
येँ(नेपालभाषा टाइम्स)- नेपाः धमाधम गरिब जुया वनाः अन्ततः ताथ जुइगु अवस्थाय् थ्यनीन धकाः थौंकन्हय् चिन्ता प्वंकेगु याना हयाच्वंगु दु । तर नेपाः गरिब जुया वंसां थ्वहे नेपाः दुने च्वनीपिं नेपाःमित धाःसा धनी जुजुं वनाच्वंगुया संकेत खने दया वःगु दु । उकिया हे छगू चिं खः विदेश वनाः विदा न्यायेकः वनेगु चलन । थुकी मध्ये गुलिखे विदेशय् च्वंपिं थःथितिपिंथाय् वनीपिंनिगु ल्याः नं लानाच्वंगु खँ
धाःगु दु ।
थौंकन्हय् नेपाःया धुकुतिइ मुनाच्वंगु विदेशी मुद्रा खर्च जुइगु छता मू कारण विदेश चाःहिउ वनीपिं नेपाःमि नं जुयाच्वंगु दु । विदेश चाःहिलेगु लागिं नेपाःमितय्सं थुलि ध्यबा खर्च यानाच्वंगु दु कि उकियात तुलना यानाः स्वयेबलय् नेपाः वइपिं विदेशीतय्सं याइगु खर्च स्वयां नं अप्वयाच्वंगु खनेदु ।
राष्ट्र बैंकं पिकाःगु छगू तथ्यांक कथं वंगु फागुन महिनाय् जक विदेशय् चाःहिउ वनीपिं नेपाःतय्सं मुक्कं १० अर्ब ५० करोड तका खर्च याःगु दुसा नेपाः चाःहिउ वःपिं विदेशीतय्सं मुक्कं ३ अर्ब १० करोड तका जक खर्च याःगु दु । वंगु साउन महिनांनिसें फागुन तकया ल्याः कायेगु खःसा थ्व च्यालाया दुने नेपाःमितय्सं विदेश चाःहिलाः मुक्कं ४७ अर्ब तका खर्च याःगु दुसा नेपाः चाःहिउ वइपिं विदेशीतय्सं धाःसा मुक्कं १४ अर्ब तका जक खर्च याःगु दु ।
राष्ट्र बैंकं धाः कथं नेपाः चाःहिउ वइपिं विदेशीतय्सं सिबें विदेश चाःहिउ वनीपिं नेपाःमितय्सं याइगु खर्च अप्वइगु थ्व चलन वंगु स्वदँ न्ह्यवंनिसें अप्वया वनाच्वंगु खः । तर लिपांगु च्यालाय् धाःसा चरम अवस्थाय् थ्यंगु दु । थ्व ल्याखं विदेशीतय्सं नेपालय् याइगु खर्च सिबें नेपाःमितय्सं विदेशय् याइगु खर्च स्वदुगं अप्वयाच्वंगु दु ।
कोरोना महामारीया कारणं विदेशी पर्यटकत नेपाः वइगु तसकं कम जुयाच्वंगु इलय् नेपाली पर्यटकत धाःसा विदेश वनाः अप्वः खर्च याइगु थ्व क्रम तसकं चिन्ताजनक जूगु खँ धाःगु दु । देय्या धुकुतिइ मुनाच्वंगु विदेशी मुद्राया सञ्चिति बचे यायेत सरकारं विलाशी सामानया आयात नियन्त्रण याःसां विदेशय् वनाः न्ह्यइपुकीपिंसं खर्च याइगु विदेशी मुद्रा नियन्त्रण यायेगुपाखे धाःसा खास हे ध्याना मवनाच्वंगु खँ नं धाःगु दु । राष्ट्र बैंकया कथं थौं उच्च वर्गीय जक मखु मध्यम वर्गीय नेपाःमित नं विदेशी मुद्रा ज्वनाः विदेश चाःहिउ वनेगु क्रम अप्वयाच्वंगु दु ।
LEAVE YOUR COMMENTS