अन्तर्राष्ट्रिय औद्योगिक व्यापार मेला न्हाय्कंमाया सामानय् आकर्षण

येँ – भृकुटी मण्डपय् जुयाच्वंगु झिंन्याक्वःगु अन्तर्राष्ट्रिय औद्योगिक व्यापार मेला व घरेलु उद्योग महोत्सव २०७५ य् न्हाय्कं प्वाचां (अल्लों) दयेकातःगु कापतं यक्वसिया ध्यान सालाच्वंगु दु । महोत्सवय् ब्वयातःगु न्हाय्कमांं दयेकातःगु कोट, ज्वारीकोट, इस्टकोट, तपुली, लाकां, चप्पल, सल, झोलाय् मनूत आकर्षित जुयाच्वंगु दु ।

प्युठान नौबहिनी गाउँपालिका –६ या कोठी हिमाल अल्लो उद्योगया संचालिका चित्रकला बुढामगरं न्हाय्कमां दयेकातःगु कापः न्यायेत मनूत अप्वः वयाच्वंगु खँ कनादिल । वय्कःया स्टलय् अल्लों थानातःगु ढाकाया थेंज्याःगु तपुली न्यासः निसें च्यासः तका व ज्वारीकोटी निद्वत्याः निसें न्याद्वः तकां तक मियाच्वंगु दु ।

वय्कलं नेपाली सामग्रीपाखें उत्पादन जुइगु जूगुलिं न्हाय्कंमाया सामानपाखे मनूत आकर्षित जूगु खँ कनादिल । अल्लो धयागु न्हाय्कंया थीथी प्रजाति मध्ये छगू जातपाखें दयेकीगु खः । दँय्दसं जंगलय् अथें सिना वनाच्वंगु थज्याःगु न्हाय्कंमायात प्रशोधन यानाः कापः थाइगु खः ।

‘रक्तचाप, चिनि ल्वय् दुपिंसं न्हाय्कमां दयेकातःगु कापःया लँ पुनेगु यात धाःसा फाइदा जुइ’ वय्कलं धयादिल, ‘नेपाली उत्पादनयात प्रोत्साहन बीत व स्वास्थ्यया कारणं नं अल्लो (न्हाय्कनं) दयेकातःगु कापः न्याइपिं अप्वयाच्वंगु खः ।’ बुढामगरं संचालन यानाच्वंगु उगु उद्योगं थौंकन्हय् थः हे छेँजःपिं सहित न्यय्म्हेसित रोजगारी बियाच्वंगु दु ।

वि.सं. २०६३ इ ९० हजार तका लगानी यानाः न्हाय्कंमायात प्रशोधन यानाः कापः उत्पादन यायेगु सुरु यानादीम्ह वय्कःया उद्योग थौंकन्हय् ५० लाख तकाया थ्यंवयेधुंकूगु दु । न्हाय्कंमां दयेकातःगु कापःया व्यापार बांलानाच्वंसां बैंकतय्सं ब्याज अप्वयेका यंकाच्वंगुलिं लबः धाःसा कायेमखनाच्वंगु धासें वय्कलं कनादिल, ‘१३ प्रतिशत ब्याजं कयागु त्यासा आः १८ प्रतिशत थ्यंकाबिउबलय् समस्या जूगु दु ।

सहमति अःखः बैंकं ब्याजदर अप्वयेकेगु यानाच्वंगु दु’ वय्कलं धयादिल । महोत्सवय् दाङ घोराहीया चिनारी महिला साझेदारी उद्योग समूहया स्टलय् नं न्हाय्कंमां दयेकातःगु कापः त्याइपिनि भीड जुयाच्वंगु दु । उद्योगया संचालिका प्रेमकुमारी पुनं थःगु स्टलय् अप्वः थें तपुली, चिचिधंगु पर्स न्याइपिं वयाच्वंगु खँ कनादिल ।

वय्कलं न्हिं ३५ हजार तका बराबरया न्हाय्कंमां थानातःगु कापःया सामग्री मीगु यानाच्वनागु खँ कनादिल । वय्कःया कथं महोत्सवय् न्हाय्कंमा (अल्लो)या विशेषता थुइकेत नं मनूत वयेगु याः ।

वय्कलं सरकारी ज्याकू, स्कुल, कलेजय् नेपालय् उत्पादन जूगु न्हाय्कंया कापः छ्यलेगु यात धाःसा व्यवसाय अझ बांलाइगु खँ कनादिल ।महोत्सवय् भारत, बंगलादेश व पाकिस्तान पाखें छ्यंगूया हलज्वलं व पर्सिया स्टलत नं तयातःगु दु । वंगु फागुन २३ गते निसें सुरु जूगु महोत्सव थौंतक न्ह्याइ ।