एटिएम कार्ड चिप प्रविधिइ वनेत सुझाव

येँ – येँया थीथी एटिएमपाखें चिनियाँ ह्याकरतय्सं करोडं मल्याक दां खुयाकाःगु घटना लिपा नेपाल राष्ट्र बैंकं बैंकतय्त चिपय् आधारित कार्ड दयेकेत सुझाव बिउगु दु । मेखे बैंकतय्सं धाःसा तुरुन्त हे थौंकन्हय् प्रचलनय् वयाच्वंगु म्याग्नेटिक स्ट्रिप कार्ड चिइकाः चिपय् आधारित कार्ड छ्यले अवस्था मदुगु खँ धाःगु दु ।

चिनियाँ ह्याकरतय्सं छवाः न्ह्यव एटिएमं स्वंगू करोड ५८ लाख ध्यबा खुया काःगु बारे छानविन यायेत राष्ट्र बैंकं गठन याःगु समितिं स्वला दुने चीपय् आधारित कार्डया व्यवस्था यायेत बैंकतय्त सुझाव बिउगु खः । चिनियाँ ह्याकरतय्सं एटिएमं ध्यबा लिकायेत छ्यःगु फुक्कं कार्ड ‘म्याग्नेटिक स्ट्रिप’या कार्ड जूगु खनेदयेवं समितिं एटिएमया सुरक्षा बल्लाकेगु निंतिं चिपय् आधारित कार्ड दयेकेमाःगु सुझाव बिउगु खः ।

मेखे नेपाल बैंकर्स एशोसियसनया कार्यसमिति दुजः अशोक शेरचनं स्वलाया दुने हे म्याग्नेटिक स्ट्रिपय् आधारित कार्ड विस्थापन यायेफइगु अवस्था मदुगु खँ बिबिसीलिसे खँ ल्हासें धाःगु दु । ‘लखौं ग्राहकपिंसं छ्यलाच्वंगु म्याग्नेटिक कार्ड स्वला दुने पूवंक विस्थापन यायेगु असम्भव हे दु’ वय्कलं धयादीगु दु ।

लखौं प्रयोगकर्तातय्के म्याद ल्यं दनिगु म्याग्नेटिक स्ट्रिप कार्ड दनि । उमित तुरुन्त कार्ड हिलाबीगु सम्भावना नं म्हो हे जक दुगु खँ धाःगु दु ।

म्याग्नेटिक कार्डय् खातावालया सूचं सीमित मात्र जक दइगुलिं एटिएमय् ध्यबा लिकायेत छ्यलीबलय् खातावालया आधिकारिकता पुष्टि यायेगु खँय् ह्याकरतय्सं लबः काइगु तच्वःगु जोखिम दुगु खँ सुचना प्रविधि विज्ञतय्सं धाःगु दु । उकिं नं राष्ट्र बैंकं म्याग्नेटिक कार्ड चिइकेत सुझाव बिउगु खः ।

तर बैंकतय्त धाःसा थ्व सुझाव तुरुन्त कार्यान्वयन यायेगु धाःसा सम्भव जुयाच्वंगु मदु । विशेषतः विदेशी बैंकतय् कार्ड नं नेपालय् चले जुयाच्वंगुलिं नं आः तुरुन्त हे म्याग्नेटिक कार्ड चले मजुइगु एटिएम तये सम्भव मदु । यक्व हे अमेरिकी बैंकतय्सं अझ नं म्याग्नेटिक स्ट्रिपया हे कार्ड छ्यलाच्वंगु खँ बैंकर्सतय्सं धाःगु दु ।

थुकिया लिसें नेपालय् हे नं लखौं प्रयोगकर्तातय्के म्याद ल्यं दनिगु म्याग्नेटिक स्ट्रिप कार्ड दनि । उमित तुरुन्त कार्ड हिलाबीगु सम्भावना नं म्हो हे जक दुगु खँ धाःगु दु । राष्ट्र बैंकं धाःसा चीपय् आधारित कार्ड स्वला दुने लागू हे यायेमाःगु खँ धयाच्वंगु दु । राष्ट्र बैंकया प्रवक्ता लक्ष्मीप्रपन्न निरौलां बिबिसीलिसे खँ ल्हासें स्वला दुने कार्ड हिलेत खातावालातय्त सुचं बिइगु व मवल धासा कार्ड हे निष्क्रिय यानाःसां चीपय् आधारित कार्ड छ्यलेमाःगु खँ धयादीगु दु ।

वय्कलं वैकल्पिक रुपं म्याग्नेटिक स्ट्रिपपाखें जुइगु कारोवार दिकेगु हे तयारी जुयाच्वंगु खँ नं धयादीगु दु ।बैंकिङ प्रविधि विज्ञतय्सं धाःसा म्याग्नेटिक स्ट्रिप कार्डय् ह्याकतय्सं मेपिनिगु विवरणय् थपघट यायेफइगु तःधंगु जोखिम दुगु खँ धयाच्वंगु दु ।

थ्व हे कारणं भिजा, मास्टर कार्ड थेंज्याःगु सेवा बियाच्वंगु संस्थां म्याग्नेटिक स्ट्रिपपाखें जुइगु कारोवार जुइबलय् थप विवरणया आधिकारिता पुष्टि यायेगु ज्या बैंकतय्सं हे यायेमाःगु शर्त तयेगु यानाच्वंगु दु । भिजा, मास्टर्सकार्डं म्याग्नेटिक कार्डया कारणं भवितव्य जुल धाःसा थःपिं जिम्मेवार जुइमखु धकाः न्हापा हे शर्त तइगु खँ बैंकर्सतय्सं धाःगु दु ।

मेखे एटिएमपाखें ध्यबा खुयाकाइगु घटना तसकं अप्वया वःगुलिं एटिएम कार्डय् हे पतिंया छाप तयेगु बायोमेट्रिक प्रणालीइ वनेमाःगु खँ नं पिहां वःगु दु । तर थ्व प्रविधि नकतिनि हे जक वःगु जूगुलिं छुं छुं देशय् जक थुकिया छ्यलाबुला सुरु जूगु दु । तर नेपालय् नं थ्व प्रविधि सुरु यायेगु खःसा तसकं थाकु धाःसा मजुइगु खँ प्रविधिविज्ञतय् धापु दु ।

छवाः न्ह्यव जूगु ह्याकयात कयाः थौंकन्हय् सिंगापुरं वःपिं विज्ञतय् पाखें अनुसन्धान जुयाच्वंगु दु । छानविन समितिया दुजः व राष्ट्र बैंकया कार्यकारी निर्देशक बमबहादुर मिश्रं अनुसन्धानया झ्वलय् देशं पिने च्वंगु प्रविधि प्रयोगशालाय् यंकाः नं अनुसन्धान जुइगु खँ धयादीगु दु ।