सामाजिक सञ्जालं दँय् ६० अर्ब नेरु यंकी

येँ (नेपालभाषा टाइम्स)÷सामाजिक सञ्जाल फेसबुकं जक नेपालं दँय् ६० अर्बं मल्याक दां आम्दानीयानाच्वंगु छगू अध्ययनं सीदुगु दु । दँय् ६० अर्बं मल्याक लबः नयाच्वंसां थज्याःगु कम्पनीतय्त धाःसा सरकारं करया दायराय् हये फयाच्वंगु मदु ।

नेपाल राजश्व परामर्श समितिं तयार याःगु ‘राजश्व दायरा वृद्धि’ सम्बन्धि प्रतिवेदनय् विज्ञापनपाखें जक सामा– जिक सञ्जालतय्सं अर्बौं तका लबः नयाच्वंसां नेपालं उमिपाखें राजश्व म्हये मफयाच्वंगु तथ्यांक न्ह्यथनातःगु खः ।

प्रतिवेदनय् नेपालय् नं सामाजिक सञ्जालय् विज्ञापन यायेगु प्रवृत्ति ह्वात्त हे अप्वःगु व थज्याःगु विज्ञापनपाखें जक दँय्् अर्बौं तका पिहां वनाच्वंगु खँ न्ह्यथनातःगु खः । बजार सम्बन्धी अनुसन्धान याइगु कम्पनी स्टाटिस्टाकाया कथं सन् २०२१ य् फेसबुकया प्रति प्रयोगकर्ता विज्ञापन आम्दानी ४०.९६ अमेरिकी डलर थ्यंगु दु । थ्व ल्याखं नेपाःया १ करोड ३३ लाख फेसबुक प्रयोगकर्तातय्सं विज्ञापन स्वःगु वापत जक फेसबुकं ६० अर्बं मल्याक आम्दानी यानाच्वंगु दु ।

चालु आर्थिक दँया आर्थिक ऐन– पाखें सरकारं विद्युतीय सेवा कर (डिजिटल सर्भिस ट्याक्स– डिएटी) सम्बन्धी व्यवस्था याःगु खःसां आःतक निगू कम्पनी जक थ्व कर प्रणालीइ दर्ता जूवःगुु दु ।

आन्तरिक राजश्व विभागया प्रवक्ता राजुप्रसाद प्याकुरेलं न्हूगु कर प्रणाली जूगुलिं थुकी आवद्ध जुइत बाध्यकारी मयाःगुलिं नं सामाजिक सञ्जालयात करया दायराय् हयेत थाकुयाच्वंगु दु । थ्व कर प्रणाली कथं गैरबासिन्दां नेपाःया उपभोक्तायात उपलब्ध याकूगु विद्युतीय सेवाया कोरावार मूल्यया निगू प्रतिशत दरं विद्युतीय सेवा कर कायेदइ ।

सम्बन्धित बुखँ

LEAVE YOUR COMMENTS