येँय् च्वंपिं काश्मिरीत चिन्तित

येँ – भारत सरकारं काश्मिरयात बियातःगु विशेष अधिकार खारेज याना बीवं अन ब्वलंगु अन्यौलतां यानाः नेपालय् च्वंपिं काश्मिरी जनता चिन्तित जूगु दु । येँया ठमेलय् आपालं काश्मिरीत पसः चायेकाः च्वनाच्वंगु दु । भारत सरकारं काश्मिरया विशेष अधिकार हनन यानाः अन कफ्र्यु तया बिउगु दुसा सम्भावित खतरायात ध्यानय् तयाः आपालं सैनिकत परिचालन याःगु दु ।

अझ दकलय् ग्यानापुगु खँ ला काश्मिरय् टेलिफोन व इन्टरनेट सेवा समेत बन्द याना बिउगु दु । टेलिफोन, इन्टरनेट थेंज्याःगु सञ्चार माध्यम बन्द याना बिउगुलिं काश्मिरय् च्वंपिं थःथितिपिंलिसे उमिसं खँ ल्हाये फयाच्वंगु मदुनि । थज्याःगु हे इलय् काश्मिरय् यक्व मात्राय् सैनिक परिचालन यात धइगु समाचार नं वयाच्वंगु दु ।

उकिं अन च्वंपिं मांअबु, कलाः, मचाखाचाया छु अवस्था जुयाच्वन धकाः येँय् च्वंपिं काश्मिरीत अप्वः चिन्तित जुयाच्वंगु खँ धाःगु दु । थ्व इलय् थः छेँजःपिंलिसे खँ तकं ल्हाये मखनाः उमित थाकुयाच्वंगु दु । येँय् ३०० म्ह ति काश्मिरीत दुगु अनुमान दु ।भारतय् न्हापा नं सैनिक परिचालन जुइबलय् उमिसं लाक्वपाक्व तालं मनूतय्त ज्वनेगु, स्यायेगु व मिस्तय्त बलात्कार यायेगु ज्या तक याइगु खः ।

भारतीय सेनाया थज्याःगु खँ लुमंकाः नेपाःया काश्मिरीत अझ चिन्तित जुयाच्वंगु खँ धाःगु दु । येँय् च्वंपिं गुलिखे काश्मिरीत न्ह्यःने वयाच्वंगु इद नखःया लागिं छेँय् वनेगु तयारी नं यानाच्वंगु खःसा आः उमिसं थःगु भ्रमण नं रद्द याःगु दु । अझ गुलिं धाःसा सरकारं लागू याःगु कफ्र्युं स्कूल बन्द जुयाः मस्तय् ब्वनेज्या प्रभावित जुइगु खनाः नं चिन्तित जुयाच्वंगु दु ।