कोटेश्वर–कलंकी सतक हस्तान्तरण

येँ –  चीन सरकारं कोटेश्वर–कलंकी सतक नेपाः सरकारयात हस्तान्तरण याःगु दु । सोमवाः छगू ज्याझ्वःया दथुइ चिनिया राजदूत हउ याङ्चीं प्रधानमन्त्री केपी ओलीयात ताःचाः ल्हासें सतक हस्तान्तरण यानादीगु खः । थ्व झ्वलय् प्रधानमन्त्री व राजदूत जानाः मंकाः कथं सतकया उलेज्या नं याःगु खः ।

कोटेश्वर निसें कलंकी तकया चक्रपथया सतक चीन सरकारया ग्वाहालिं चिनिया कम्पनीं तब्या यायेगु ज्या याःगु खः । चक्रपथ सुधार परियोजना अन्तर्गत चक्रपथ तब्या यायेगु झ्वलय् कलंकी अण्डरपास लँ नं दयेकूगु खः । सतक हस्तान्तरण ज्याझ्वलय् न्ववासें प्रधानमन्त्री केपी ओलीं चीन सरकारं सतक, कृषि, शिक्षा, स्वास्थ्य लगायतया क्षेत्रय् ग्वाहालि याना वयाच्वंगु खँ कनादिल ।

थ्व झ्वलय् वय्कलं कलंकी महाराजगञ्ज सतक सुधारया ज्याय् धाःसा छुं कथंया पंगः मवयेकेगु प्रतिबद्धता प्वंकादिल । वय्कलं लःया पाइप, मतया पोल आदिं सतक दयेकेगु ज्याय् अवरोध वइगु जूगुलिं इलय् हे चिइकाः ज्या न्ह्याकेत मन्त्रालयय् व सडक विभागयात निर्देशन नं बियादीगु दु ।

 

सम्बन्धित बुखँ

LEAVE YOUR COMMENTS