ने. सं. ११४४ ञलाथ्व नवमी -

ललितकला प्रतिष्ठानय् पौभाः चित्रकला विषयय् गोष्ठि

येँ – नेपाल ललितकला प्रज्ञा प्रतिष्ठानय् वंगु छुं दिं न्ह्यः ‘नेपाली परम्परागत पौभा व थांका चित्रकलाय् शिल्पया वर्तमान चुनौति’ विषययात कयाः छगू गोष्ठि जुल । प्रतिष्ठानया परम्परागत चित्रकला व शिल्पकला विभागया ग्वसालय् उगु गोष्ठि जूगु खः । गोष्ठिइ शिल्पकलाय् आवश्यक शास्त्रीय ज्ञानया प्रशिक्षण बीगु संस्थाया म्होति दुगुलिं थुगु व्यवसाय हे संकटय् लानाच्वंगु खँय् वक्तातय्सं चिउताः प्वंकूगु दु ।

लिसें परम्परागत शिल्पकला संरक्षणया निंतिं थ्व सम्बन्धी ज्ञानयात पुलांगु पुस्तां न्हू पुस्तायात लःल्हाना वनेमाःगु खँय् नं सरोकारावालातय्सं बः बिउगु दु । प्रतिष्ठानया कुलपति केके कर्माचार्यं परम्परागत रुपं दयेकातःगु स्वदेशी शिल्प, कला व मौलितकां देय्यात अन्तर्राष्ट्रियस्तरय् म्हसीका यंकाच्वंगु धासें नेपाली मौलिक शैली व परम्पराया विशेषता व उकियात आकर्षणयात कयाः विदेशय् तकं अभ्यास यायेगु कुतः जुया वयाच्वंगु जानकारी बियादिल ।

अथ हे विभागया प्रमुख बुद्धिबहादुर गुरुंगं पौभाः व थांका चित्रकलाय् खने दयाच्वंगु समस्या व उकिया समाधानया लँपु मालाः थुगु ख्यःयात ल्यंका तयेगु निंतिं विभागं ज्याझ्वःत याना वयाच्वंगु जानकारी बियादिल । लिसें वय्कलं प्राचीन शिल्पकलाया अध्ययनय् हाथ्या खने दयाच्वंगुलिं थ्व पेशा हे लोप जुइगु अवस्थाय् तकं थ्यनाच्वंगु दु धयादिल ।

ज्याझ्वलय् प्रतिष्ठानया प्राज्ञ धर्मराज शाक्य व विज्ञ पूर्णप्रसाद ह्योजुं ज्यापौ न्ह्यब्वयादिसें पौभाः व थांका निगुलिं धार्मिक विषय जूगु विचाः प्वंकादीगु खः ।