वार्ता पुचलं सुंलिसे वार्ता याये मफु तर वार्ताया सम्भावना दुगुलिं म्याद थप यायेत इनाप

येँ – भूमिगत जुयाः सशस्त्र संघर्ष याना वयाच्वंगु पुचःलिसे वार्ताया निंतिं सरकारं स्वनातःगु समितिया म्याद क्वचाःगु दु । स्वलाया निंतिं म्याद बियाः नीस्वंगु समितिया म्याद वंगु मंसिर ८ गते क्वचाःगु खः । वार्ता समितिया म्याद क्वचाःसां समितिं खास उपलब्धी धाःसा हासिल यायेमफुगु खँ धाःगु दु ।

वार्ता समिति गठन लिपा स्वलाया दुने निगू दर्जन स्वयां अप्वः पुचः लिसे वार्ता जूसां नं गुगुं नं पुचलं सशस्त्र आन्दोलन त्याग यायेगु घोषणा धाःसा याःगु मदुनि । समितिया म्याद फुइधुंकाः नं छुं कथंया उपलब्धी मजूसां समितिं थःपिनिगु म्याद थप यायेमाःगु माग यानाच्वंगु खँ सीदुगु दु ।

समितिया पदाधिकारीतय्सं म्याद थप लिपा निगूगु चरणया वार्ता यायेफत धाःसा आपालं पुचः शान्ति प्रक्रियाय् वइगु दावी यानाच्वंगु दु ।
समितिया पदाधिकारीपिंसं आन्दोलनरत पुचःलिसे यानागु वार्ता सकारात्मक जुयाच्वंगुलिं म्याद थप लिपा फुक्कं पुचःयात मुलधारय् हयेगु लँपुइ वइगु विश्वास प्वंकूगु दु ।

समितिं पहिचान जूगु फुक्कं पुचः लिसे छगू चरणया वार्ता यायेधुनागु खँ धाःगु दु । तर पहिचान जूसां नं प्यंगू पुचःलिसे सम्पर्क याये मफुगु खँ धाःगु दु । समितिया दुजःतय् कथं तराई लागाय् सशस्त्र आन्दोलन याना वयाच्वंगु जयकृष्ण गोइत पुचलं पुलांगु हे अडान तयाच्वंगुलिं वार्ता याये मफयाच्वंगु खः ।

गोइत पुचलं वार्ताया झ्वलय् संयुक्त राष्ट्र संघया प्रतिनिधि तयाः जक वार्ता यायेगु अडान कया वयाच्वंगु दु । अथेहे गोइत लिसें बिस्कं च्वनाः सशस्त्र संघर्ष याना वयाच्वंम्ह ज्वाल सिंह (नागेन्द्र पासवान) लिसे समितिं वार्ताया निंतिं कुतः याःगु खःसां नं सम्पर्क धाःसा तयेमफुगु खँ धाःगु दु ।

मेखे समितिं अर्धभूमिगत रुपं आन्दोलन याना वयाच्वंगु नेत्र विक्रम चन्द (विप्लव) लिसे वार्ता जुयाच्वंगु जानकारी नं समितिं बिउगु दु । चन्दया क्वय्या तहया नेतृत्व लिसें वार्ता जुयाच्वंगु व याकनं हे शीर्ष नेतृत्व लिसें वार्ता यायेफइगु अवस्था ब्वलनाच्वंगु खँ धाःगु दु ।
सरकारं सोमनाथ पाण्डेया संयोजकत्वय् सुरेश आले मगर, लिला भण्डारी व ताराकान्त चौधरी दुथ्याःगु वार्ता समिति गठन याःगु खः ।

विप्लवयात स्वापू हे तये मफु
वार्ता पुचलं दकलय् अप्वः ग्यानापुग गतिविधि यानाच्वंगु विप्लव माओवादीलिसे धाःसा स्वापू तकं तये मफुगु खँ धाःगु दु । विप्लव पुचः भारतय् च्वनाः गतिविधि यानाच्वन धाःसा उकिया नेता प्रकाण्डं छुं न्हि न्ह्यः तिनि येँय् छगू तःधंगु प्रदर्शन यानाः जनसभा समेत याःगु खः । सरकारं उगु पार्टीया नेतातय्त ज्वनाः दुःख बीगु ज्या यानाच्वंगुलिं सरकारलिसे वार्ता मयायेगु खँ विप्लव माओवादीं धाःगु दु । विप्लवं वार्तां थःपिनि समस्या ज्यनी मखु धयाच्वंगु दु ।

सम्बन्धित बुखँ

LEAVE YOUR COMMENTS