु नितिं नं तयार यायेमाः ।
अले नेवाः तामाङ समन्वय समितिं याये फइगु ज्या धइगु राजनीतिक सम्मेलन यानाः राजनीतिक दलया नेतातय्त दबाब बीगु अले थुगु मुद्दायात कयाः सहमतिइ हयेगु नितिं वातावरण तयार यायेगु खः ।
झिंस्वंगू हे जिल्लाया प्रतिनिधित्व याकाः, नेवाः व तामाङतय्गु जातीय संगठनया प्रतिनिधि, बुद्धिजीवी नापं थीथी ख्यःयापिं मनूतय्त दुथ्याकाः राजनीतिक सम्मेलन यानाः नेवाः व तामाङतय्गु मंकाः माग नेवाः ताम्सालिङ प्रदेश नां तयेमाःगु, नेवाः व तामाङया भाषायात सरकारी कामकाजया भाषाया रुपय् मान्यता बीमाः धकाः मंकाः अवधारण व माग न्ह्यब्वयेगु ज्या यायेमाः । थुगु कथंया ज्या यायेफत धाःसा आःया अवस्थाय् उपलब्धी जुइ धकाः तायेकेमाः ।
LEAVE YOUR COMMENTS